وزیر اعظم نا کماشی ٹی ترکیہ زمی جمب زہمی تا کمک نا بابت دیوان

لاہور : وزیرِ اعظم محمد شہباز شریف پاکستان نا انسانی ہمدردی نا تنظیم تے ترکیہ ٹی کمکی سرجز آتیا خراجِ تحسین پیش کرساپارینے کہ پاکستان نا انسانی ہمدردی نا تنظیم ترکیہ وشام اٹ تینا مسلمان ایڑھ ا یلم تا کمک ءِ کننگ اٹی ء وخت اس کہ خیراتی ادارہ غاک ہم ترکیہ و شام اٹ کمکی سرجز آتیا مچ آ قوم ءِ گمر نا خواجہ کرینو۔ وزیرِاعظم محمد شہباز شریف ناکماشی ٹی ترکیہ و شام انا زمی جمب نا زہمی تیکن پاکستان نا کندآن برجا کمکی سرجز آتیا بڑزکو کہولی دیوان اڈ ہلک‘ دیوان اٹ پاکستان اٹ انسانی ہمدردی نا تنظیم ایدھی، سیلانی و الخدمت فاؤنڈیشن نا نمائندہ غاک ہم ساڑی ئسر‘ دیوان ءِ NDMA نا کنڈآن ترکیہ و شام انا زمی جمب نا زہمی تیکن کمکی سرجز و کمکی گڑاتا سر کننگ نا بابت سرجم آگاہ کننگا۔ چیئرمین NDMA دیوان ءِ پارے کہ گدرینگوک آدیوان اٹ وزیرِاعظم نا پرمان نا رد اٹ تمبو جوڑ کروک صنعت کارآتتون سلاہ کرسا اسہ تمبو نا نہاد وتمبو تیار کننگ کن درکار وخت ءِ پک کننگا۔ بروک آ توانا اخیر اسکان حکومتِ پاکستان یخ آن بچفنگ نا لکھ تمبو تیار کرسا ترکیہ غا راہی کیک۔ دا تمبو تے ترکیہ نا ڈیزاسٹر اینڈ ایمرجنسی منیجمنٹ پریزیڈینسی AFAD آن موسمی گرج آتے مون آ تخسا تیار کننگ انگ ءِ‘ دیوان ءِ انسانی ہمدردی نا ادارہ غاتا سروک فیصل ایدھی، سیلانی ٹرسٹ نا بن سروک مولانا بشیر فاروقی و الخدمت فاؤنڈیشن نا نائب صدر عبدالشکور تینا ادارہ غاتا کنڈآن ترکیہ و شام اٹ کمکی کارروائی تا بارو اٹ آگاہ کریر۔ دیوان ءِ پاننگا کہ پاکستانی انسانی ہمدردی نا تنظیم تا کنڈآن ترکیہ و شام اٹ میڈیکل ٹیم راہی کننگانے‘ داڑتون اوار تمبو‘ دارو‘ کنوئی ءُ گڑا‘ کمبل و پچ ہم راہی کننگانے۔

(آن لائن)