نوکاپ زہمی علاقہ غاتا نیاڑی تے شناختی کارڈ تننگ کن دود

کوئٹہ: نوکاپ آن زہمی آ علاقہ غاتیٹی نیاڑی تیکن شناختی کارڈ نا جاری کن بنائی دود ہندی ہوٹل اٹ اڈ ہلک۔ دود سی پی ڈی ٹی ڈی ای اے یون این ڈی پی نا کمک اٹ اڈ ہلک۔ دود آن تران کرسا بی این پی نا پارلیمانی لیڈر ملک نصیر شاہوانی پارینے کہ نوکاپ اٹ قیمتی آ گڑا و زہمی تا شناختی کارڈ آتے ہم دیر درینے۔ شناختی کارڈ مفننگ نا سوب آن نوکاپ نا زہمی تا کمک تون اوار ایلو فائدہ غاتیان زہمی ءُ۔ او پارینے کہ کوئٹہ ٹی ہم بھاز آ زہمیک داسکان کن کمک آن زہمی ءُ۔ انتئے کہ اوفتتون شناختی کارڈ اف۔ اینو نا دود اٹ بشخ ہلنگ کن خوشی مس۔ دا ننا کل انا زمواری ءِ کہ زہمی تا بحالی ٹی کڑد ادا کین۔ داٹی حکومت، میڈیا، سول سوسائٹی تینا کڑد ءِ ادا کے و ہرا بندغ آتا شناختی کارڈ اف۔ وڑ و ڈول ءِ آسان کرسا اوفتے شناختی کارڈ تننگے۔ کوشست کننگے کہ اوفتے بھلا ہوٹل آتیٹی دود اڈ تننگ نا جاگہ غا دا زہمی تا کمک ءِ کننگے ہرا دا وخت آ کمک کن ہروک ءُ۔ اوفتا اسہ وار ولدا آباد کاری کن جوان گام گیج نا گرج ءِ۔ دود آن تران کرسا پارلیمانی سیکرٹری برائے دیر ڈاکٹر ربابہ بلیدی پارینے کہ شناختی کارڈ آنبار انگا بنداوی آ حق انا فراوانی برادری نا کنڈآن اسہ جوان ءُ گام گیج اسے۔ داوڑ نا پروگرام اتنگ خوانہ ہراڑان نیاڑی و ایلو بندغ آتے آسراتی فراوان کننگے۔ اوفتا پاننگ ئس کہ صوبائی و بنجائی حکومت زہمی تا بحالی کن پالیسی جوڑ کننگ اٹی ءُ۔ ہرا جوان ءُ نتیجہ مون آ بریرہ۔ بنائی وڑاٹ نصیر آباد، جعفر آباد و جھل مگسی ءِ گچین کننگانے۔ دود آن تران کرسا نادراآپریشن ڈائریکٹر سید ثباحت علی پارینے کہ نادرا جھل مگسی، نصیر آباد و جعفر آباد اٹ نیاڑی تے شناختی کارڈ نا دوئی کننگ کن گام گیج کننگ انگ ءِ۔ نادرا نا موبائل ٹیمک نوکاپ نا زہمی آ علاقہ غاتیٹی ہنسا نیاڑی تیکن شناختی کارڈ جاری کننگ اٹی ءُ۔ دود آن یو این ڈی پی نا کماش ذوالفقاد گیلانی تران کرسا پارینے کہ بھلو وخت اسے آن دا پروجیکٹ زہمی مسنے۔ ولدا ہم داسہ ڈاکٹر فوزیہ شاہین دا پروجیکٹ نا کماش جوڑ مسنے۔ اوڑتون ملسا دا پروجیکٹ ءِ سرسہب کینہ۔

(آن لائن)