زیبا غا مکران۔۔۔۔۔سیل و چکر۔۔۔۔۔۔۔(3)

پنجگور تینا الار و اِلار نا باغ آتا بابت پنی ءِ۔ دا جاگہ نا مخلوق بھلو بھلو حویلی تین کن جوڑ کرینے، ہرافتیٹی الار نا باغ آک ءُ۔ داڑے اِلار نادرزن اسے نا کچ وڑک مریرہ۔ اسہ ٹی وی چینل اسے نا معلومداری نا رداٹ ”پنجگور ایشیا ٹی اِلار نا پیداوار کن ششمیکو نمبر آٹے۔“ ولے ولدا ہم جہانی مارکیٹ اسکان دافتے سر کننگ کن حکومت نا پارہ غان ہچ ءُ خاص ءُ بست و بند اس اف۔ ہندا سوب آن بھلو کچ اسیٹ اِلارک زیان مریرہ۔ دا جاگہ نا بھلا ٹیکی اِلار ءِ و بروک ہنوک آک تین تون داکان بھلو کچ اسیٹ گچین آ وڑ انا اِلار دیرہ۔

ہراتم نن پنجگور آ سر مسن تو سڑک نا راستیکو پارہ غا اِلار نا اسہ بھلو باغ اس خنان۔ و ننا چپیکو پارہ غا سڑک آ اسہ بھلو بورڈ اس خلوک ئس، ہراڑا ”پنجگور کیڈٹ کالج“ نوشتہ ئس۔

نن تینا مہماندار صدر الخدمت فاؤنڈیشن پنجگور مولانا نور محمد مدنی تون پنجگور شار ءِ سر مننگ آن زرہ اس مُست حالی حوالی مسن، و تینا سر مننگ نا پارین تے۔ او ننا مون آ ہمو جاگہ نا اسہ سنگت اسے مون تسوسُس…… ہرا جاگہ غا نن سلیسُن ہمو سنگت ننے آن زرہ اس مون آ تینا گاڑی ءِ سلفیسس، او تینٹ سلوک ئس۔ سر مننگ تون ای گاڈی آن دڑنگاٹ و ہناٹ اوڑ تون ملاٹ، و مونی سفر نا ارفیٹ۔ او تینا گاڈی ءِ شار انا پارہ غا ہڑسا و نن اونا رندءِ ہلکن …… داڑان مُست ہم پنجگور آ بننگ وخت آ یا دا وار تینا مہماندار آتا گاڈی نا رند اٹ ہنسا پنجگور نا بھلا بازار ءِ سیل کرسا کرین۔

شار اٹی سر مننگ نا بھلا کسر ہندا اسٹ ءِ…… و دا سڑک نا ہڑتوم آ پارہ غا داسہ سڑک آ چندی گڑا تا کچہ و نیم پکا انگا دکانک جوڑ ءُ…… جاگہ جاگہ غان دا بازار اٹی بننگ کن شار انا چندی گلی و کوچہ غاتیان کسرک بریرہ…… سر مننگ آ نن دا گمان کرین کہ بس داسہ منہ ساہت اٹی دا بازار ایسر مرو، و نن تینا مزل آ سر مرون…… ولے دا گمان ہموتم اسُل غلط مس ہراتم دا مرغن آ و سیدھا غا کسر بھاز مُر اسکان ہنا، و ایسری نا پن ءِ ہلنگ اٹی الو…… سڑک مرغن ءِ، و دارہ ایرہ غان تے آبادیک ہم اریر، ہندا سوب آن داڑے گڑاس اسکول و سرکاری دفتر ہم خننگرہ…… پنجگور آ سر مننگ آن پد ہم تینا مزل اسکان سر مننگ کن نیم کلاک اس پین سفر کروئی مریک…… و نن تون ہم ہندا مس…… کنے دا پاننگتویسس کہ ننا اینو نا رہینگ انگ نا بست و بند ہراڑکن ءِ…… اؤ اسہ بھلو سفر اسے آن پد نن شار آن پیش تمان و مُر اسہ خلق اسیٹی سر مسن…… سر مننگ آ معلوم مس کہ دا ”تبلیغی مرکز“ اسے۔ و دا مفتی آصف بلوچ نا دوٹی ءِ، و اونا اُرا ہندا مرکز نا خڑک آٹے۔ ہراڑے او تینا خاہوت تون رہینگک…… دن کہ مُست ای پاریٹ کہ مچ آ بلوچستان اٹی نرینہ و نیاڑی تا توڷ بش و کُننگ بیننگ اسُل جتا جتا جاگہ غاتیا مریک…… داڑے ہم نن ہراتم مرکز نا خڑک آ اُرا غا سر مسن و درگہ نا پیشن آ گاڈی تے سلفین…… کن تون چنا نیاڑیک ئسر اوفک اُراٹی ہنار و ای و ہمو ننے اتوک آ سنگت پیشن آ سلیسن…… دا ہیت یات سلے کہ ہرا اُرا ٹی کن تون بروک آ چنا نیاڑیک ہنار، اوفتا دا اُرا والاتتون مُست آن ہچ ءُ درستی راستی و ملاقات اس الو۔ و اوفتا دا اولیکو وار ئس کہ داڑے بسوسُر…… ہنداڑتون ای اسہ ہیت اس ضرور پاو کہ داجاگہ نا اُرا تا روایت آتیان معلومداری دوئی مرے۔

