مستونگ‘ لیویز چوکی آ دہشتگرد آتا جلہو، 2 کارندہ شہید

کوئٹہ: بلوچستان نا علاقہ مستونگ اٹی نادرست سلہہ بند بندغ آک لیویز چیک پوسٹ آ جلہو کریر ہراٹی لیویز فورس انا ورناو دہشت گرد آتا نیام اٹ اسہ ایلو آ سم کاری ٹی اِرا لیویز کارندہ شہید مسر۔ اسسٹنٹ کمشنر مستونگ برکت بلوچ نا رداٹ سے شنبے ناسہب اتون مستونگ ببری نا خڑک لیویز چوکی آ نادرست سلہہ بند بندغ آک جلہو کریر ہراٹی 2 کارندہ منظور احمد و محمد اسلم شہید مسر وخت اس کہ سلہہ بند بندغ آک کارندہ غاتا سلہہ غاتے تینتون درسا نرار۔ لیویز چوکی کوئٹہ تفتان قومی شاہراہ غا واقعہ ءِ۔ حوال ملنگ تون سیکورٹی فورس و لیویز انتطامیہ واقعہ نا جاگہ غا سرمرسا شہید لیویز کارندہ غاتا لاش آتے ہندی ہسپتال آ گدریفیر، مستونگ فورس آک علاقہ ناناکہ بندی ءِ کرسا دوبہ دار آتا پٹنگ نا بناءِ کریر۔ وزیراعظم محمد شہباز شریف مستونگ اٹی لیویز چیک پوسٹ آ دہشت گرد جلہو نا ترندی اٹ مذمت ءِ کرسا پارینے کہ شہید آتے مچ آ قوم سلام پیش کیک۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم جلہو اٹی شہید مروک آ لیویز کارندہ غاتا درجہ غاتا بڑزی کن دعا کرے و خاہوت آتون ہڑزخواہی کرینے۔ وزیراعظم جلہو اٹی ٹھپی مروک آتا زوت دراخ جوڑی کن ہم دعا کرے۔ وزیراعظم پارے کہ دہشت گرد آتا بیخ ءِ کشنگ کن سیکورٹی فورس آتا عزم و حوصلہ بڑز ءِ۔ شہید آتے مچ آ قوم سلام پیش کیک۔ وزیراعلیٰ بلوچستان میر عبدالقدوس بزنجومستونگ نا علاقہ ببری چیک پوسٹ و چمن اٹی پولیس ناکہ غا سم کاری نا واقعہ غاتا ترند انگا لوز آتیٹی مذمت ءِ کرینے، او مستونگ اٹی اِرا لیویز کارندہ غاتا شہیدی و چمن اٹی پولیس کارندہ نا ٹھپی مننگ آ ڈکھیائی و است ہسونی نا درشانی ءِ کرینے۔ وزیراعلیٰ سیکرٹریٹ ہاؤس آن جاری کروک بیان نا رداٹ وزیراعلیٰ بلوچستان میر عبدالقدوس بزنجو پارے کہ دہشت گردی نا ساڑی آ واقعہ غاک گڑتی نا سوب ءُ، دہشت گرد زموار آتے کانود نا گرفت اٹ اتنگ کن غٹ وسیلہ غاتے کاریم اٹ اتنگک، ننے ملک دشمن زموار آتا سازش آتے بے سہب کننگ کن پین ہشار مروئی تکک۔ میر عبدالقدوس بزنجو مستی پارے کہ کانود نافذ کروک آ ادارہ غاک تینا زمواری تے پورو کیر وامن و شونداری نا برخلاف چم آتے بے سہب کننگ کن الس ہم متحد مرے۔ اوشہید کارندہ غاتا خاہوت آتون ہڑزخواہی و ہمدردی نا درشانی ءِ کرے و دعاکرے کہ اللہ تعالیٰ شہید آتا بخشش و خاہوت آتے صبر جمیل ایتے۔

(اے پی پی)