خیبر، باڑہ پولیس اسٹیشن آ دہشتگرد آتا جلہو، 3اہلکار شہید، 4 ٹھپی

پشاور: ضلع خیبرنا باڑہ بازار تحصیل کمپاؤنڈ اٹی دھماکہ ٹی اسہ کارندہ اس شہید و 10 بندغ ٹھپی مسنو۔ ریسکیو 1122 خیبرنارداٹ اسہ ٹھپی ءِ ایچ ایم سی، 3 ٹھپی تے ہندی ہسپتال وخت اس کہ 6 ٹھپی تے موقع غا طبی امداد فراوان کننگانے۔ دھماکہ غان ماڑی اسے نا چھت اسے نا تمنگ آن اسہ بندغ اس کیرغ مس۔ ریسکیو 1122 نا ہیوی مشینری موقع نا کنڈآن روانہ کننگانے۔ انسپکٹر جنرل آف پولیس خیبرپختونخوااختر حیات گنڈاپور پارینے کہ پولیس ضلع خیبر اٹی تحصیل باڑہ نا دنگ اٹ پترینگ انگ نا کوشست اٹی اِرا خودکش جلہو آتے خلکنے۔ اوپارے کہ ہڑتوم آخودکش جلہو گیر آک مرکزی درگہ و عقبی کسر آن کمپاؤنڈ اٹ پترینگ انگ نا کوشست کریر ولے ڈیوٹی آ ساڑی پولیس کارندہ غاک ہڑتوم آ دہشت گرد آتے تورسا موقع غاہی ہلاک کریر۔ پولیس نا سم کاری آن خودکش بمبار آتا جیکٹ ترخا و زوردار ءُ دھماکہ اس مس۔ اونا پاننگ ئس کہ جلہو گیر آتا دتر و جونی عزوہ غاتے دوئی کرسا ڈی این اے ٹیسٹ کن گدریفنگانے۔ پولیس چیف پولیس کارندہ غاتا وخت آ ردعمل نا ستاءِ کرے و دہشت گردی نا داوڑنا لغوری کارروائی پولیس نا دہشت گردی و انتہاپسندی نا چٹفنگ نا عزم ءِ متزلزل کننگ کپک۔ وزیراعظم محمد شہباز شریف ضلع خیبر نا باڑہ بازار اٹی دھماکہ نا ترندی اٹ مذمت ءِ کرینے۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم واقعہ ٹی پولیس کارندہ نا شہیدی آ ڈکھیائی و رنج انا درشانی ءِ کرینے۔ وزیراعظم شہید پولیس کارندہ کن بخشش و خاہوت کن صبر وجمیل نا دعاکرے۔ وزیراعظم ٹھپی تے گچین طبی آسرتی فراوان کننگ نا پارت ہم کرے۔ وزیراعظم پارے کہ پولیس کارندہ غاک شکبر بندغ آتے تورسا و تینا جون تے دلدست آ تخسا دہشت گرد آتا ناپاک عزم ءِ بے سہب کریر۔ کانود نافذ کروک آ ادارہ غاتا کارندہ غاک تینا جون تے دلدست آ تخسا الس نا رکھ ءِ پک کیرہ۔ وزیراعظم پارے کہ کنتون اوار مچ آ قوم پولیس نا نرزور گلزادہ غاتے خراج تحسین پیش کیک۔

(اے پی پی)