سیرت سرور کائناتؐ

حاجی شاہ بیگ شیدا

0

Get real time updates directly on you device, subscribe now.

اُم المومنین حضرت خدیجہؓ و اوڑتون خواجہؐ نا برام

مکہ اٹ مشہور ئسک بِن خدیجہ پاکباز

مال و دولت بھاز تخاکہ ئس قریش ءِ اوڑا ناز

او مسڑ ئسّک خویلد نا طاہرہؔ ئسک لقب

سیرت و صورت نا گودی ئس گچین اونا نسب

ئس جنوزان مالدار و چوکری و مے تے ئس

او تجارت ہم کریکہ دُن وسم ہر دے تے ئس

بھلّا سردار آک قریش نا خواہسُرہ کے برام

مس برام کس نا کہ اوڑتون اے نا عزت احترام

کتوکہ او کس اس نا رشتہ ءِ منظور چا

زور شاغے کس اوڑا الوکہ مجبور چا

احمدِؐ مختار نا اخلاق و صورت آ ہُرا

مہر ہُب اس اُست اٹی تے دُن کس اس پاہے سُرا

میسرہؔ غان بِنگ اونا کِسہ ءِ تینا خف اٹ

واقعہ ءِ کل سفر نا خواجہؐ نا سوچا رِد اٹ

اونا سچائی خلوص ءِ اونا مہر و محبت ءِ

اونا توڷ و بش گچین ءِ ہندن اونا عظمت ءِ

دُن کس اس پاہے کہ گودی اُست ءِ اوڑا بائے تِس

ہلک تما اُست اتون او اُست ءِ دیر کن ہائے تِس

پارے ایڑھکو تے تینا انت وسیلہ انت کسر

ای نکاح کنِنگ خواوہ داڑکن پابو کیو امر

پاریر دیر آ ٹے نظر نا، دیر ءِ اُست ءِ تسنس

داخہ وخت آن چُپ تولوک، داسہ دیر کن مسنس

احمدؐ ءِ، پارے گچین آ است اٹی جاگہ کروک

ای خناٹ اودے کہ داسہ، است مہالو ئس کہوک

تڑ گلی اس کشبو نم یا سلاہ اس ایتبو

کے اوؐ منظور رشتہ ءِ دا دوست خواہ آک نم مبو

پارے ایڑھکو نفیسہؔ بے فکر گودی مرک

نا قلم کن نیام تماٹ بن خلیوہ ای درک

دا وڑ اٹ بِنبو نفیسہؔ خواجہؐ ءِ تینٹ خنا

ہیت ءِ بی بی نا کروک آ خواجہؐ نا دُو آ تِخا

خواجہؐ مس حیران پارے ای غریب مالدار او

مالدار آک بسر اوڑکن، مسنے ناگار او

مال و دولت نا کنے اف ای تو ایدے پٹوہ

کہ ولفک کل جہان ءِ ای ہمیدے پٹوہ

ای تو سنگت بے کس آتا بے نوا تا پا تے نی

بندہ افٹ ناکِس انِگا ای بُت آتا، پاتے نی

عیش و آرام نی خناسُس جہد و خواری کیوہ ای

مہربان ءِ جوان چاہک ایدے راضی کیوہ ای

مال روزی آن سوائے پین کسر اس ہم ارے

اے صراط مستقیم کن پین کسر اس ہم ارے

کیک گزارہ دا وڑ اٹ او اوڑکن ہندا مشکل اف

سختی و سوری کن تینے جوڑ کے ہندا مشکل اف

پین ہزار آ مشکل آک ہم زند انا تہٹی اریر

فرعون و نمرود پنی آ حاکم آتے لڑزفیر

دافتے کلّ ءِ کیک قبول تو ای ہم ولدا سوچوہ

بسفوٹ ہندا سلاہ ءِ اِلّہ جان تون ملوہ

کل ہیت آتے نفیسہؔ گودی آ ولدا درے

خواجہؐ نا ہیت آک دادو جوان خبر نے کہ مرے

جوان سوچا دُن خدیجہؓ زند انا واپار اکن

عیش کوش ءِ کیوہ قربان احمدِؐ مختار اکن

سختی و سوری قبول ءِ مال زر نا اف طمع

