انسٹیٹیوٹ آف سٹریٹجک سٹڈیز اٹی اوغانستان آ گول میز کانفرنس

اسلام آباد: انسٹیٹیوٹ آف سٹریٹجک سٹڈیز اسلام آباد (آئی ایس ایس آئی) ٹی اوغانستان آ گول میز کانفرنس اس اڈ ہلک۔ مسکوہی سیکرٹری خارجہ و انسٹیٹیوٹ آف سٹریٹجک سٹڈیز نا ڈائریکٹر جنرل سہیل محمود نا کماشی ٹی مروک آ گول میز کانفرنس اٹی اوغانستان نا مون آ بروک آ حالیت آتون اوار اوار پاکستان و اوغانستان نا تعلقداری آ ہم بشخ ہلوک آک گپ وتران کریر۔ انسٹیٹیوٹ آف سٹریٹجک سٹڈیز نا کنڈ آن جاری پریس ریلیز نا رداٹ گول میز کانفرنس نا بست وبند ءِ سینٹر فار اوغانستان، مڈل ایسٹ اینڈ افریقہ کریسس، ہراٹی اوغانستان تون ہڑتوم آ کنڈآتا تعلقداری نا سیاسی، سفارتی، سیکورٹی، واپاری و الس تون تعلقداری نا پلو آتیا گپ وتران کننگا۔ بشخ ہلوک آک تینا خیال و جاچ آتون اوار اوار مون آ بننگ کن سلاہ ہم تسر۔ کانفرنس اٹی بشخ ہلوک آک مسکوہی اوغان وزیر خزانہ و سفیر ڈاکٹر عمر زاخیلوا ل تون اوغانستان نا بابت پیش رفت آ شرہ غاتیٹی ہم بشخ ہلکر۔ گول میز کانفرنس نا بشخ ہلوک آتیٹی مسکوہی پاکستانی سفارت کار ایاز وزیر، مسکوہی سفیر قاضی ہمایوں، اوغانستان اٹی پاکستان نامسکوہی سفیر ابرار حسین، پلاننگ کمیشن نا ممبر ڈویلپمنٹ کمیونیکیشنز ڈاکٹر اشتیا ق احمد، مسکوہی وائس چانسلر پشاور یونیورسٹی ڈاکٹر عظمت خان، جاچکار بریگیڈیئر (ر) محبوب قادر، صحافی ڈاکٹر تیمور شل، صحافی حسن خان و صحافی طاہر خان آن بیدس چیئرمین آئی ایس ایس آئی سفیر خالد محمود تون اوار سینٹر فار اوغانستان مڈل ایسٹ اینڈ افریقہ نا ڈائریکٹر آمنہ خان و سینٹر نا ریسرچ ٹیم انا باسک آک ہم اوار ئسر۔

(اے پی پی)