صدر نا چٹھی، الیکشن کمیشن چاہندار آتے سلاہ کن اینو بٹنگا

اسلام آباد : الیکشن کمیشن آف پاکستان صدر عارف علوی ناکنڈآن راہی کروک چٹھی آ اٹارنی جنرل و آئین نا چاہندار آتتون سلابت نا فیصلہ کرینے۔ سَے شنبے نا دے چیف الیکشن کمشنر ناکماشی ٹی اہم ءُ سلابتی دیوان اس اڈہلک‘ ہراٹی صدر عارف علوی نا چٹھی نا جم جاچ ءِ ہلنگا‘ دیوان اٹ چٹھی نابابت ہچ ءُ پک ءُ فیصلہ اس کننگتو‘ دیوان اٹ صدرعارف علوی نا چٹھی آ اٹارنی جنرل و آئینی چاہندار آتتون سلابت اٹ مونی کاریم کننگ آ امنا کننگانے۔ الیکشن کمیشن اینو چار شنبے نا دے اہم ءُ سلابتی ءُ دیوان اس بٹنگانے۔ ہراٹی اٹارنی جنرل و آئینی چاہندار آتے بٹنگ انگانے‘ دیوان اٹ آئینی چاہندار آتیان صدر ناکنڈآن صوبہ غاتے ٹی لس گچین کاری تا تاریخ نا بابت سلاہ ہلنگک۔ اٹارنی جنرل و آئینی چاہندر آتا سلابت اٹ صدرمملکت آ ورندی چٹھی راہی کننگک۔ ہندن خیبر پختونخوا و پنجاب اسمبلی نا لس گچین کاری تا باندات آ الیکشن کمیشن اٹارنی جنرل و آئینی چاہندارآتتون سلابت کن اینو چار شنبے نا دے دیوان ءِ بٹنگا۔ چیف الیکشن کمشنر سکندر سلطان راجا ناکماشی ٹی سلابتی دیوان اڈہلک‘ دیوان اٹ کمیشن نا باسک‘ سیکرٹری الیکشن کمیشن و لاء ونگ انا نمائندہ غاک ساڑی ئسر‘ الیکشن کمیشن نا دیوان نا اعلامیہ ہم جاری کننگا۔ جاری کروک اعلامیہ نا رد اٹ الیکشن کمیشن آئین وکانودنا وڑ اٹ بے زورشاغنگ آن فیصلہ کرسا بسنے و داکان پد ہم کرسا کیک۔ الیکشن کمیشن ہر وخت آئین و کانود نا رد اٹ 90دے اٹ گچین کاری کرفنگ کن سنبرینگوک مریک۔ اعلامیہ نا رد اٹ آئین وکانود اٹ اسہ جاگہ اس ہم نوشتہ اف کہ گچین کاری تا تاریخ ءِ الیکشن کمیشن ءِ تروئی ءِ‘ او کمامدار آتا کنڈآن تاریخ پک کننگ آن پد دمدستی گچین کاری ترسا گچین کاری کرفنگ نا پابند ءِ۔ صدر پاکستان ناکنڈآن تاریخ پک کننگ آن پد کمیشن نادیوان اٹ داڑا سرجم سجفنگا‘ اٹارنی جنرل آف پاکستان وایلو کانود چاہندار آتتون سلاہ کننگ نافیصلہ کننگا۔ اٹارنی جنرل آف پاکستان ءِ اینو چار شنبے نا دے بٹنگ انگانے‘ سلابت کن اِرا آئینی وکانودی چاہندار ءِ گچین کننگ انگ ءِ۔ یات سلے کہ تدوک آ دے صدر مملکت ڈاکٹر عارف علوی 9 اپریل آ کے پی و پنجاب نا اسمبلی تا لس گچین کاری تے کرفنگ نا پرمان کریسس۔