یوکرائن، روس جھیڑہ نا پر امن ایسری نا خواہندار اُن، بلاول بھٹو

اسلام آباد :  وزیر خارجہ بلاول بھٹو زرداری پارینے کہ یوکرائن و روس انا نیام اٹ جھیڑہ نا پرامن ایسری کن ہر گام انا مخ تفی ءِ کینہ‘ یوکرائن جھیڑہ ناسوب آن کن وخور‘ایندھن وایلو تنکیک ودی مسر‘ پاکستان ہم زہمی مس یوکرائن ءِ سلہہ تفننگ ان دا بارو اٹ خبرک بے بنداو و سٹی ءُ‘ تین پہ تینی تعقلداری تے پینس وگو و السی رابطہ غاتے پین سوگو کننگ خوانہ۔ دا خیال آتا درشانی ءِ او یوکرائن نا وزیرخارجہ دمترو کولیبا تون اسلام آباد اٹ اوڑدہی آن پد اسیجا پریس کانفرنس آن تران کرسا کرے‘ ہڑتوم آوزیرخارجہ غاتا اوڑدہی ٹی تین پہ تینی تعلقداری تتون اوار اہم انگا علاقائی وجہانی امور تیا گپ وتران کننگا۔ اوڑدہی ٹی اقتصادی، واپاری‘ کشاری‘ رکھی بشخ آتے ٹی کمک تون اوار تعلقداری تے پین ودفنگ و مذاکرات آ امنا کننگا۔ یوکرائن نا حالیت آتیا ہم سرجم ہیت وگپ مس و حالیت آتیا گڑتی درشان کننگا‘۔ پریس کانفرنس اٹ وزیر خارجہ بلاول بھٹو پارے کہ یوکرائن نا وزیرخرجہ ءِ پاکستان نادورہ غا بخیرٹ پانہ‘ او یوکرائن نا الس کن امن‘ سوگوی‘ شونداری و شونہالی کن نیک انگا استخواہی تا درشانی ءِ کرے۔ وزیر خارجہ پارے کہ یوکرائن و روس انا نیام اٹ جھیڑہ نا پرامن ایسر کننگ کن ہر گام انا مخ تفی ءِ کینہ۔ بلاول بھٹو زرداری پارے کہ پاکستان یوکرائن آن خولم ہلککہ‘ جنگ آن پد پاکستان نا مشکل ودی مس‘ بلیک سی گرین گام گیج بھاز اہم ءِ‘ ہرانا ستاءِ کینہ۔ ترکیہ، اقوام متحدہ سیکرٹری جنرل و روس اتون بلیک سی گرین گام گیج ءِ بحال کننگ نا بابت ہیت کینہ۔دا وخت آ یوکرائن نا وزیرخارجہ دمترو کولیبا پارے کہ پاکستان نا سلہہ بند فوج ءِ سوگو کننگ‘ کن وخور خاص وڑ اٹ خولم نا فراوانی ٹی مدام کمک کرینن۔ پاکستان سنگت ملک اسے‘ سنگت آک سختی ناوخت آ اسٹ ایلو تون کمک کیرہ۔ پاکستان و یوکرائن آخبت ناکنڈآ ہننگ اٹی ءُ‘ او پارے کہ جنگ زند اناپہیہ ءِ توتنے‘ تعلیم نا بشخ اٹ کمک کینہ۔ ہرا طالب علم یوکرائن اٹ خواناکہ اودے پدی خواہفنہ۔ ڈیجیٹل و اقتصادی کمک ءِ ودفنہ۔ پاکستان اہم ءُ شریدار اسے‘ ہڑتوم آ ملک آک اواری اٹ غذائی سلامتی آ کاریم کیرہ۔ بلیک سی گرین گام گیج اٹ پاکستان، ترکیہ و اقوام متحدہ نن تون کمک کننگ اٹی ءُ۔ یوکرائن نا وزیرخارجہ پارے کہ روس بلیک سی ءِ تورے‘ یوکرائن نا کن وخور نا کوڑی تے بھس کرے‘ روس انا ہندا گام انا سوب آن دنیا نا گیشتری بشخ آتے ٹی کن وخور ناتنکی ودی مس۔ بلیک سی گرین ءِ بحال کننگ یوکرائن نا کشارگر‘ دنیا ٹی لس بندغ تون کمک کننگ کن المی ءِ۔ اسہ سوج اسے نا ورندی ٹی وزیرخارجہ بلاول بھٹو زرداری پارے کہ نن یوکرائن ءِ سلہہ تفننگ ان‘ یوکرائن ءِ سلہہ تننگ نا بابت خبرک راست افس۔ یوکرائن نا وزیرخارجہ دمترو کولیبا پارے کہ فوجی تکنیکی کمک اٹ پاکستان تون 90 نا دہائی ٹی میں الخالد ٹینک تیار کننگ اٹ کمک کرین‘ نن خوانہ کہ پاکستان یوکرائن تون کمک کے۔ پاکستان ہمو فورم تتون اوار مرے ہرا یوکرائن تون روسی جارحیت نا برخلاف کمک کننگ اٹی ءُ۔

(آن لائن)