قلات اٹ شونداری کاریم تا شفافیت کن مانیٹرنگ کننگک، ضیاء لانگو

کوئٹہ (خ ن) صوبائی وزیر داخلہ میر ضیاء اللہ لانگو پارینے کہ محکمہ مواصلات و تعمیرات صوبہ ٹی شونداری ڈٹ و خاص کر ضلع قلات اٹ برجا انگا شونداری اسکیم تا نگرانی ءِ کننگ اٹی ءِ، او محکمہ مواصلات و تعمیرات نا کڑد انا ستا ءِ کرسا پارینے کہ سیکرٹری مواصلات و تعمیرات نا خاص ءُ اُست خواہی سے نا سوب آن قلات و ایلو علاقہ غاتیٹی برجا انگا شونداری ڈٹ آک پورو مننگ اٹی ءُ، ہرانا فائدہ براہ راست اُلس ءِ رسینگک۔ داکان جاری مروک ءُ اسہ بیان اسے ٹی او پارینے کہ قلات اٹ شونداری ڈٹ آتیٹی سفائی و فنڈ آتا جوان کاریم اٹ اتنگ ءِ پک کننگ کن سخت مانیٹرنگ کننگک۔ ڈیولپمنٹ پیکیج نا  نگرانی کن جوان ءُ میکانزم اس تشکیل تننگانے۔ وزیر داخلہ ڈٹ آتا سخت مانیٹرنگ نا میکانزم آ من وعن عملدرآمد کننگ کن ہمو کمامدار آتے پارت کرسا پارینے کہ شونداری ڈٹ آتون اوار ڈیولپمنٹ پیکیج آ مروک آ کاریم آن ہڑدے نا بنداو آ معلومدار کننگے۔ مچ آ صوبہ ٹی فلاح عامہ نا پروجیکٹ آتا جوان آب ءِ پک کننگے و شونداری ڈٹ آتیٹی شونداری کاریم تا کوالٹی آ ہچ ءُ سمجھوتہ اس کننگپک۔ او پارینے کہ بڑزکو آب آن اُلس نا پیسہ نا جوان کاریم اٹ اتنگ ءِ پک کننگک، صوبہ نا اُلس نا وسیلہ غاتا امین مریک،  کس اسے وسیلہ غاتے زیان کننگ کن ہلیپنہ۔ او پارینے کہ ڈٹ آتیا فنڈ آتا جوان و ساف وڑاٹ کاریم اٹ اتنگ ءِ میکانزم نا نگرانی ءِ تینٹ کیوہ و شونداری ڈٹ آتیٹی  اُرے کننگ و ڈیوالئی تے سگنگ کپنہ۔  وزیر داخلہ پارت کرے کہ شونداری ویل آتا بابت اُلس نا غاو تا زوت اس عمل کننگ المی ءِ، اُلس نا آسراتی تا ہچ ءُ پروجیکٹ اسے ٹی اُرے کننگ ویل اسے و ای تینا اُلس ءِ تکلیف و ویل آتا گواچنی ءِ خننگ آن خوش مننگ کپرہ۔