پٹ و پول۔۔۔۔۔۔ اصطلاحات نثر۔۔۔۔۔۔۔(65)

ناول:۔ (Novel)

ناول لاطینی زبان نا لوز ”Novus“ نا بدل مروک آ دروشم ءِ، و ہرانا لغوی معنہ ”پوسکن“ ءِ۔ اطالوی زبان اٹی Novel ءِ ”Novella“ (ناولا/ نویلا) پاننگک۔ ہرا کِسہ، کہانی و خبر نا معنہ ٹی کاریم اٹ بریک۔

اطالوی زبان اٹی اسہ پین لوز اس ”ناولاس“ ہم ارے، ہرا جسٹی نن بادشاہ نا زمانہ ٹی پرمان کن پاننگاکہ۔ و اوفک ہم ”پوسکن آ ہیت و واقعہ“ نا معنہ ٹی بریرہ۔

ہندا ڈَول فرانسیسی ادب اٹی ہم Novel ءِ Novelle نا دروشم اٹ مون آ اتنگانے، ہرانا معنہ کِسہ و کہانی نا ءِ۔

ہندن انگریزی ٹی ہم Novel لوز انا رد اٹ داسہ مستعمل ءِ۔ و ایلو زبان تیٹی ہم ناول تینا لوزی دروشم نا وڑ کاریم اٹ اتنگ انگ ءِ۔

ناول غٹ لغت آتیٹی اونا معنہ پوسکن، پوسکن آ، عجیب و غریب، خبر، واقعہ، کہانی، کِسہ، و پوسکن آ ہیت ءِ۔

اصطلاحی معنہ ٹی ہمو کِسہ، کہانی ءِ ہراٹی زند انا چندی واقعہ غاتے اسہ چس ہلوک ءُ وڑ اسے ٹی بیان کننگے، ناول پاننگک۔

ناول نا چس ءِ برجا تخنگ کن اونا جُز آتیٹی پلاٹ، ندارہ کشی، کردار، مکالمہ، بنداوی بشخ آک اریر۔

انگریز فلسفی فرانس بیکن ناول نا دا ڈَول تعریف ءِ کرینے، ہرادے محمد اشرف کمال تینا کتاب ”اصطلاحات“ اٹی حوالہ نا رد اٹ دن بیان کرینے:

”ناول نثری قصے کے ذریعے انسانی زندگی کی ترجمانی کرتا ہے۔ وہ بجائے ایک جذباتی اور شاعرانہ نظریہ حیات کے ایک فلسفیانہ یا کم از کم عقلی تنقید حیات پیش کرتا ہے۔

قصہ کی کوئی بات اس وقت تک ناول نہیں کہلاتی، جب تک کہ وہ نثر نہ ہو۔ حقیقی زندگی کی تصویر نہ ہو، اور ایک خاص ذہنی رجحان کے زیر اثر ایک خاص طرح کی ایک رنگی اور ربط اس میں موجود نہ ہو۔“

ناول اٹی زند اتون تعلقدار ہر ہمو پالو و بشخ بیان کننگ مریک ہراٹی ویل، ویدن، خواری، ڈکھیائی، خوشی، دراخ جوڑی، ناجوڑی، توڷ و بش، و تاریخ و تہذیب کون آ علامت و نشانیک تینا چاگڑد اٹی موضوعی یا کہ معروضی وڑ اٹ بیان مریر۔

ناول نگار تینا آزموندہ و مشاہدہ نا کڑمبی آن گچین و بے مٹ ءُ ناول نوشتہ کننگ کیک۔

ناول نا چندی وڑک اریر، ہراٹی لس وڑ اٹ تاریخی ناول، سیاسی ناول، نظریاتی ناول، اصلاحی ناول، کڑداری ناول، جاسوسی ناول، نفسیاتی ناول، سائنسی ناول، و مکالماتی ناول اوار مریرہ۔

ہفتئی تلار
تاک:40
29-23 اکتوبر 2021ء
پنہ: 02