اللہ جل جلالہٗ

دا پن اللہ پاک نا ذاتی آ پن ءِ، اونا معنہ دادے کہ ”ہمو ذات ہرا کل ءِ کمال آتا خواجہ و کل ءِ نسخان آتیان پاک ءِ۔“

دا پن گیشتر عالم دین تا خڑک آ اللہ نا ایلو کل ءِ پن تیان زیات عظمت والا ءِ۔ دا خاطر آن کہ دا پن اٹ کل ءِ سِفت آک اریر۔ ہندا خاطر آن سید عبدالقادر جیلانیؒ فرمائفک ”اللہ“ نا لوز اسم اعظم ءِ، و ہندا پن اتون بندغ خدا غان خواہے و ایلوفتا خیال ءِ است آن کشے۔ و ہندن عالم آک پارہ کہ دا پن اٹ کل ءِ سِفت کمالیہ و جمالیہ غاک اریر۔

امام طحاویؒ، و امام رازی ؒ فرمائفینو کہ لوز ”اللہ“ اسم اعظم ءِ۔ دا بارو اٹ اوفک دلیل دا وڑ بیان کرینو:

-i دا لوز اللہ تعالیٰ نا کل ءِ سِفت آتیا دلالت کیک۔

-ii دا پن اللہ تعالیٰ غان بیدس ایلوفتیکن پاننگپک، تفسیر روح المعانی ٹی ہندا ہیت انا کنڈ آ اشارہ ارے کہ فرعون تینے ”اللہ“ پاتو انتئے کہ اودے دانا طاقت اَلو، بلکن او تینا قوم ءِ پارے کہ ای نما رب اُٹ۔

-iii اللہ تعالیٰ قرآن پاک اٹ ارشاد فرمائفک”اے نبی! پاتا اللہ ءِ اللہ رحمن اٹ توار کبو“ دا حضرت آک پارہ کہ:

-iv دا آیت اٹ اول دا کہ لوز اللہ رحمن نا لوز آن مست ذکر مروک ءِ۔

-v ”رحمن“ نا لوز بیرہ کمال رحمت نا زی آ دلالت کیک، کمال قہر، غلبہ، نا زی آ دلالت کپک، ولے ”اللہ“ ہر وڑ انا سِفت آتیٹی ارے۔

و دا پن ہمو وخت آ ہم ئس ہرا وخت آ دا دنیا ٹی ہچ اس اَلو، و ہمو وخت آ ہم مریک، ہرا وخت آ ہچ گڑاس مفرو ءِ۔ دا پن دنیا نا روح پاننگک۔ ہرا وخت اسکان دنیا ٹی ”اللہ اللہ“ مریک ہمو وخت اسکان دنیا ارے۔ ہرا وخت آ دا پن انا ہلوک کس اس متو تو دنیا ہم چٹک۔

مولانا محمد یونس پالنپوری لوز ”اللہ“ نا برکت آتے نوشتہ کرسا دن نوشتہ کرینے کہ:

-iہرا بندغ ہڑدے 1000 وار دا پن ءِ خوانے، اونا یقین پکا مریک۔

-ii ہرا بندغ دا پن انا ذکر ءِ خاص اللہ نا محبت نا سوب آن کے تو قیامت نا دے او صدیقین آتون (راستگوتتون) اوار بش مریک۔

-iii ہرا بندغ ہر نماز آن گڈ ہفت وار”ھو اللہ الرحیم“خوانسا کیک، اونا ایمان رکھوک مریک، شیطان نا شر آن ہم رکھوک مریک۔

از ابن الحسن ابابکی