وزیر اعلیٰ پنجاب و بلوچستان نا پشین نا دورہ

پشین (خ ن) وزیراعلیٰ پنجاب سردار محمد عثمان بزدار وزیراعلیٰ بلوچستان جام کمال خان تون اوار پشین نا دورہ ءِ کرے، صوبائی وزیر تیان میر ضیاء لانگو، میر ظہور احمد بلیدی، میر محمد خان لہڑی، قومی اسمبلی نا باسک عمر مگسی، پارلیمانی سیکرٹری گودی بشریٰ رند و گودی ماہ جبین شیران ہم اوڑتون اوار ئس، پشین ءِ سر مننگ آ وزیراعلیٰ پنجاب ءِ جوان وڑاٹ بیا بخیر کننگا و اونا اعزاز اٹ دود اس اڈ تننگا ہراٹی قبائلی وسیاسی کمامدار آتون اوار زند انا جتا جتا بشخ آتیان تعلق تخوک آ بندغ آک بشخ ہلکر، وزیراعلیٰ بلوچستان وزیراعلیٰ پنجاب ءِ دستار اس بیرفے وخت اس کہ بی اے پی انا راہشون اسفندیار کاکڑ وزیراعلیٰ بلوچستان ءِ دستار اس بیرفے، او وخت آ وزیراعلیٰ پنجاب حکومت پنجاب نا کنڈآن تربت اٹ سد بیڈ انا ہسپتال نا جوڑ کننگ کن 75کروڑ روپئی و تفتان اٹ زائرین تا کمپلیکس نا جوڑ کننگ کن 25کروڑ روپئی نا چیک اس پیش کرے۔ وزیراعلیٰ بلوچستان اہم انگا ڈٹ آتا جوڑ کننگ کن کمک کننگ آ وزیراعلیٰ پنجاب نا منتواری ءِ ہرفے۔ اوکان گڈ وزیراعلیٰ پنجاب تون پشین نا جتاجتا ڈل آک اوڑدہی کریر و اونا پشین آ بننگ آ اونا منتواری ءِ ہرفیر۔