بلوچستان سیمسری جنگوڑو آک

اولیکو بشخ

فروری نوزدہ سد و شانزدہ نا دے تیٹی جنرل کرک پیٹرک چیف آف آرمی سٹاف ہراکہ دہلی ٹی رہینگاکہ کنے خواہفے و پرمان کرے کہ سویل دے کی ٹی فارس(ایران) نا فوجی آپریشن نا کماشی ءِ دوئی کیو۔ دن تو فارس اسہ ملک اسے نا حیثیت اٹ جنگ انا وخت آ ہچ ءُ سیاسی تعلقداری اس تختوکہ ولے اونا سویل دے ٹک نا اسہ علاقہ اس، اوغانستان و بلوچستان نا سیم آ ئسکہ ہرادے ”سرحد“ پاریرہ۔ ہراڑے چندی پاوال آ خاہوت آک رہینگارہ۔ ہراکہ تینا سرجمی اٹ آجو مننگ نا دعویدار ئسرہ۔ ہندا پاوال آک حکومت ہندوستان کن بھلو گڑتی و ڈکھ ودی کریرہ۔

جرمن و اونا دوستخواک چمبازی و دروغ نا استاد ئسرہ۔ او مدام دا کاریم ءِ تینا برجا تخاسر۔ ہندن کہ جنگ انا بنا غان ہم کیہی سال مست ہندا چم آتے تینا ہندوستان نا اسہ بشخ اسے نا باتی تے یاغی مننگ نا اومیت اٹ کریسر۔ ایہن تو ہندوستان بھاز خوشی اٹ تینا جانی و مالی کمک ءِ برطانوی راج انا مون آ پیش کریسس۔ ولدا ہم جرمن آک پک کریسر توسوسر کہ او مخلوق ءِ ننا برخلاف یاغی جوڑ کیک۔ اوفتے دا اومیت ئس کہ داڑے مخلوق ءِ ننا برخلاف یاغی کرسا ننے دے کی پارہ غان مون مستی بننگ آن توننگ اٹ سرسہب مریرہ۔

جرمن تینا دوستخواہ تا خف تے دروغ آن پر کرسا فارس و اوغانستان نا کسر اٹ زیات آن زیات ہندوستان آ راہی کننگ ئسکہ۔ اوغانستان ہم فارس آنبار بیرہ پن انا بے کنڈ ہلوک ئس۔ بھاز وخت آ ترند انگا جلہو آتیٹ تینا بے کنڈ ہلنگ نا خلاف ورزی ءِ کرسا ئس۔ جرمن نا دوستخواہ تے تینا ہَد و اویل آن گدرینگ انگ نا وخت آ ہمو مچ آ آسراتی تے تسکہ اخس کہ اونا وس مسکہ۔ جرمن نا دوستخواک اوغانستان آن پنجاب اٹی پترینگارہ۔

اوغانستان اسکان سرمننگ کن جرمن نا دوستخواہ تے ہر حال اٹی فارس نا گڑاس علاقہ غاتیان گدرینگوئی تماکہ۔ فارس نا حکومت نا پارہ غان انگریز و جرمن آتے ہن بر آ ہچ ءُ بندشت اس الوکہ۔ جرمن دا وارخواہی آن جوان فائدہ ہرفسا ئس۔ نقشہ غا اسہ وار ہُننگ آن سماتمک کہ پاش وڑ اٹ اوفتیکن آسان انگا کسر قطبی روس انا واکداری والا علاقہ ئس۔

ہندن اوفک خراسان، و اوکان اوغانستان آن روس اٹی پترینگارہ۔ اگہ داٹی سرسہب متوسہ گڑا قطبی پارہ نا کسر اٹ ہنارہ ہراکہ بھاز مرُ تماکہ۔ دا کسر اٹ اوفک ”صحرائے لوط“ آن گدرینگسا بیرجند نا پارہ غا پیش تمارہ۔ داٹی ہچ ءُ شک اس اف کہ جرمن والاک ہڑدوسر آ کسر تے ٹی ہن بر کریسر، ولے اوفتے گیشتری سرسہبی دو بتویسس۔ دانا سوب دا ئس کہ کسر بھاز کھڈ بینٹ و دم دریفوک ئسکہ، و ہمو جاگہ نا بندغ آک ہم بے لیاز ئسرہ ہراکان کہ جرمن آتے گدرینگوئی ئسکہ۔ و دا ہمو اختلاف ئس ہراناکہ اوفتے ہرات نا دنگ و سیم انا ہزارہ قبیلہ تون مون تروئی تماکہ۔ ہرافتا تعلقداری مسلمان آتا شیعہ فرقہ غان ئسکہ، و اوفک اوغان تا سنی فرقہ غان بھاز بد دریرہ۔

جرمن آتے داڑان چَپ پین کسر اس پٹوئی تما، ہراٹی کہ اوفک مُر سویل نا پارہ غان سرسہب مسر۔ دا مرغن انگا کسر اٹ ہنسا اوفتے کرمان نماشیر نا علاقہ غاتیان گدرینگسا سویلی و سہیل دے ٹکی فارس آن اوغانستان اٹی آسانی اٹ پترینگ نا وار رسینگاکہ۔

