عشق (افسانہ)۔
شاہ رحمن
اؤ او کنا زند انا اولیکو محبت اس، اونا ہر ہیت کنا اُست اٹ ہندُن پیوست ئس، امر کہ روح جان اٹ۔ اونا عشق کنے ہنداخہ در گم کریسس کہ کنا یات آن ہناسس کہ ہراتم روح جان آن جتا مریک۔ تو او اسہ مڑدہ ءُ لاش اس مریک، ہرانا جاگہ بیرہ مِشک ءُ۔۔۔
ولے داٹی ہچ ءُ شک اس اف کہ ای ہم اینو کرن آتیان پد مِش تیان بش مسُٹ تینے ٹُوہاٹ تو کنے ہندن لگا کہ سُور لگانے۔۔۔
کنا ہر اسہ جوزہ قبر آن پیش تمنگ ءِ و تینا کاٹم نا مش تے چنڈسا مُر کرسا کن کِن بننگ ءِ۔۔۔
ہندُن کہ کس اس جنگ اسے نا کنڈ آ روان مرے۔۔۔
داسہ کنے ہندُن لگا کہ کنا ہر اسہ جوزہ کنے آن ہندا ارفنگ کن بننگ ءِ کہ نی انتئے ننے مِش تا کریس۔۔۔؟
داسہ کنے ہَول اس ہرفے ای تینے آ بیٹ مروک آ خُلیس آن تینا داپار ایپار ءِ ہُراٹ کہ نوا جاگہ اسے ٹی ڈکوّ تینے ولے کنے ہچ اس نظر بتو، ای تینا مون ءِ ہندُن ڈکاٹ دُن کہ اسہ چنا اس خلیس آن تینا مون ءِ ڈکک۔۔۔
اوفتا نت تا توار کنا اُست اٹ ہندُن لگا کہ دُن کہ شام انا تارمئی ٹی اسہ کوزہ گیر ءُ فوج اسے نا بوٹ آتا توار۔۔۔
ہراتم اوفک کنا ماس آ بسُرتو کنے پاریر
”نن اوفتیان افن، ہر ا نے ولدا مِش تا کرور۔۔۔
داسہ تو نن اسہ بے مرک ءُ زند اسے ٹی بسنُن۔۔۔“
داسہ ہر اسٹ تا کنے جنت کن بیرفنگ ئس۔۔۔
کنا خوشی نا انتہا ئس، ہر اسہ جوزہ بیرفنگ اٹ مشغول ئس تو کنے ہندُن لگا کہ کہ دا کل جوزہ غاتا نیام اٹی ای تینے گُم کرینُٹ، ای تینا جوزہ غاتے مر کرسا ہراتم ہُراٹ تو تینے مِش تیٹی خناٹ، او کنے پارے کہ ”دا کُل حجام نا دُکان نا آدینک آنبار دروغ تڑرہ، بر اسیکا تینے ہُر کہ نا مون آ اَخّس دڑد ءُ۔۔۔؟“
اسہ وار اتون کنا ہر جوزہ کنے آن گُم مس، کنا دوی آ اسہ ورد اس ئس۔۔۔
انت نی داسہ ہم اونا عشق اٹ مش تا اریس۔۔۔۔؟