چاغی، اوغان مہاجر آتے روزگاری کننگ کن ہیلکاری نا دود
Get real time updates directly on you device, subscribe now.
دالبندین: ورلڈ بینک نا مالی کمک اٹ ضلع چاغی نا 200 اوغان مہاجر آتے ٹریننگ ترسا ٹول کٹ فراوان کننگانے تانکہ اوفک روزگار دوئی کرسا تینا خاہوت آتا گزران ءِ کیر۔ حوال نا رداٹ ورلڈ بینک و حکومت بلوچستان پلاننگ اینڈ ڈویلپمنٹ ڈیپارٹمنٹ نا کمک اٹ انوویٹیوہ ڈویلپمنٹ آرگنائزیشن نا کنڈآن بلیپ پروجیکٹ نا 45 دے ئی ٹریننگ کورس نا ایسری آ 200 بشخندار آتے سن ڈرائیر و کچن گارڈننگ نا ٹول کٹ بشخ وپانٹ کرے۔ دود انا خاص انگا مہمان بلیپ پروجیکٹ نا ڈسٹرکٹ کوارڈینیٹر آفتاب بلوچ ئس۔ یو این ایچ سی آر نا نمائندہ عبداللہ رضا کمشنریٹ فار افغان رفیوجیز نا نمائندہ جنید احمد مینگل آئی ڈی او نا ریجنل کوارڈینیٹر عتیق الرحمان بادینی آئی ڈی او ضلع چاغی نا کوارڈینیٹر حاجی عبدالرحمان بادینی ڈسٹرکٹ فیلڈ آفیسر گل گوہر جمالدینی رفیوجیز نا راہشون محمد خان یوتھ راہشون نقیب اللہ دود اٹ بشخ ہلک۔ دود آن تران کرسا ترانکار آک پاریر آئی ڈی او بلیپ پروجیکٹ نا کمک اٹ صوبہ نا ہشت ضلع ٹی چار ہزار آن زیات اوغان مہاجر ہرافتیٹی نیاڑی و نرینہ اوار ءُ۔ اوفتے ٹریڈ نا کچن گارڈننگ پولٹری فارمنگ و سن بیسڈ فوڈ ڈرائنگ نا کسب ءِ ہیل ترسا روزگار نا وارخواہی فراوان کننگ اٹی ءِ۔ دا پروجیکٹ نا مسخت اوغان مہاجر آتے اوفتا اُرا ٹی کسب ہیل ایترہ تانکہ اوفک روزگار دوئی کرسا تینا خاہوت آتا آسانی اٹ خیال ءِ کیر۔ اوفتا رداٹ ادارہ نا مسخت روزگار نا وارخواہی ودی کرسا غریبی ٹی کمتی اتنگ ءِ۔ دا مسخت کن حکومت و غیرسرکاری ادارہ غاک ملسا گام گیج کننگ اٹی ءُ۔ او پارینے کہ اوغان مہاجر آتا فلاح و بہود کن حکومت و غیرسرکاری ادارہ غاک بھلو وخت اسے آن کاریم کننگ اٹی ءُ۔ حوال نا رداٹ اوغان مہاجر آتا فلاح و بہود کن حکومت و غیرسرکاری ادارہ غاک بھلو وخت اسے آن کاریم کننگ اٹی ءُ۔
(آن لائن)