ملک ایمان دار ججز خواہک، عمران دار آخا، مریم نواز

راولپنڈی : مسلم لیگ (ن) نا چیف آرگنائزر مریم نواز پارینے کہ ملک ءِ عمران دار آخا ایماندار جج اتا گرج ءِ۔ جسٹس مظاہر نقوی ٹی داخس اخلاقی جیرت اف کہ او استیفہ ایتے‘ تاریخ اٹی دا وڑ انا جج آتا پن بابا زحمت نا وڑ اٹ یات کننگک‘ای عدلیہ نا پاپرہ‘ فیض انا چمچہ غاتا ہیت ءِ کننگ اٹی اٹ‘ مہالو اسٹیبلشمنٹ و داسہ عدلیہ نا کوپہ غاتیا لگسا بننگ ناتیاری مننگ ءِ‘ ایلوفتے دز پاروک آ تینٹ بھلو دز اس پیش تما‘ ننے آ گچین کاری تیان نرنگ نا دوبہ خلوک آ عمران خان تینٹ ڈکھوک ءِ‘ کبینی وعمران خان ہڑتوم آتے اسیجا پیش خسنہ۔ دا خیال آتا درشانی ءِ او راولپنڈی ٹی مسلم لیگ (ن) نا تنظیمی کنونشن آن تران کرسا کرے۔ مریم نواز پارے کہ راولپنڈی نا الس ءِ ن لیگ سلام کیک‘ ن لیگ ناکنونشن تے ٹی زالبول آتا کچ ودنگ اٹی ءِ۔ اوپارے کہ گچین کاری تے ٹی سما تمک کہ مسلم لیگ ن تون ورنا تا فوج ءِ‘ راولپنڈی نا الس نواز شریف تون مہر کیک‘ نواز شریف نامہر راولپنڈی آن ڈکوک اف۔ نواز شریف پاکستان نا اولیکو موٹروے نا بناءِ راولپنڈی آن کرے۔ مریم نواز پارے کہ نواز شریف خذمت کریکہ و عمران خان گھڑی تے دزا‘ اسہ حکمران اس چار سال اسکان بنی گالہ ٹی ڈکوک ئس‘ عمران خان ریکارڈ وام ہلسا اسہ ڈٹ اس ہم راولپنڈی ءِ تتو۔ نواز شریف، شہباز شریف ءِ بھس مروک پاکستان رسینگا‘ ہراتم مشکل آک بریرہ تو نوازشریف ءِ بٹنگرہ‘ مشکل آتے پین کس ودی کیک و نوازشریف ویل آتے چٹفک۔ مسلم لیگ (ن) نا راہشون مستی پارے کہ کبینی نا ارٹمیکو پن عمران خان ءِ‘ عمران خان نا نابودی ناسوب آن ملک اٹ کبینی ءِ‘ نوازشریف نا دور اٹ کنوئی و گرج انا گڑاک اڑزان ئسر‘ نواز شریف دور اٹ ارغ نا ارٹ آن پنچ روپئی اسکان بہا مسکہ‘ کبینی وعمران خان ہڑتوم آتے چٹفنہ۔ عمران خان آئی ایم ایف نا دروشم اٹ بارودی سرنگ کھڈ کرے‘ اوپارے کہ عمران خان نواز شریف نا شونداری ڈٹ آتے پد بٹے‘ عمران خان اسک ملک ءِ لٹار و تینا جیب آتے پُر کریر۔ نواز شریف نا 4 وعمران خان نا 4 سال انا دور ءِ ہننگے‘ 24 ہزار ارب نا وام ہلوک آ راولپنڈی ٹی اسہ ڈٹ اس جوڑ کتو‘ عمران خان راولپنڈی رنگ روڈ اٹ مال جوڑ کننگ نا ڈٹ جوڑ کرے۔ القادر ڈٹ اٹ کرپشن کروک آ تینا ٹرسٹی جوڑ مس۔ مریم نواز پارے کہ مخلوق پاہک کہ ای چیف آرگنائزر جوڑ مسٹ ولے دا کارندہ غاتے مبارک مرے۔مریم نوازپارے کہ نواز شریف ءِ مدام ویل آتے ٹی گٹ پاکستان رسینگانے‘ نوازشریف ہندا مِشن آن ودی ءِ او ہنداڑے پدی بریک۔

(آن لائن)