پاکستان کن آئی ایم ایف وام تا فراوانی کن کڑد ادا کیوہ، امریکی سینیٹر

واشنگٹن : امریکی سینیٹر ایمی کلوبرچر ہم پارینے کہ او پاکستان ءِ آئی ایم ایف ناکنڈآن وام تا فراوانی کن کڑد اداکیک۔ درملکی خبررساں ادارہ نا رد اٹ او دا ہیت ءِ پاکستانی امریکن طاہر جاوید نا ہنکین اٹ مہمانی ناوخت آ کرے۔ ٹیکساس اسمبلی نا پاکستانی امریکن باسک ڈاکٹر سلمان لالانی ہم داوخت آساڑی ئس‘ کانگریس ناباسک ایمی کلوبرچر پارے کہ اقتصادی وڑ اٹ سوگو پاکستان نئے بیرہ امریکہ بلکہ جہانی دنیا کن المی ءِ‘ اوپارے کہ ای کوشست کیوہ کہ پاکستان ءِ آئی ایم ایف آن وام تا فراوانی ءِ پک کننگے۔ یات سلے کہ امریکی کانگریس نا باسک ال گرین ہم امریکی حکومت آن خواست کرینے کہ او پاکستان ءِ آئی ایم ایف وجہانی بینک آن کمک نافراوانی کن کڑد ادا کے۔

(آن لائن)