کورونا….! نے خدا خلے  (چیئرمین منظور بلوچ نا یات اٹ)

وحید زہیر

0

Get real time updates directly on you device, subscribe now.

کورونا نا پن اٹ عجب ءُ، پنی ءُ، ہنین و گچین ءُ بندغ ننے آن جتا مننگ اٹی ءُ۔ بلوچ مست آن لائخ، و قوم اکن جوان ٹک خلوک آ بندغ آتا کمبوتی نا ڈکھ ویل آتیان گدرینگ انگ اٹی ءِ۔ کورونا نا ظلم کہ او ہم ننا مہروان آتے جتا کننگ کن تینے لانچانے۔ چیئرمین منظور بلوچ ہمو دُر سفت آ بندغ آتیان اسٹ ئس، ہرانا بشخندہ اونا ادب و قوم دوستی وخت اس ہم گیرام مفک۔ مستونگ اٹی ہرا ادبی آ کچاری یا دیوان ئس کہ اوٹی او ساڑی متوکہ۔ ہر دیوان و کچاری ٹی تولوک شاعر و ادیب آتے بنگکہ۔ مستونگ آن پیشن بروک آادیب دوست آتے شرف تسکہ، وخت اس تینا سیاسی و قبائلی تعلقداری ءِ بڑز تکتوکہ، دن کہ بھاز انگا سیاسی پارٹی تیان تعلقدار آک دن انگا دیوان و کچاری تیٹی تینے بڑز تکرہ۔ سیال و سیالداری ٹی ہم کمال نا خواجہ و لائخ ءُ بندغ اس ئسکہ۔ چندی کچاری تیٹی سانگ برام و خیر انا مچی تیٹی اوڑتون ہت و گپ مسکہ۔ مجال ئس کہ او نے ہیت اکن الیپروسس، بلکن مدام کوشست کریکہ کہ مون انا بندغ ءِ بنو۔ و جوان بنو، گڑا ورندی ایتو، یا ہیت و گپ ءِ ہنین و گچین مستی دیو۔

