وڈھ، نجی چیک پوسٹ آک خورک، حالیت آک داسکان بے چیٹ

خضدار :  وڈھ اٹ قومی شاہراہ نا ہڑتوم آ کنڈآن جوڑ اِرا نجی چیک پوسٹ ءِ خورک کرفنگا‘ ڈپٹی کمشنر خضدار جمیل احمد و ایف سی ناکنڈآن کارروائی کرسا ہڑتوم آقبائلی ٹولی تا چیک پوسٹ آتے خورک کرفنگا و ہموڑے بلوچستان کانسٹیبلری و لیویز نا چیک پوسٹ جوڑ کننگ انگ ءِ‘ ڈپٹی کمشنر خضدار کیپٹن ریٹائرڈ جمیل احمد وایلو سکیورٹی ادارہ غاک قومی شاہراہ غا ساڑی ءُ۔ وڈھ اٹ سکیورٹی فورس آتا پٹرولنگ برجاءِ ہرانا کماشی ءِ ڈپٹی کمشنر خضدار کیپٹن ریٹائرڈ جمیل احمد ڈی آئی جی خضدار پرویز عمرانی ایف سی کمانڈٹ کرنل حاظ کاشف و ایس ایس پی خضدار فہد خان کھوسہ کننگ اٹی ءُ۔ لیویز پولیس و ایف سی نیشنل ہائی وے آ گشت کننگ اٹی ءِ‘ انتظامیہ کوشست کننگ اٹی ءِ حالیت آتے مست آنبار کننگے‘ پڑک آتا کنڈآن سم کاری نا چرجوئی ءِ توننگ و امن اٹ گچینی اتنگ ءِ۔ ایلو کنڈآ حکومتی و قبائلی کہول آ پڑک آتتون رابطہ کننگ انگ ءِ و ویل ءِ ایسر کننگ کن کوشست کننگ انگ ءِ۔ بی این پی نا سروک سردار اختر مینگل پارینے کہ وڈھ اٹ سازش اسے نا رد اٹ حالیت آتے خراب کننگ نا کوشست کننگ انگ ءِ‘ کیہی دے آن شرپسند آک وڈھ انا مخلوق نا زند ءِ عذاب کرینو‘ میڈیا تون ہیت وگپ کرسا او پارے کہ تدوک آ دے وڈھ اٹ مروک سم کاری آن اِرا بندغ ٹھپی مسنو ہرافتے ٹی اسہ چناس ہم ارے۔ اوپارے کہ سلہہ بند ٹولی تے یلہ النگانے۔ ایلو کنڈآ مسکوہی وزیراعلی بلوچستان چیف آف سراوان نواب محمداسلم خان رئیسانی وڈھ اٹ خراب حالیت آتا بابت ہیت وگپ کرسا پارے کہ نن سردار اسد مینگل‘ سردار اختر مینگل‘ میر نصیر مینگل، میر شفیق مینگل تون ٹیل فون آ وڈھ انابابت ہیت کرینن‘ نن اوفتے پارین کہ ہڑتوم آ پڑک آک جنگ بندی کیر و ننے پورو واک ایتر تاکہ حالیت آتے گچینی ناکنڈآ دننگ مرے‘ پڑک آک تینا بندغ آتتون سلاہ کیر نن اوفتا ورندی کن ہُروک ان۔ اوپارے کہ اگہ نن داسہ وڈھ آ کان و ویل ءِ ایسر کپرسا بیرہ فوٹو سیشن کرسا پدی برین ہرانا ہچ ءُ فائدہ اس مفک‘ نن خوانہ کہ وڈھ انا ویل ءِ ایسر کننگ کن ہڑتوم آپڑک آک ننے واک ایتر تاکہ نن وڈھ آ کان و ہموڑے تولسا ویل ءِ پورو وڑ اٹ ایسر کننگ کین‘اوپارے کہ بے چیٹی آن ننا جند انا مخلوق نا نسخان مننگ اٹی ءِ‘ نن خواپنہ کہ وڈھ اٹ کشت وخون مرے۔ نواب محمداسلم خان رئیسانی پارے کہ میرشفیق مینگل ناکنڈآن ننے واک انا کلہو رسینگانے و پگہ نن کوشست کینہ کہ وڈھ آ کان و کن تون نوابزادہ حاجی لشکری خان رئیسانی پیرہ رئیس رئیسانی وایلو سنگت آک اوار مریرہ‘ نن وڈھ اٹ تولسا ویل ءِ ایسر کننگ نا کوشست کینہ۔

(آن لائن)