زندان نا ڈائری، سال 1973ء…………(31)

ڈسٹرکٹ جیل نا اسیر آک:.

کوئٹہ ٹی ساڑی مننگ نا سوب آن گچین کاری نا دے تیٹی مہم نا وخت آ نیپ بلوچستان نا راہشون تیا لگوک غٹ دوبہ غاتا ورندی تے میڈیا نا کمک اٹ نواب محمد اکبر خان بگٹی نا جند ترسا کریکہ۔ بلوچستان آن پیشن ملکی کہول آ قوم دوست، وطن دوست و ترقی پسند پارٹی تتون ہیت و گپ اٹ کل آن مونی ئس۔ مالی خڑچ آتا بابت بھلو است اسے نا خواجہ ئس، تینا ہندا خاصیت آتا سوب آن او کوئٹہ و ایب کیب انا شار تیٹی جہد کروک آ نیپ و بی ایس او نا کارندہ غاتے کن اسہ سیخا اس ئسکہ۔ دا دے تیٹی اونا اُرا ٹی سہب آن شام اسکان کارندہ غاتا اوڑدہی تا چرجوئی برجا ئسکہ۔ 1970ء نا گچین کاری نا دے تیٹی ورکر آتے پارت بگٹی ہاؤس آن جاری مسکہ۔ سوارہ نا وخت آ اِرغ و دیگر نا وخت آ چا اکن اونا کندوری کل اکن تالان ئسکہ۔ دا ہم اسہ امنا مروک ءُ راستکی اس ئسکہ کہ بلوچستان اٹی نیپ انا سرسہبی تیٹی نواب محمد اکبر خان بگٹی نا کڑدار ءِ گوجالنگ مفک۔

ہندا دے تیٹی او اسہ قومی ترجمان و فرض شناس بلوچستانی سے نا حیثیت اٹ تینا زمواری تے سر ترسا کرے و نیپ انا راہشون آتیا سٹی آ دوبہ غاتا ورندی تے ترسا کرے۔

نواب محمد اکبر خان بگٹی ءِ تینا جند انا سنگت آتا نا استی تا درک ہمو وخت لگا ہراتم نیشنل عوامی پارٹی نا بنجائی کمیٹی نا دیوان ہرا کہ 20 دسمبر 1971ء نا دے مسوسس، ٹی فیصلہ کننگا کہ گورنر کن نیپ کارندہ اس مننگ المی ءِ۔ دا فیصلہ نا ر داٹ بلوچستان آن چار بندغ ہرافتیٹی میر غوث بخش بزنجو، سردار خیر بخش مری، امتیاز حسین حنفی ایڈووکیٹ و ہاشم خان غلزئی نا پن بلوچستان آن سلاہ تننگا، و دا ہرچار آ پن تے ہمو وخت انا صدر مملکت آ راہی کننگا، کہ دافتیان کس اسے گورنر جوڑ کننگے۔ نیپ انا دا بے مونی نواب محمد اکبر خان بگٹی ءِ اسہ جتا ءُ کسر اسے آ شاغا۔

ہفتئی تلار
تاک: 12
26-20 مارچ 2021ء
پنہ:2