کنا قصور انت ءِ؟

پنجگور اٹی دا وخت آ بے امنی نا اسہ بھلو خاخر اس لگوک ارے، ہر اُرا ہر بندغ فریشان ءِ، پنجگور نا کل شاریک مونجا اریر، دزی نا لوز پنجگور اٹی لس ءِ، کشت و خون اٹی پنجگور پنی ءِ، ہندا پنجگور نا گلی کوچہ غاتیٹی حضرت مولانا حافظ احتشام الحق رحمہ اللہ ءِ خونیک ننے آن مر کریر، مولانا ظاہر، حافظ طاہر، شہید رحیم جان نا غم تیان الس پیشن متویسس کہ حضرت مولانا عبدالحئی رحمہ ءِ بے رحم آ خونیک ننے آن جتا کریر۔ داکان بیدس ہم چندی ورنا، کارباری خواجہ، ڈاکٹر، استاد آتے شہید کننگا ولے پنجگور کودک انگا فقیر جان نا واقعہ غا بھاز دردی مس۔ کودک انگا فقیر جان پنجگور نا شار سوردو نا باتی اس ئسکہ، اونا وئی ہفت سال ئس، اودے اراغان برمتہ (اغوا) کننگا، اونا لمہ ہچ ءُ اُراس الیتو، و تینا چنا ءِ دے درست پٹاکہ ہوغاکہ، پراد کریکہ، ولے اوڑتون اوار مچ آ پنجگور ہمو وخت آ ماتنی مس، کہ فقیر جان نا لاش خننگا کہ اودے خونیک ہشاسر و ہموفتا اُرا نا خڑک آ خالی ءُ حویلی سیٹی بٹیسر۔ پنجگور نا ورناک دا ظلم انا خلاف سڑک آتیا پیش تمار کوکار کریر برانز کریر ولے فقیر جان نا خونیک اینو اسکان دزگیر متوس و اوفتے سزا تننگتو، اوکان پد ہم چندی ورناک بے دڑدی اٹ شہید کننگار، ولے دا ظلم ہمو وخت آ تینا انتہا غا سر مس کہ وخت اس کہ اسہ موٹر سوار اس پنجگور قلم چوک نا خڑک آن اسہ چار سال نا چناسے دزا و نیم گھنٹہ غان پد اونا لاش خننگا کہ اوڑا بھاز بیداد کننگاسس، اے کودک نا گٹ اٹی دا ظالم چٹ شاغاسس، و اونا سرہ ءِ بلاک اسے تون خلکوسس، اونا مون دتر چر ئس۔ اودے زوت سول ہسپتال آ دننگا و اوکان پد پنجگور نا الس اونا لاش ءِ سٹی تھانہ غا درے، و ایڑے برانز کریر۔

سوج دادے کہ دا چار سال نا کودک آ قدیر جان نا خطاء و قصور انت ئس کہ اودے دن بے دڑدی اٹ شہید کننگا و مچ آ پنجگور ءِ اسہ وار اس پدا ماتنی کننگا۔ اونا باوہ اسہ غریب خاہوت اسے آن تعلق تخک، بازار اٹی چا بہا کیک، اودے دا سزا ہندا سوب آن تننگا کہ او غریب اسے؟ مچ آ پنجگور بلکہ انسانیت پنجگور انتظامیہ غان سوج کیک کہ نی ہرا دڑد انا دوا اُس کہ پنجگور نا کودک انگا چناک ہم رکھوک افس۔ دزی، خون، منشیات و پین چندی خرابیک لس ءُ۔ ولے انتظامیہ داسکان تغ آن سما کپک۔ شہید قدیر جان نا واقعہ غان ہندا معلوم مریک کہ انسانیت پنی آ گڑا ننے آن ختم مسنے داڑکن باشعور انگا بندغ آتے بش مروئی ءِ الس ءِ علم، شعور، آگہی تروئی ءِ۔ اگہ الس داسہ ہم سما کتو تو اسہ قدیر جان آ دا ویل چپ مفرو، بلکہ پین بھاز قدیر و فقیر جان ننے آن ہندن بے دڑدی اٹ جتا مرور۔

اینو قدیر جان ننے کل آن ہندا سوج کننگ ءِ کہ کنا قصور انت ئس؟

ہفتئی تلار
تاک: 29
13-07 اگست 2021ء
پنہ: 03