کورونا: نن دیچہ اسہ راج اس مرین

بیست و یکمیکو کرن انا بنا تون ہر با ہندا پاریکہ کہ دنیا اسہ ہندن ئُ دور اسے ٹی پترینگانے کہ اونا شون و شونداری داسہ ہچ گہس پدی چَک ہڑسپک۔ و دنیا اسہ گلوبل ولیج اس جوڑ مسنے، ہراڑے مچ آ دنیا اسہ دیوان اسے ٹی ساڑی خننگک۔ ٹیکنالوجی ہنداخس شون ہلکنے کہ داسہ مشینک مخلوق نا سُج آتے ہم خواننگ کیرہ۔ داخس اسکان کہ اسہ کمپیوٹر اس جوڑ کننگانے ہرا بندغ نا میموری ئِ کاپی و پین جاگہ اس پیسٹ کننگ کیک۔ دا و دا وڑ انا کیہی دعویٰ تیان پد خدو گڈیکو تُو اٹ اسہ چُپ و اودیم ئُ دشمن اس اسہ مون آ کاٹم ہرفے و مچ آ دنیا ئِ داتم اسکان بامس اسکان کرینے، و ہمو کل دعواک ہرافتا رد اٹ پاننگاکہ کہ ’داسہ شونداری پدی چَک ہڑسپک‘ کل ئِ مش تا کننگ اٹی ئِ۔ و دا ویل بھاز زُو و اسہ مون آ مچ آ دنیا ٹی تالان مرسا ہننگ اٹی ئِ۔ کورونا پنی آ دا دین ہراتم چین آن بنا کرے تو امریکہ نا صدر ڈونلڈ ٹرمپ بھاز گمر اٹ پارے کہ چین بیرہ اسہ ’وائرس‘ اسے نا مون آ گوڈ خلکنے۔ نن دا ’وائرس‘ ئِ اونا ’اوقات‘ ئِ نشان ایتنہ۔ و اسہ وخت اس بس کہ ہراتم دا وائرس اسہ ملک آن ایلو ملک آتیا سفر کرسا ہنا۔ و اینو پگہ دا دوسَد ملک اسکان تالان مسنے و دا وخت اسکان داڑان زہمی بندغ آتا کچ ہژدہ لکھ ئِ خڑک شاغانے۔ و ہندن اسہ لکھ و دہ ہزار بندغ داڑان فوت ہم کرینو۔ و امریکہ ٹی کورونا وائرس داتم اسکان پنچ و نیم لکھ بندغ ئِ ناجوڑ کرینے۔ دا ہمو ملک ئِ ہرانا بھلا پاریکہ کہ نن دانا توننگ اٹ سرسہب مرینہ و دا نن کن ہچ اس ہم اف۔ حالیت دادے کہ داسہ کل آن زیات زہمی انگا بندغ آتا کچ امریکہ ٹی ئِ۔ اصل ہیت دادے کہ ہراتم ڈونلڈ ٹرمپ امریکہ نا صدر مس تو ہموتم ہم پاننگاکہ کہ اسہ ہندن ئُ ملک اس ہرا مچ آ دنیا نا واگ آتے تینا دوٹی ہلکنے یا پورو دوٹی ہلنگ نا متاماری ٹی اختہ ئِ، اسہ ہبلہ اس اونا سروک جوڑ مسنے۔ و کورونا نا حالیت و داکان مست انا کیہی باندات آتیا ٹرمپ دا ہیت ئِ پک کرے نشان ہم تس۔ و ایلو کنڈ آ ہُننگے تو نمن مننگ نا دا وڑک ننا راج اٹی ہم خننگ انگ ئُ۔ پاکستان اٹی حکومتی کہول آ تو مہالو آن دُوک بڑزا کننگانو کہ نن دا ناجوڑی نا مون ئِ توننگ کن ہچ اس کننگ کپنہ۔ و بنجائی حکومت دا پاہک کہ نن حکومت اٹ بسن تو ہندن ئُ زرگزرانی حالیت اس ئس کہ نن دا وڑ انا ناجوڑی تا مون اٹ سلنگ نا وڑ اٹ افن۔ تو داکان مون آ ہیت سلپک کہ بندغ غاو اس کے۔ ولے نن راجی پڑ آ ہم تاڑ واڑ اسے نا گواچی اُن۔ و حالیت دادے کہ ننے آن اسہ بھلو کچ اس دا ہیت ئِ امنا کننگ کن تیار اف کہ دا ’کورونا اسہ راست اسے‘ و دا وڑ اٹ سجفوک آتا دا خیال ئِ کہ دا مچ ’ڈرامائی حالیت‘ اس جوڑ کننگ کن کننگانے۔ یخین اٹ ’کورونا‘ داسہ اسہ بھاز بھلو سرحال اس مسنے و مننگ کیک اسہ پیراگراف نا دا نوشت اٹ اونا کل بشخ آتیا ہیت مننگ کپ، ولے راجی حالیت دادے کہ اسہ بشخ اس کورونا ئِ راست تکک تو او رکھی گام گیج آتا کسر ئِ ہلکنے، و ایلو بشخ کہ دادے ملنڈ اس تکک، نئے بیرہ دا دَین آ مخک، بلکن ہموفتیا ہم مخک ہرافک کہ دا بابت رکھی گام گیج آتیا امنائی خننگرہ۔ دا وَڑ تیان دا پک مننگ ئِ کہ زند و راج انا ایلو کل بشخ آتیانبار ننا راج دا ویل آ ہم اسہ سلاہ سے آ امنائی خننگپک۔ و یخین اٹ دا راج انا پد تمنگ نا نشانی تیان اسہ نشانی اسے۔