اوڑکن بس دا جان فدا ءِ ہیت ءِ پاوہ دا سفا

کیوہ خدمت زند ءِ مُچ آ دا کنا بختاوری

مہر و محبت آن خنیوہ ای تینے بڈ و بری

دا مثال قائم مرے دا ہر نکاح ٹی ای ہُرو

قائم آ دنیا ٹی ہندا نیک نامی ای خنو

دن نفیسہؔ مہر انا ہیت آتے خواجہؐ غا درے

ہر وڑ اٹ اودے اَمنّا داسہ پا نی انت مرے

خواجہؐ ولدا دڑد خور آ اِلّہ ءِ تینا خنا

پاہک داوڑ دُن خدیجہؓ ہیت ءِ اوڑتون دا تِخا

نی کنے ایتے سلاہ اس ہیت ءِ اونا کیو قبول

خوش بریک نے ہیت ہندا یا مریسہ نی ملول

ئس ابو طالب کہ حیران ہیت پارے دُن ارے

حسن و صورت نا اے گودی لکھ مبارک نے مرے

خواہفے او دوست عزیز ءِ دُن سلاہ اس بسفے

پک کرے دا ہیت ءِ کُلّ آن جوان اوفتان ارّفے

لگا دو نیم تُو آن زیادہ ہوکا ہر کنڈ آن مس

ناز خوشی آن خدیجہ بن گلِ خندان مس

ناز و شان اٹ خواجہؐ نا جن بس برامی نا جہہ آ

ایڑھکوک بی بی نا ایڑے شئیر خلکُر دیرہ غا

الہ بی بی نا کہ عمرو ئس بی بی نا وکیل

ہُچ تڑنگا دا برام آ لگا اوڑے بن سبیل

دُن ابوطالب نکاح ءِ خواجہؐ نا داوڑ تفے

رب انا شان و شرف تو خواجہؐ ءِ ہم نازفے

بنبو ورنا ءِ محمدؐ او قریش اٹ دُن گچین

عقل و شان اٹ سبر ءِ او کل عرب اٹ اوؐ کبین

مال و دولت او کن تخپک مال و دولت انت اسے

مال قارون آن ہنانے دا تو نن کن پنت اسے

اوؐ خدیجہ ءِ قبول کیک نم گواہ داڑے مبو

بیست ہُچ حق مہر ایتک جوان بنبو خیال کبو

چِل درھم ہر ہُچ انا ئس مسُّرہ پنچ سد درہم

او دعا خواہا کہ اللہ خوش تخے اوفتے وسم

خواجہؐ نا عمر بیست پنچ سال بی بی نا ئس چل سال

وخت ءِ گدریفیر ہرا وڑ دانا ملپک ہچ مثال

تانکہ بی بی زندہ ئسک خواجہ پین کتو برام

مہر و محبت تا مثالی اُست اٹی دُن احترام

او سدخہ مال اتون مس دے و نن دُن خواجہ غا

زہد خواری اوڑکن کشا زند اٹی دُن جہہ جہہ آ

بن سوائے ابراؑہیم آن کلّ ءِ اولیاد خواجہ نا

لمہ گودی ئس خدیجہؓ ئسر اونا پِڈ انا

قاسم و زینبؓ رقیہ ہم کلثومؓ فاطمہؓ

مارک اونا فوت مَسُر زندہ مسر دے منہ

مار اس عبداللہ پنی ءُ مس اوڑان آخر آ

اوڑکن بن خواجہ لقب دُن طاہر و طیب تِخا

باوہ قاسم نا کنیت خواجہ دُن مسک ہنا

خواجہؐ ءِ کل یات کریرہ ابوالقاسم نا پِن آ

زندہ مَسُر کل مسِنکؓ تے جوان ءُ زند اس او تخار

شُکر ءِ کل تا رند اٹی تینا مسلمانی خنار

سختی و سوری خنار او دُن خنار او ہجرت ءِ

اخہ تکلیف تسر کافرک باوہ جان آ حضرتؐ ءِ

ہفتئی تلار
تاک: 04
23-29 جنوری 2021
پنہ: 05

Get real time updates directly on you device, subscribe now.

Leave A Reply

Your email address will not be published.