پُوت انا پُو(افسانہ)۔

نور پرکانی

0

Get real time updates directly on you device, subscribe now.

 

بڈھل پیر انا میدانی آ اینو وا بیش تا گو ئسکہ…… مَون پیہن خرمشی آ بیش تے چنکا سُبک انگا ریڑھی تے ٹی ڈُک کریسر۔ بیش تا زی آ رنگ رنگی آ پھل لاڑو رلیک داسکان شاغوک ئسر۔ میدانی ٹی مخلوق دُن بھاز ئس کہ جاگہ ہلتوسہ……دافتیٹی سیل کروک ءُ کزان بندغ ئس، کل جواگرک ئسر۔ ہرافک بیش تیا پیسہ خلکرہ……

تونگو ہم دا مُچی ٹی ساڑی ئس…… دا میدانی آ دُن ءُ میلہ اس اَلو کہ اوٹی تونگو ساڑی مف…… او بیمار آ جان اتون ہم تینے رسیفیکہ…… مُست او میر جوشی نا بیش تے دُدیفیکہ…… ولے اسہ گو اسے ٹی او ریڑا غان تما کیرغ بس تو دُو تے پنا…… دُو تے سہی بند ہلتو بے سیک کمزور سلیس…… بیش تا گو تس اوڑان سلیس…… انتئے کہ بیش نا واگ آتتون اوار تینے توننگ طاقت اس خواہسکہ…… میر جوشی اودے کشا پین گوتوک اس تخا…… داسہ او بیروزگار ئسکہ……  

تونگو ہم جواگر اس مس بھاز کٹا بھاز چٹا…… اینو اوڑتون جوا باسنگ کن ٹیڈی اس ہم اَلو کہ او کس اتون شڑت باسوسس…… دا عادت اٹی اونا پُٹ پُٹ وامدار ئس…… کس اوڑتون شڑت خلتوکہ…… ولے او اسٹ عادت آن مجبور ئس…… ایلو ہراڑے گوہاسس ہموڑے پٹنگ نا کوشست اٹی ئس کہ نوا مُست آنبار بیدار آ قسمت خاچوک آ قسمت نا خف اٹی ہلے جِک کے تے……

گو انا وخت داسہ خُڑک ئس…… شڑت باسنگ آک اخیر آ ئسر…… نیام انا راندُوک پیسہ غاتے ہلسا تینا مُٹ اٹی کننگ ئسر…… اوفتا قانون ئس اسٹ جوا ایلو رشوت نا پیسہ وام مفسہ……

تونگو گو انا چوٹوس ئسکہ…… اینو او کل بیش تے ٹی میر جوشی نا لاغ ءِ کانڈا خناکہ…… اونا اُست باسس…… او سوچاکہ کہ اینو میر جوشی نا لاغ آ شڑت خلوک آک کٹرہ…… اینو نا وار ءِ خطا کروئی اف…… ولے اوڑتون ئس انت اس کہ شڑت خلوسس…… اونا نظر میر جوشی آ تما ہرا تینا پک اپ نا ڈالہ نا مجاہدی سیٹ اسے آ رچ آنبار زنڈوک ئس…… خنک مُچ جوڑک تے لڑونج…… میر جوشی دا وخت ہم نشہ ٹی ئس…… او میر جوشی آن خڑک کرے تینے……

”آں تونگو…… امر اُس غریب……“ میر جوشی تونگو ءِ خُڑک خنا ہکل تس ارّفے۔

”میر ساب جوان اُٹ……“ تونگو تینا مقصد ءِ پاننگ کتو…… انتئے کہ میر جوشی نا او مہالو آن ہم لکھ آتا وامدار ئس……

”آں تونگو…… لگک کہ اینو وا اُست نا باسسنے……“ میر جوشی بشخندہ کرسا پارے……

”جی اؤ میر ساب…… اگہ اینو وا مہربانی اس کیس کنے دہ ہزار اس ایتس نوا اینو بخت سنگتی کے……“ تونگو بھاز منت زاری اٹ پارے…… میر جوشی اوڑا ہُرا ٹاکو اس خلک مخا…… میر انا جمادار ہم بشخندہ کرے……

”تونگو…… نے سما ءِ نی کنا مُست انا ہم اخس وامدار اس…… ہموفتے تننگ کپیسہ…… داسہ پین خواسہ……“ میر جوشی تینا خن تے خیسن چرخ تس……

