جیل بھرو تحریک سیاسی بے چیٹی تالان کننگ کن ءِ، رانا ثناء اللہ

اسلام آباد: بنجائی وزیر داخلہ رانا ثناء اللہ خان پارینے کہ جیل بھرو تحریک نا اصل مسخت اسہ راگ اس کننگ، میڈیا نا چکار ءِ دوئی کننگ، امن و ایمنی نا حالیت آتے زہمی کننگ و نزوری ودی کننگ ءِ، ملک اٹی امن وایمنی نا حالیت آتے پک کننگک و کانود ءِ پرغوک آتے دزگیر کننگک، امن دشمن تا ریکارڈ ءِ تخنگے و اوفتے اوفتا کیریکٹر سرٹیفکیٹ اٹ پیدوار کننگک۔ او سے شنبے نادے آ داڑے سیکورٹی حالیت آتا بابت بڑزکو کہولی دیوان آن تران کریکہ۔ دیوان اٹی سیکرٹری داخلہ یوسف نسیم کھوکھر، پنجاب، سندھ، کے پی کے و اسلام آباد نا آئی جیز، ہوم سیکرٹریز، کمشنر اسلام آباد و ایلو بڑزکو آفیسر آک بشخ ہلکر۔ دیوان اٹی وزیرداخلہ ءِ پی ٹی آئی نا جیل بھرو تحریک نا رداٹ امن و ایمنی نا حالیت آتیا سرجمی اٹ حوال تننگا۔ بنجائی وزیر داخلہ رانا ثناء اللہ خان پارت کرے کہ کانود ءِ پرغوک آتا برخلاف شاہدی تے یکجا کرسا الس نا مون آ اتنگے تانکہ کانود شکن آتا اصل چہرہ بے نقاب مرے، زالبول و نیزگار کارندہ غاتا دزگیری آن پاناد کننگے۔ وزیرداخلہ کراچی ٹی دہشت گردی نا ساڑی آ جلہو ءِ گچین وڑاٹ پسپا کننگ اٹ آئی جی سندھ و پولیس فورس انا دلیرانہ کڑد انا ستاءِ کرے۔ یات سلے کہ پاکستان تحریک انصاف نا جیل تحریک نا بنا پنجاب نا دارالحکومت لاہور آن مریک‘ 2 بجہ غا چیرنگ کراس لاہور اٹ تحریک انصاف نا راہشونک دزگیری ایترہ‘ اولیکو مرحلہ ٹی مسکوہی گورنرعمر سرفراز چیمہ، ولید اقبال، مسکوہی صوبائی وزیر ڈاکٹر مراد راس دزگیری ایترہ۔ پی ٹی آئی نا سَد آ کارندہ غاک ہم ہمو وخت آ ساڑی مریرہ۔ تحریک انصاف نا جاری کروک شیڈول نا رد اٹ 22 فروری آن یکم مارچ اسکان ہڑدے 200 کارندہ رضاکارانہ وڑ اٹ دزگیری ایترہ۔ دزگیر کپننگ آ کارندہ و اسمبلی نا باسک آک پک کروک ہند آ دھرنا ایترہ۔ شیڈول نا رد اٹ 23 فروری آ پشاور، 24 آ راولپنڈی، 25 ملتان و 26 فروری آ گوجرانوالہ نا کارندہ غاک دزگیری ایترہ‘ کارندہ و پارٹی راہشون تا کنڈآن 27 فروری آ سرگودھا، 28 فروری آ ساہیوال و یکم مارچ آ فیصل آباد اٹ دزگیری تننگک۔

(اے پی پی)