داسہ دا مچ آ ہیت آتا پد اٹ مولانا نور محمد مدنی خننگتوکہ…… ارفنگ آ خبر تما کہ او پنجگور شار انا عالم آتا کمیٹی تون اسہ جھیڑہ اسے کن جرگہ اسیٹی ہنانے، ہندا سوب آن او داڑے حاضر مننگ کپک بلکہ کنے ہم ہموڑے ہنوئی ءِ۔

سردار ظفر اللہ گچکی و عالم آتا کچاری:۔

ای و مفتی آصف بلوچ شار انا آبادی تیان مچے مون آ پیش تمان تو اسہ بھلو اُرا اسے خنان، ہرانا پدانا دیوال آتیان دا خبر تما کہ دا اسہ بھلو بااثر ءُ بندغ اسے نا اُرا ءِ۔۔ تہٹی ہننگ تون خبر تما کہ دا سردار ظفر اللہ گچکی نا اُراءِ۔ ہراڑے او وخت وخت اس بریک کاہک۔ اُرابھاز زیبدار ئس، و اسہ بھلو شار اسے نا پوسکن آ اُراتیانبار ئس، و کم و وَد ہر آسراتی اوڑے ئس۔

ہراتم نن اُرا ٹی پیہان تو اسہ زبیدار ءُ بھلو وتاخ اسیٹی ننے دریر۔ ہراڑے زند انا چندی بشخ آتیان تعلقداری تخوک عالم آک سردار ظفر اللہ گچکی تون تولوک ئسُر۔ مفتی صاحب ءِ خننگ تون کل اونا مون آ بش مسر و اوڑتون بغل کشی کریر، و نن اسٹ ایلوءِ بخیر کرین۔ و نن ہم ہندا مجلس اٹی توسُن۔ داڑے اسہ جھیڑہ اسے نا ایسری کن ہیت و گپ مننگ اٹی ئس۔ جٹ و دم اسے نا حال حوال آن پد دا ہیت و گپ ولدا بنا مس۔ کنا چاہنداری ءِ ہم صدر الخدمت فاؤنڈیشن بلوچستان نا حیثیت اٹ کننگا۔ ہراڑا سردار صاحب کن تون مخاطب مس و مچے ہیت و گپ کرے۔ ہندا ہیت و گپ اٹی خبر تما کہ او کنا ایماندار اِلہ میر عید محمد نا سنگت آتیان مسنے۔ ہندا سوب آن ہراتم نن موکل ہلکن تو سردار ظفر اللہ گچکی خاص وڑ اٹ دعوت و رہینگ انگ نا سلہ خلک ننے۔ ولے اینو ای مولانا نور محمد مفتی نا مہمان ئسٹ ہندا سوب آن اوڑان بشخنداری خواہسٹ۔

پنجگو رشار اٹی اگہ دے آن کس برے تو چندی جاگہ غاتیا مسیت و مدرسہ غاک خننگرہ۔ و داجاگہ نا سڑک آتیا بھلو کچ اسیٹی مدرسہ غاتا خوانوک آ طالب آک ہرافتا کاٹم آ پیہن ءُ ٹوپ و کوپہ غاتیا خیری خننگک…… دا آزموندہ دن کہ کنے مُست آن ئس۔ مولانا نور محمد آن ارفنگ آن خبر تما کہ پنجگور اٹی 50 غان زیات چنکو بھلو مسیت و 40 انا کچ مدرسہ ءُ۔ ہرافک عرب ملک و کراچی نا مخلوق نا زکوٰۃ و خیرات آ چلینگرہ۔

ارٹمیکو ہیت ہرا مولانا صاحب آن خبر تما او دا ئس کہ پنجگور اٹی چندی ٹک آتا عالم آتا نیام اٹی اسٹ ایلوڑکن بھاز عزت و شرف انا تعلقداری اسے۔ و اوفک تین پہ تین تون ایلمی اٹ رہینگرہ۔ باور کیرے کہ دا اسہ بھاز بھلو جوان ءُ ہیت اسے، داڑان بیدس مسٹمیکو حیران کروک آ ہیت دا کہ داڑے مچ آ پنجگور اٹی شیعہ و بریلوی تا ہچ ءُ امام بارگاہ و مسیت اف۔