”جی میر ساب…… اگہ باور کیس کن تون سگریٹ نا  پیسہ اف…… اینو اومیت ءِ کہ گڑاس کٹوہ…… بس اینو کنے کمک ایت…… ای مُچ آن مُچ نا اُٹ…… نے آن ہرانگ نروہ کاوہ……“ تونگو دو تفسا میر جوشی نا منت ءِ شروع کرے…… اخیر اٹ ہمے الو کہ ہوغتوکہ……

میر جوشی دم اس سوچ اسے ٹی تما ولدا تونگو نا کوپہ غا دو تخسا اونا خف اٹی پارے……

”تونگو اٹ کہ خواس ایتوہ نے…… ولے کنا پُوت انا پُو ءِ کسف……“ تونگو آ ڈغار کُٹا…… اودے میر جوشی نا ننکان سیر آ نشہ کننگ و پُوت موشکفنگ نا عادت آن سما ئس…… اوڑکن نیاڑی اتوک آ تو جمادار ئسکہ داسہ میر جوشی اوڑان دیر ءِ خواہسکہ؟ تونگو فکر اٹی تما…… اونا خن تا مون آ اونا بیمار آ زئیفہ و پیغلہ غا مسڑ ماروی چرخ کریر…… بیمار آ زئیفہ ٹی ہمو جان ءِ خنتو کہ میر جوشی نا پُوت انا پُو ءِ کسفنگ نا وس تخوسس…… ضرور میر جوشی ماروی نا ورنا انگا…… او زو تینا خیال ءِ چرخ تس…… اودے میر جوشی آن دا اومیت اَلو…… ولے مفلسی اونا غیرت ءِ کاوکُو آن دریسس داسہ او ہر گڑا بِننگ کننگ کن تیار ئس……

”میر ساب ای پنجا ہزار خواوہ……“ او تینا منت کم پیسہ پارے کہ نوا میر جوشی ماروی کن با بٹپ…… ولے میر جوشی نا ارمانک ماروی کن وخت اسے آن جوش اٹی مسوسر……

”پنجا آخا تونگو…… پوروّ لکھ روپئی…… ماروی لکھ انا حقدار ہم ارے……“ میر جوشی جوش آن ترخسا پارے…… ولدا ماروی نا پن اٹی لکھ روپئی ترسا نی پا ماروی و اونا باوہ تونگو آ تورو اس کرے…… تونگو ماروی نا بِننگ تون ہبکہ متو…… او دا میدان اٹی مُست تینٹ ہم بھاز آتا عزت آتا سودا ءِ خلکوسس……

”دا ہڷ لکھ روپئی…… در تینا شوق ءِ پورو کر…… شام انا ماروی ءِ سر کیس……“ میر جوشی گانڈَو آن لکھ روپئی کشا تونگو ءِ تس…… لکھ انا تڑی تونگو نا غیرت ءِ دُن ءُ تڑی اس تس کہ او مِش تا مس…… او زو زو ہنا میر جوشی نا بیش ءِ شڑت اکن پیسہ تس…… 

رومال نا چنڈی تون بیشک یلہ مسر…… میدان اٹی دمز اس بش مس…… بیشک تینا لیک آتا تہٹی نرنگ ئسر…… لیک آتیان پیشن ہموفک ہم نرنگ ئسر ہرافتیان عزت و غیرت نراسر……

 میر جوشی نا لاغ چاوہ تینا پُوت انا پُو تے تازہ کسفیسس کہ نک تے ہمو چسپانی ٹی بتوسہ…… دوی تے گز اس پیش تماسس……

تونگو لاغ ءِ ہکل ترسا اونا بغل تون ددینگسا ئس…… ولے اینو ہم اونا بخت خاچوک ئس…… میر جوشی نا لاغ تو با تننگ ئس…… ولے میر جوشی اسہ بشخندہ اسے تون زنڈوک پُوت آن شیف پُو ءِ باڑو آنبار مُشت ترسا اسہ پین گو اسے کن تیار کننگ ئس……

 

ہفتئی تلار
تاک: 04
23-29 جنوری 2021
پنہ: 04

Get real time updates directly on you device, subscribe now.

Leave A Reply

Your email address will not be published.