ملکی زرگزران اٹ بھرم مون بننگ بناکرینے، مریم اورنگزیب

اسلام آباد:  بنجائی وزیر حوالکاری و شینکاری مریم اورنگزیب پارینے کہ وزیراعظم شہباز شریف نا وژن نا رداٹ ساڑی حکومت نا دمدستی و پبی گام گیج آتا سوب آن ملکی زرگزران اٹی مثبت بھرم تا بننگ بناکرینے، سکرین ٹورازم نا کمک اٹ پاکستانی دودوربیدگ، تہذیب و تمدن ءِ مچ آ دنیا ءِ نشان تننگ خوانہ، حکومت فلم انا بشخ اٹی بھاز انگا آسودہی تسنے، درملکی فلم ساز پاکستان اٹ عکس بندی و فلم سازی نا بشخ اٹی خصوصی رعایت آتیان فائدہ ہرفر۔ داہیت ءِ او اوڑدہی کن بروک آ پاکستان اٹ آسٹریلیا نا سفیر نیل ہاکنز تون گپ وتران کرسا پارے۔ اوڑدہی ٹی ہڑتوم آکنڈآتا تعلقداری، زرگزرانی سوگوی، فلم، آرٹ و دودوربیدگ نا بشخ آتیٹی کمکاری آ گپ وتران مس۔ آسٹریلیانا سفیر ساڑی حکومت نا ملکی زرگزران نا سوگوی و آئی ایم ایف معاہدہ کن کوشست آتا ستاءِ کرے۔ بنجائی وزیر حوالکاری پارے کہ پاکستان آسٹریلیا تون تعلقداری تے قدر انا نظر اٹ ہرک، وزیراعظم شہباز شریف نا وژن نا رداٹ حکومت ملکی زرگزران کن دمدستی و پبی گام گیج کرے، دا گام گیج آتا سوب آن ملکی زرگزران اٹ مثبت بھرم تا بننگ بناکرینے۔ آسٹریلیا نا سفیر ءِ خصوصی زرکاری آسراتی کونسل (ایس آئی ایف سی) نا جوڑ کننگ نابارواٹی سرجم آتیان معلومدار کرسا بنجائی وزیر حوالکاری پارے کہ دا کونسل زرگزرانی بحالی کن پالیسی نا پیششن گوئی، چرجوئی و گچین نفاذ ءِ پک کیک، ایس آئی ایف سی فیصلہ سازی نا بڑزکو فورم آ کاریم کیک۔ اومستی پارے کہ حکومت آجوئی درشانی سلاہ گا پورو یخین تخک، حکومت اقتدار اٹی بننگ تون اولیکو ہفتہ ٹی آجوئی درشانی سلاہ نا بل پارلیمنٹ اٹ پیش کرے۔ اوپارے کہ جرنلسٹس اینڈ میڈیا پروفیشنلز پروٹیکشن (ترمیمی) بل منظوری نا ریسہ غاتیٹی ءِ۔ بنجائی وزیر حوالکاری پارے کہ برجاسال بجٹ اٹ صحافی و فنکار آتا ہیلتھ انشورنس کن بھلو زر اس جتا کننگانے وخت اس کہ اولیکو وار فلم انڈسٹری کن بجٹ جتا کننگانے۔ اوپارے کہ نن سکرین ٹورازم نا کمک اٹ پاکستانی دودوربیدگ، تہذیب و تمدن ءِ مچ آ دنیا ءِ نشان تننگ خوانہ۔ مریم اورنگزیب آسٹریلیا نا سفیر ءِ نیشنل امیچور فلم فیسٹیول نا بارواٹی معلومدار کرسا پارے کہ نیشنل امیچور فلم فیسٹیول نا مسخت پاکستانی ورناتا تخلیقی لائخی تے تالان کننگ ءِ۔ اوپارے کہ زوت آتے اٹ نیشنل امیچور فلم فیسٹیول ایوارڈ نا 25 ہائی اچیورز آسٹریلیا غا روانہ مسنو۔ فلم انڈسٹری کن گام گیج آتا ذکر ءِ کرسا بنجائی وزیر حوالکاری پارے کہ حکومت 2 ارب روپئی نا خڑچ آں فلم فنانس فنڈ اس جوڑ کرینے، فلم انا بشخ اٹی بھاز انگا آسودہی تننگانے، حکومت فلم، ڈاکومینٹری و راگ تیار کننگ آ فنڈ فراوان کیک۔ اوپارے کہ درملکی فلم ساز آتے پاکستان اٹ عکس بندی و فلم سازی نا بشخ اٹی خصوصی رعایت آتیان بایدے فائدہ ہرفر۔ بنجائی وزیر حوالکاری پارے کہ آسٹریلیا نا میڈیا پاکستان نا حالیت آتے معروضی و بے کنڈہلوک وڑاٹ رپورٹ کیک ہراستاکڑزک۔ داوخت آ سٹریلیا نا سفیر پارے کہ آسٹریلیا نا کمپنی بلوچستان اٹی ریکوڈک ڈٹ آ کاریم کننگ ءِ، ریکوڈک ڈٹ بلاشبہ پاکستان نا شونداری نا درگہ ءِ ملک۔ آسٹریلیا نا سفیر بنجائی وزیر حوالکاری نا فلم اینڈ کلچر و ملک اٹی آجوئی درشانی سلاہ نا مون آ دننگ کن کوشست آتا ستاءِ کرے۔

(اے پی پی)