داکمال اسہ جوان ءُ کماش و راہشون اسے نا مریک، ولے دن انگا کمال تخوک آتے یا تو سرکار نا نظر لگک، یا جاہل آ بندغ آتا۔ ہرا دا ڈغار نا خرن مننگ و بندغ آتا شون ہلنگ نا برخلاف ءُ۔ منظور پین ہچ کتنے، سیاست اٹی سگ و برداشت نا جوان ءُ کسر اسے نا درشانی ءِ کرینے۔ تین پہ تین نا جنگ و جھیڑہ غاتے کٹفنگ نا جہد و است خواہی نا فلسفہ ءِ پاش کرسا ہنانے۔ اونا مہر آتا بھلا شاہدی اوڑتون لس مخلوق نا مہر ئسکہ۔ گچین کاری تیٹی دن ءُ بندغ اس اَلو کہ اونا با غا منظور جان اَلو۔ دا نظام نا گواچی بندغ آک ہم چندی وار دا ہیت ءِ پاش کریر کہ ننے منظور جان دوست ءِ، ولے امر کین سردار و مُلا نا قسم نا مون آ آہری اُن۔ شوم انگا قبائلی زمزیر آتیٹی تفوک اُن۔ ولدا ہم چندیک ملا و سردار نا قسم ءِ پرغار۔ قبائلی شوم انگا دود آتے کسر تتوس۔ و منظور جان گچین کاری تیٹی بھلو وونٹ اس ہلک۔ ولے ہمو نظام ہرا کہ ننا شعور آ بومب آنبار لچوک ءِ، ہمو نظام نا لغام آک ہراکان سررہ، او ہم خرما سے آن کم زوراکی تخپسہ۔ نم تینٹ فیصلہ کبو، دا لائخ آ ورنا نا مون اٹ سرسہب مروک آک اخہ در لائخی تخرہ۔ دا بے انصافی کل آ پاش ءِ۔ ولے ولدا ہم منظور جان دا بے بخت آ جمہوریت ءِ بختاور کننگ کن تینا بشخندہ ءِ یلہ کتو۔ تینا وطن دوستی ءِ پدی بٹتو۔ تینا پارٹی ءِ چنکو نف اسے کن بدل کتو۔ ادب و دانش نا سنگتی آن دُو تے ہرفتو۔ چیئرمین منظور بلوچ عملی ءُ بندغ اس ئسکہ۔ عملی وڑ کاریم کننگ آ باور کریکہ۔ عملی وڑ دوستی تے سوگو کننگ نا ایمان نا کچ اسکان تینا قول آ سلوک خننگاکہ۔ اے وخت کہ نن منظور جان ءِ اونا کورونا نا شہادت آن پد پہہ مرین۔ کنے یخین ءِ کہ اگہ اودے کورونا ننے آن درے، تو شوم انگا کورونا ہم ننا نظام آنبار روادار اف کہ کس کس اتون است خواہی کے۔ کس کس انا ویل آتے مُر کننگ کن اوفتا نیام اٹی تولے، کس انا کاریم اسے کن پد و رند خلے۔ کورونا یا کورونائی آ نظام نا ڈکھ آک اسہ وڑ ءُ۔ ہڑتوم آتیان تینے بچفنگ کن سدھ و سنبھال المی ءِ۔ ہڑتوم آتے شرمندہ کننگ کن منظور جان نا وڑ اٹ اخلاقی جہد و کوشست بکار ءِ۔ نظریاتی سنگت آتتون مخلصی بکار ءِ۔ مرک اسکان تینا لائخی تتون ملوک آ پیشانی تون سلوک مننگ بکار ءِ۔ دروغ و منافقت آ نت تخنگ بکار ءِ۔ تینا راست اتون ہر جاگہ غا تُوبے آنبار پاش مننگ المی ءِ۔ منظور بلوچ ایم پی اے، ایم این اے، وزیر اس تو جوڑ متو، ولے چندی ایم پی اے، ایم این اے وزیر تیان زیات شرف تخاکہ۔ مستونگ نا پنی آ سیاستدان، میر عبدالعزیز کرد، عبدالرحیم خواجہ خیل، ملک فیض یوسفزئی و ایلو شرف نا خواجہ غاتیانبار قوم دوستی نا لڑ و بند اٹی تینا لائخی تتون تینے گوفے ہنا۔ ہراتم مستونگ نا شرفدار آتا ہیت مرو ءِ، اوٹی منظور جان نا پن ہم اوار مرو ءِ۔ بلکن تینا وخت و زمانہ نا سختی سوری تیٹی، قوم انا لس بے سیوتی ءِ کٹفنگ اٹی اونا کچ و قدر زیات مرو ءِ۔ اومیت ءِ منظور نا جہد و کوشست ءِ ورناک مثال جوڑ کرسا تینا صوبہ و علاقہ ٹی امن و ایمنی نا نہال کاری ءِ مستی درور۔ منظور بلوچ تینا زند اٹی کس آن ہچ ءُ گڑاس خواتو، بیرہ اگہ او خواستگار ئسکہ تو اسٹ ایلوڑتون مہر و مریبت نا خواستگار ئس۔ قوم انا شون ہلنگ نا نن و دے تغ تے خناکہ، سیاست اٹی سگ و برداشت نا حق اٹی ئسکہ۔ علم و دانش، ادب و زبان دوستی ءِ قبول کننگ نا کسر آ راہی روان مننگ ءِ المی تکاکہ۔ چیئرمین منظور نا قبر ءِ رب باری تعالیٰ روشن تخے۔ اونا تغ تے گچین ءُ تعبیر ایتے۔ کورونائی نظام نا بیخ و بنچخ ءِ کٹفے، تاکہ قربانی تا بھرم بروک آ نسل نا نصیب جوڑ مرے۔

ہفتئی تلار،

تاک25

27 June 2020

پنہ، 1

Get real time updates directly on you device, subscribe now.

Leave A Reply

Your email address will not be published.