تاریخ قلات……..اسہ جاچ اسہ تبصرہ اس             3

ڈاکٹرسلیم کرد

0

Get real time updates directly on you device, subscribe now.

دا کتاب نا ایلو باب آتیٹی بلوچ قوم و اونا بارو اٹ راستکی و ردینک، بلوچی و براہوئی بولی تا متکنی، زمانہ قدیم اٹی بلوچستان آ حکومت کروک آ سلطان آتیٹی چندر گپت موریا، اشوک اعظم، ساکا و ایلو حکمران خاہوت آتا ہیت، و اسلام نا بننگ و سرسہبیک اوار ءُ۔ کتاب نا گڈیکو باب اٹی مغل بادشاہ تا بلوچ آتتون تعلقداری و قلات نا خان تا دور تے بیان کننگانے۔

تاریخ ہرا کہ انسان نا راجی زرگزرانی سرجز آتا ڈیک مریک، دا کتاب اٹی روئے زمین آ زند انا بابت آثار قدیمہ سوشل سائنٹسٹ و علم کیمیا نا پولکار آتا آزموندہ غاتا منطقی ایسر ءِ مون آ تخسا اسہ سوچ اس پاش کننگ نا کوشست کننگانے کہ انسانی تہذیب و تمدن نا بنا راجی ساہدار اسے نا وڑ اٹ مس، ہرا فطرت ءِ تینا احساس و گرج آتا رد اٹ بیرفنگ کن جم وڑ اٹ متا ماری کرے، ہرا انسانی تہذیب و تمدن نا بنداو نا سوب جوڑ مس، ہرا وخت و زمان تون اوار اوار انسان ءِ پین فائدہ ئی ءُ زند اس تدیفنگ کن معلومداری ترسا کرے۔

داکتاب اٹی ساڑی بلوچستان نا شار ’روغان‘ و ایلو دریافت مروک آثار قدیمہ نا آرکی ٹیکچر آتا رد اٹ توڷ بش انا بابت جوان ءُ معلومداری مچ کرسا ننے اسکان سر کننگانے۔

دا کتاب نا پولکار و نوشتوک تینا کچ اٹنگا وسیلہ غاتتون ننا ڈیہہ و داٹی رہینگوک آ بندغ آتا تہذیب و تمدن ءِ تاریخ نا اودیم آ دور تے علم تاریخ نویسی نا کمک اٹ شون تننگ نا کوشست اس کرینے، ”محدودیت“ آن پیش تمسا ”وسعت“ نا کنڈ آ مونی ہننگ کن اولیکو گام ءِ ہرفینے۔

مستین نا راجی سرجز آتتون اوار زرگزرانی سرجز و ننا تہذیب و تمدن نا بنائی وڑ و ڈَول انا پٹ و پول نا کمک اٹ پد رند ءِ خلسا ننے جوان ءُ فائدہ فراوان کننگانے۔ دا رد اٹ اوفتا پٹ و پولی خواری نا بھرم سابت آن سابت نن کون آ ملاس آ طالب علم آتے کن پٹ و پول و جستجو نا کسر تے ملانو۔

گڈ سر اٹی دا کتاب نا شرفدار آ پولکار و نوشتوک نا است انا ہُب اٹ منتوار اُن، ہرا خوار کروک اجتماعی زمواری سے سر ترسا اودیم آ پٹ و پول آتے اسہ لڑ اسے ٹی خلسا بھاز نہادی ءُ دستاویز اسے نا دروشم تس۔

اومیت ءِ دا دستاویز ننا دھرتی نا تاریخ نا پولکار آتے کن پٹ و پول نا پوسکن ءُ کسر ملک۔

ہفتئی تلار

تاک: 19

09-15 May 2020

P# 06

Get real time updates directly on you device, subscribe now.

Leave A Reply

Your email address will not be published.