عمران خان آ درج اسہ مقدمہ اس ہم راست اف، اسدعمر

لاہور : تحریک انصاف نا راہشون اسد عمر پیدوار کرینے کہ ہرا برانز اٹ عمران خان ہچ ساڑی الو ہموٹی اودے پن کننگانے‘ اوڑا درج کروک اسہ دوبہ اس ہم راست افس‘ راستکی تے بیان کننگ آ ننا برخلاف غداری نا مقدمہ جوڑ کننگا۔ لاہور اٹ شبلی فراز تون اوار پریس کانفرنس کرسا پی ٹی آئی نا راہشون اسد عمر پارے کہ ننا جماعت ناکنڈآن 21 اکتوبر اٹ الیکشن کمیشن نا پیشن آ پرامن برانز کننگا‘ ہراٹی اسہ گملہ اس ہم پنتو ولے برانز کننگ آ دہشت گردی نا مقدمہ درج کننگا۔ اسد عمر پارے کہ ہمو برانز اٹ عمران خان ساڑی ہم الو‘ ولے اونا برخلاف ہم پرچہ کاٹ کننگا‘ اونا برخلاف اسہ مقدمہ اس ہم راست اف ولے او ہر کیس انا ہر پیشی آ عدلت آتے ٹی پیش مس۔ 3 نومبر آ اوڑا خونی جلہو مس‘ ہراٹی پی ٹی آئی نا چیئرمین ٹھپی مس و ڈاکٹر آک اودے پورو آرام کننگ نا پاریر و او عدالت اٹ پیش متو۔ پی ٹی آئی نا راہشون پارے کہ دا کیس بھاز بھلو ملنڈ اسے‘ 3 دے آن میڈیا غا غوغا کننگ انگ ءِ کہ عمران خان عدالت اٹ پیش مفننگ ءِ۔مچ آ نظام دا گڑاغا لگوک ءِ کہ عمران خان ءِ امر دزگیر کننگے‘دا گڑاءِ کس ہپننگ ءِ کہ گڑاتا نہاد ءِ امر کم کروئی ءِ۔ اسد عمر پارے کہ کبینی آن الس نسخل نسنگ انگ ءِ‘ زند گدریفنگ عذاب مسنے‘ گیس، بجلی و پٹرول نا نہاد آتے ودفنگ انگ ءِ و پین ہم کبین مریک‘ ہمو ہرا تنکی ئس کہ ہرانا سوب آن نہاد آتے ودفنگ انگ ءِ۔ وزیر دفاع پاننگ اٹی ءِ کہ ملک دیوالیہ مسنے‘ اومیت کننگک کہ دا بیان تیا ہم توہین عدالت نا کارروائی کننگک۔ او مستی پارے کہ راستکی تے بیان کننگ آ ننا بندغ آتا برخلاف غداری نا مقدمہ جوڑ کننگا ولے داسہ عدلیہ نابرخلاف منظم مہم چلیفنگ انگ ءِ ولے کس اس ارفوک ءُ اف۔ ملک اٹ سکیورٹی بست وبند آتے گچین کننگ نا زمواری حکومت ناءِ‘ تانکہ سیاست جوان مفک زرگران ہم جوان مننگ کپک۔

(آن لائن)