سائفر نا رکھ عمران نا زمواری ءِ، گم کننگ نا سزا 3 سال ءِ، مصدق ملک

اسلام آباد: وزیر مملکت پیٹرولیم مصدق ملک پارینے کہ چیئرمین پی ٹی آئی ذاتی فائدہ کن آئین و کانود ءِ لتاڑا، و تینا سوغند ءِ پرغا، سائفر نا رکھ عمران نا زمواری ءِ، گم کننگ نا سزا 3 سال ءِ، سائفر ءِ سیاسی مسخت آتیکن کاریم اٹ اتنگا، عمران خان وزیراعظم نا وڑ اٹ سیکرٹ ایکٹ نا خلاف ورزی ءِ کرے، ہزار آ مخلوق نا مون آ جلسہ ٹی پارے کہ سائفر گم مسنے، آئین نا رداٹ ملک انا اودیم دستاویز آتے ظاہر کننگ مفک۔ داخیال آتا درشانی ءِ او پنچ شنبے نادے آ داڑے پریس کانفرنس آن تران کرسا کرے۔ مصدق ملک پارے کہ پی ٹی آئی نا چیئرمین جلسہ ٹی ہزار آ مخلوق نا مون آ پرچی اس چست کرسا پارے کہ دا ریاست پاکستان نا اودیم دستاویز ءِ ہرانا رکھ انا زمواری وزیراعظم تون اوار غٹ آ ٹی ءِ۔ ہروئی دادے کہ عمران خان جلسہ ٹی سائفر ءِ چست کرفے تو داکانود نا خلاف ورزی مسنے کہ آخا ہرانا رداٹ غٹ اودیم دستاویز آتے اودیم تخنگ نا پابندی ءِ۔ کابینہ، پارلیمنٹ و وزیراعظم نا حلف اٹی دا نوشتہ ءِ کہ اسہ ہم ہندن ءُ اودیم گڑاسے پاش کننگ مفک ہرادے اودیم تخنگ نا آئین نا رداٹ زمواری ءِ۔ بنجائی جاست پاستی ادارہ (ایف آئی اے) سائفر ناباندات پرسجو کن پاکستان تحریک انصاف نا چیئرمین ءِ زمان پارک اٹ نوٹس رسیفے‘ حوال نارد اٹ ایف آئی اے ناکنڈآن سائفر جاست پاست برجاءِ‘ چیئرمین تحریک انصاف عمران خان ءِ 25 جولائی آ بٹنگ انگانے و دا بابت حوالی پارینے کہ ایف آئی اے زمان پارک اٹ نوٹس سرکرینے‘ حوالی نا رد اٹ چیئرمین پی ٹی آئی ءِ بٹنگ انگ نا نوٹس ءِ بنجائی جاست پاستی ادارہ نا سی ٹی ڈبلیو ونگ سر کرے‘ حوالی نا رد اٹ لاہور اٹ مسکوہی وزیراعظم نا ہنکین زمان پارک اٹ نوٹس سر کننگ کن ایف آئی اے نا ٹیم اسلام آباد آن بسوسس۔

(اے پی پی/ آن لائن)