پنجگور اٹی مہمانی:۔

سردار ظفر اللہ گچکی آن موکل کرین، موکل آن پد نن مولانا نور محمد نا مدرسہ ”اُم القرآن“ آ بسن۔ دا مدرسہ 2007ء اٹی جوڑ کننگا، و داٹی ناظرہ و حافظی نا کلاس آتیان بیدس درس نظامی نا ہم گڑاس کلاس آک مریرہ۔ مدرسہ نا تہٹی رہینگ انگ نا بھلو ہال اسے، ہراٹی عالم آتا رہینگ انگ نا بست و بند ءِ۔ مہمان خانہ و مدرسہ اسُل خڑک پہ خڑک ءُ۔ داڑان بیدس مدرسہ ناحویلی ٹی اسہ اِرا ڈاکہ نابھلو مسیت اس ہم ارے۔ ہراڑے شار انا مخلوق بریک تینا نمازآتے خوانک…… ہرا نن ننا مہمانی ئس اوڑکن نن مولانا نا مدرسہ غا بسن۔ مدرسہ نا حویلی نا اخیر اٹی اسہ ٹینٹ اس خلنگاسُس، ہرانا پد آ ن تولنگ کن جوان ءُ بست و بند اس کننگاسُس۔ ای و مفتی آصف بلوچ ہموڑے ہنان توسُن۔ مولانا دن کہ مدینہ منورہ غان خوانانے بسنے۔ ہندا سوب آن اونا مہمانی ٹی ہم گڑاس ہمو جاگہ نا وڑ تا رد اٹ بست و بند کننگاسُس۔ ننا اسُل مون آن پوغ تیا اسہ ہیٹ اس بسنگ اٹی ئسُر۔ پیشن تولنگ نا سوب آن ننے مچے یخ کننگ اٹی ئس۔ ولے دا پوغ تا رہی آ تولنگ آن پد، گپ شپ و مولانا صاحب نا جوزہ نا سوب آن یخ انا درک لگتو۔ جٹ دم اسے آن پد مچ آ ہیٹ ننا مون آ تخنگا۔ برنج ہم کریسُر۔ داڑان بیدس کندوری آ انت اس کہ تخوئی ئس اوفک تخنگار…… کندوری آ گڑا تا تخنگ آن پد نن مونی مسن و جوان سیر آ اِرغ کُنگن۔ ارغ آن پد مدرسہ نا اسہ طالب اسے آن قہوہ چا انا فرمائش کننگا، او خوش مرسا دا فرمائش آ مجلس کن چا اس تیار کرے۔ انتئے کہ ای طالب ءِ خناٹ کہ چا اٹی بھاز بورہ شاغا، ہندا سوب آن ای چا کننگ آن بشخنداری خواہسٹ۔ ولے مجلس نا پاننگ آ اسہ پیالہ اس تینا مون آ تخاٹ۔ ولے دا چا داخس چس کرے کہ اسٹ آخا اِرٹ آخا بلکہ پورو مسہ پیالہ کنگٹ۔ داخس مزئی ءُ چا دا خلق آتا چا انا نشانی ءِ یا مننگ کیک پاٹ آ مروک آ یا بسنگوک آ ہر گڑا ہنداخس مزئی مریک۔ ای اِرغ ہم بھاز کنگسٹ ہندا سوب آن دا ہرمسٹ آ پیالہ چا انا کننگ آن طب جوان مس۔ چا و ہندا نیام اٹی گپ شپ نا دور چلینگا۔ و ہندن دا مجلس تینا ایسری آ سر مس۔ و نن خاچنگ کن تینا جاگہ غاتیا ہنان۔

کنا خاہوت دن کہ مفتی آصف بلوچ نا اُراٹی ئس۔ ہندا سوب آن مفتی صاحب کنے ہم تین تون تینا اُراٹی درے۔ ننے رہینگ انگ کن اسہ گچین و زیبدار ءُ کمرہ اس تننگا، ای بیٹھک نا تہہ آن دا کمرہ ٹی بسٹ ہراڑے کنا اُرا نا بندغ آک ئسُر۔ و مفتی آصف بلوچ اُرانا بھلا درگہ غان تینا خاہوت آ ہنا۔

کنے دا ہیت انا خلیس ئس کہ اولیکو وار سفر و داخس مُری آ پنجگور اٹی اسہ نادرست ءُ اُرا سیٹی کنا خاہوت نا بندغ آک بور مرور۔ یا اوفتے پین فریشانی اس مرو۔ انتئے کہ اوفک داڑے اولیکو وار بسوسُر بیگانہ مننگ نا احسا س مرو۔ ولے اوفتے خننگ تون کنا کل گمانک غلط مسر انتئے کہ اوفک بھاز خوش و اوفتا مونک ملوک ئسر، و کنے ارفنگ نا گرج متو۔ اوفک اُرا ٹی جوان اسٹ ایلوڑتون مشغول مسوسُر۔

(برجا ءِ)

ہفتئی تلار
تاک:40
29-23 اکتوبر 2021ء
پنہ: 05