الیکشن کمیشن صدر ءِ سلابت اٹ اوار کننگ آن نمن
اِرا صوبہ ٹی گچین کاری نا بابت سلاہ نا پاننگ کپنہ، الیکشن کمیشن تینا آئینی و کانود نا رد اٹ زمواری تے چاہک، آئین نا آرٹیکل 105 نا رد اٹ پنوک آ اسمبلی نا گچین کاری تا تاریخ ءِ گورنر تننگ کیک
Get real time updates directly on you device, subscribe now.
اسلام آباد : الیکشن کمیشن آف پاکستان اِرا صوبہ ٹی گچین کاری تا تاریخ ناباندات آ صدر مملکت ءِ سلابت اٹ اوار کننگ آن نمن مس‘ حوال نا رد اٹ صدر عارف علوی نا کنڈآن صوبہ پنجاب و کے پی ٹی لس گچین کاری تا بابت چٹھی نا ورندی ٹی الیکشن کمیشن صدر عارف علوی نا ارٹمیکو چٹھی نا ورندی ءِ ہم تس ہراٹی الیکشن کمیشن صوبہ نا گچین کاری تابابت ایوان صدر ءِ سلابت اٹ اوار کننگ آن نمن مسنے۔ الیکشن کمیشن ناکنڈآن اسہ چٹھی اس سیکرٹری الیکشن کمیشن سیکرٹری ایوان صدر آ راہی کرننگانے ہراٹی پاننگنے کہ آئین نا آرٹیکل 105 نا رد اٹ پرغوک اسمبلی تا گچین کاری تا تاریخ ءِ گورنر پک کننگ کیک‘ الیکشن کمیشن آئین نا رد اٹ صوبہ پنجاب و کے پی نا گورنر تیا چٹھی راہی کرینے و ہڑتوم آ گورنرک داسکان گچین کاری تیکن تاریخ تتنو‘ ہڑتوم آ صوبہ غاتے ٹی لس گچین کاری تابابت چندی عدالت آتے ٹی باندات آتا عدالت آتے ٹی سماعت مننگ اٹی ءِ‘ الیکشن کمیشن چٹھی ٹی پارینے کہ لاہور ہائی کورٹ تینا پرمان اٹ گورنر پنجاب تون سلابت نا پرمان کرے‘ الیکشن کمیشن نا کمامدار آک گورنر پنجاب تون سلاہ کریر ولے گورنر گچین کاری تا تاریخ تتو۔ الیکشن کمیشن فیصلہ نابابت لاہور ہائی کورٹ اٹ انٹرا اپیل دائر کرے‘چٹھی ٹی پاننگانے کہ الیکشن کمیشن ءِ گچین کاری تا تاریخ پک کننگ نا ہچ ءُ کانودی و آئینی واکداری اف‘ الیکشن کمیشن ءِ تینا آئینی وکانودی زمواری تا سماءِ‘ الیکشن کمیشن اولیکو چٹھی نا ورندی ٹی ہم صدر مملکت نا دفترءِ کل حالیت آتیان معلومدار کرینے۔ پنجاب و کے پی گچین کاری تا باندات آتیا دا وخت آ عدالت آتے ٹی سماعت مننگ اٹی ءِ۔ الیکشن کمیشن مستی پارے کہ بشخنداری تون اوار پانہ کہ الیکشن کمیشن ایوان صدر ءِ دا سلابتی عمل اٹ اوار کننگ کپک۔ ایوان صدر تون صوبہ غاتا گچین کاری تا بابت سلاہ کننگ نا بابت الیکشن کمیشن اینو فیصلہ کیک۔ الیکشن کمیشن نا دیوان ءِ اینو دوشنبے نا دے سہب انا بٹنگ انگانے۔
(آن لائن)