کشمیریک اینو مچ آ دنیا ٹی یوم الحاق پاکستان اڈتننگ اٹی ءُ

سرینگر: کنٹرول لائن نا ہڑتوم آکنڈ و مچ آ دنیا ٹی رہینگوک کشمیریک اینو چارشنبے آ یوم الحاق پاکستان داعزم انا پوسکنی اتون اڈتننگا او بھارتی کوزہ غان آجوئی و جموں وکشمیر نا پاکستان تون پورو اوار مننگ اسکان تینا جہد ءِ برجاتخرہ۔ کشمیر میڈیا سروس نا رداٹ 19 جولائی 1947آ سرینگر نا علاقہ آبی گزر اٹی سردار محمد ابراہیم خان نا ہنکین آ مروک آ آل جموں وکشمیر مسلم کانفرنس نا دیوان اٹی کشمیری تا حقی نمائندہ غاک الحق پاکستان نا قرارداد اس امنائی وڑٹ منظور کریسر۔ دا تاریخی قرارداد اٹ پاکستان تون مذہبی، جغرافیائی، دودوربیدگی و اقتصادی قربت و لکھ آ کشمیری مسلمان تا است خواہی تا رداٹ پاکستان تون ریاست جموں و کشمیر نا الحاق نا خواست کننگانے۔ دا پیش رفت ہندا سال 14 و15 اگست آ تقسیم ہند نا ڈٹ انا رداٹ پاکستان و بھارت نا دروشم اٹ اِراوتواجہ ریاست آتا ٹہیفنگ آن کم و ود اسہ تُو مست مسوسس۔ تقسیم ہند انا ڈٹ انا رداٹ ریاست اِرا پوسکن جوڑ مروک آ ملک آتیان اسٹ اسے تون الحاق کن آجوئسر۔ کشمیری تا 19 جولائی 1947 نا فیصلہ داہیت انا پیدوارشاہدی ءِ کہ او تینا آخبت ءِ پاکستان تون وابستہ کریسر۔ اوتینا سیاسی، مذہبی، راجی، دودوربیدگی و زرگزرانی حق انا رکھ اکن پاکستان اٹ اوار مننگ نا فیصلہ کریر انتئے کہ او ہندوتا ماتحت تینا قسمت آن جوانی اٹ بلد ئسر۔ دا رد اٹ وزیراعظم نا سلاہکار امور کشمیر و گلگت بلتستان قمر زمان کائرہ پارینے کہ کشمیریک 76 سال مست سری نگر اٹی کشمیر نا پاکستان تون الحاق نا قرارداد اس منظور کریر، کشمیری الس نا است خواہی تا ڈیک داقرارداد پاکستان و کشمیر نا شتہ غاتے پین سوگو کرے، بھارت نا غیرکانودی کوزہ ٹی جموں وکشمیر نا الس تینا شہید آتے سوز ہلالی بیرک اٹ جہہ جاگہ کیک۔ یوم الحاق پاکستان نا بابت خصوصی کلہو اٹی اوپارے کہ ایماندار سید علی گیلانی نا لوز”نن پاکستانی اُن و پاکستان ننا ءِ“ پاکستان تون لازوال رشتہ غاتا ڈیک ءِ، کشمیری ورناک تینا جون تا پرواہ ءِ کپننگ آن بیدس پاکستان تون تینا مہرومریبت نا درشانی ءِ کیرہ، کشمیری الس بھارت نا غیرکانودی کوزہ ٹی جموں وکشمیر نا گلی کوچہ غاتیا پاکستانی بیرک ءِ چست کیرہ۔ قمر زمان کائرہ پارے کہ بھارت غٹ چم آتیان پد ہم پاکستان و کشمیر نا تین پہ تینی رشتہ غاتے نزور کننگ اٹ بے سہب مسنے، جہانی برادری اقوام متحدہ نا قرارداد آتیا عملدرآمد کرفسا کشمیری تے اوفتا حق خودارادیت ایتے۔

(اے پی پی)