تینا دا ہن بر نا کسر ءِ سرسہب و رکھوک تخنگ نا سوب آن جرمن آتے کن دا المی مس کہ سیم سر نا پاوال و جنگوڑو آ بلوچ قبیلہ غاتتون جوان ءُ تعلقداری اس جوڑ کیر۔ دن تو دا قبیلہ غاتا داڑان مست انگریز آتتون تعلقداریک بھاز جوان مسوسُر۔ ولے جرمن آک اوفتے بھلو بھلو مال مڈی تسر و اوفتے دا باور کرفیر کہ جرمن آک مسلمان مسنو۔ و قصر ولیم اوفتا مذہب ءِ قبول کرینے۔ سیمسر نا دا پاوال آ قبیلہ غاک ہر وخت تین کن جوان انگا گڑا تا خواہندار ئسرہ۔ جرمن آتا دا دروغ ءِ کہ جرمن آک مسلمان مسنو، اوفک راست تکار، و بھروسہ کریر۔ و دا وڑ اٹ جرمن آتتون کمک آ امنا کریر۔ او نئے بیرہ جرمن آتے تینا علاقہ غان بلکہ انگریز آتا مچٹ انگا سیم سری چوکی تا نیام اٹ ہنبر نا کسر تے دانگ اینگ کریر ہراکہ مہالو آن کم ئسرہ۔

جرمن آتا مسلمان مننگ نا کِسہ اگہ کہ ملنڈ اس ئس، ولے ہندوستان اٹی نن کن بھلو خطرہ اس جوڑ مسکہ۔ دا یات سلے کہ جرمنی نا دوستخواہ ترکی مسلمان ئس۔ و داکہ ہندوستان نا مسلمان آتے دا پاننگا کہ نم جرمنی نا برخلاف انگریز تون کمک کرسا تینا مسلمان تا برخلاف جنگ کننگ اُرے۔ داڑان بیدس ہندوستانی تے داہم باور کرفنگاسس کہ جرمن اسہ زوراور اسے، اوجنگ ءِ کٹک۔ جنگ انا ہر پڑ اٹی جرمن نا دوستخواک دا ہیت ءِ کرسا کریرہ۔ ہندن لگاکہ کہ اوفتا دا ہوکا تیان بروک آدے تیٹی ننا ہندوستان اٹی وفاداری ءِ نسخان رسینگاکہ۔

گڑا نن کن دا المی مس کہ نن اوفتا دا دروغ، فریب و ہوکا ءِ توننگ کن اولیکو گام نا وڑ اٹ جرمن نا دوستخوا تے ہندوستان اٹی پترینگ انگ آن تورن۔ گڑا نن کن دا المی ئس کہ نن سیم سر آ رہینگوک آ پاوال بلوچ قبیلہ غاتتون انگریز آتا مست انا سنگتی ءِ سوگو کین۔ دا کاریم کن کنے جنرل کرک پیٹرک نا پارہ غان پرمان رسینگا و کنے دا پاننگا کہ اسہ ساہت اس ہم ہرے کپہ، و زو اس کوئٹہ نا پارہ غا رادہ مر۔ ہراڑے نے دا بارو اٹ سرجمی اٹ پہہ کننگو ءِ۔

ای جنرل کرک پیٹرک ءِ موکل کریٹ۔ تینا گاڈی ٹی ہمو جہی آ ڈیور تون اوار زو اس ریل انا ٹیسن آ سر مسٹ۔ تین کن ریل انا اسہ جتا ءُ ڈبہ اسے نا خواست کریٹ، تانکہ اوٹی تینا گاڈی ءِ سوار کیو، و نوشکے نا پارہ غا راہی کیو تے۔ ٹیسن ماسٹر کنے جواب کرے وپارے کہ نی ہندن ءُ خواست اس کننگ اُس ہرا کہ ہچ ءُ وڑ اسے ٹی پورو مفک۔ مہاراجہ اس ہمو ریل اٹی سفر کریکہ، کل ءِ ڈبہ غاتے مہالو آن تینا سامان و گاڈی تے کن دوئی کریسس۔ ای اوفتے دا پاریٹ کہ کنے سرکار اسہ بھاز المی ءُ کاریم اسے کن راہی کننگ اٹی ءِ، مڑوئی زرس ہیت و گپ آن گڈ ای پنڈی نا پارہ غا راہی مسٹ، و تینا گاڈی ءِ نوشکے آ راہی کریٹ۔

پنڈی آ ہرا وخت ای سر مسٹ گڑا ریل انا سر ہلنگ آن بیرہ اسہ گھنٹہ اس ئسکہ، کنے دا زو اس فیصلہ کروئی ئس کہ ای تینا گڑا تے ہرفو یا اِلو، ای ہندن ءُ کاریم اسے ٹی ہننگ اُٹ ہراڑے کنے ہفتہ اس لگے، مننگ کیک تُو اس، یا معاملہ سیاسی حالیت نا پارہ غا کاہے۔ گڑا تے چانڑ کننگ کن کن تون وخت اَلو۔ ہندا سوب آن ای تینا نوکر اللہ داد ءِ پاریٹ کہ او کل گڑاتے تین تون اتے۔ ہرا وخت وار ملا، ہموڑے تینا گرج انا گڑا تے ایلو گڑاتیان جتا کینہ۔ ای زو اس جنرل سر گیرالڈ کٹ سن نا پارہ غا ہناٹ، کہ راہی مننگ آن مست اوڑتون معاملہ غاتے سر ایتو۔

ای خیال کریٹ کہ بروک آ دے تیٹی کنا کاریم اٹ گاڈی نا اسہ بھلو کڑ د اس ارے۔ اسہ ہندن ءُ علاقہ اسے ٹی ہراڑے ریل اف، سڑک اف، اوڑے کنے مرغن ءُ سفر اس کروئی ءِ۔ ہراڑے جوان انگا کسر ہم ریک آتے ٹی ءِ، بٹ آک ءُ، و ہراڑے مخلوق ہچ آتیا سفر کیک۔ اسہ بے آزموندہ ءُ ڈیور اسے نا وس اٹی اف کہ اوڑے او گاڈی چلیفے۔

ہفتئی تلار

تاک:26

08-16 جولائی 2023ء

پنہ:2