پاکستان یوم شہدا ئے کشمیر آ پورو یکجہتی آ سلوک ءِ، ترجمان دفتر خارجہ

0

Get real time updates directly on you device, subscribe now.

اسلام آباد(اے پی پی) پاکستان یوم شہدا ئے کشمیر آ پورو یکجہتی آ سلنگ نا پارسا پیدوار کرینے کہ پاکستانی حکومت و الس اقوام متحدہ نا سلامتی کونسل نا تعلقدار قرارداد آتا رد اٹ حق خود ارادیت نا دوئی کننگ اسکان کشمیری تتون ہم کوپہ سلک۔ دو شنبے نا دے ترجمان دفتر خارجہ نا رد اٹ پاکستانی حکومت و الس 89می یوم شہدائے کشمیر نا وخت آ لائن آف کنٹرول نا ہڑتوم آ کنڈ آتان و مچ آ دنیا ٹی کشمیری تتون اوار مرسا ہمو 22 بے گناہ و دو خالی کشمیری تے خراج عقیدت پیش کرے ہرافک 1931ءاٹی ڈوگرہ فورس نا ظلم و بیدادی ان برخلاف حق وانصاف کن بش مسر۔ دا بے کچ بھلا جیرت و قربانی کشمیری تے کن حق خود ارادیت نا دوئی کننگ نا غرَز اٹ جیرتی ءُ جہد اسے کن کسر اس پیدوار کرے، ہرا اینو ہم برجا ءِ۔ ڈوگرہ فورس آن زیات بھارتی کوزہ گیر فورس آک ہمے ظلم انا کچ آن ہم گدرینگسا مقبوضہ جموں و کشمیر اٹی لکھ آ خاہوت آتے شہید و ٹھپی کرینو، ولے ولدا ہم اوفک کشمیری تا جیرت و آجوئی نا عزم ءِ پرغنگ اٹ بے سہب مسنو۔ 5 اگست 2019ءآ بھارت نا غیر کانودی و کنڈ ہلوک کارروائیک مقبوضہ جموں و کشمیر نا الس نا جتا شناخت ءِ چٹفنگ کن ءُ، ہرا کشمیری تا آجوئی و حق خودارادیت نا جہد ءِ پین سوگو کرینے۔ آر ایس ایس۔بی جے پی حکومت ”ہندوتوا“ نظریہ نا رند ءِ درسا اسہ پین مذمت کڑزوک گام اس ہرفسا ہندا سال مقبوضہ جموں و کشمیر اٹی یوم شہدائے کشمیر نا وخت آ علاقائی عام تعطیل ءِ چٹفے، ہرا 1948ءآن اڈ تننگسا ہنانے۔ مقبوضہ کشمیر اٹی کشمیریک برانز کننگ اٹی ءُ، کہ دا وڑ اولیکو وار مسنے ہراتم خواجہ نقشبند مزار نا دنگ اٹ نوہٹہ سری نگر اٹی شہداءقبرستان اٹی ہچ ءُ سرکاری گارڈ آف آنر اس مفک۔

Get real time updates directly on you device, subscribe now.

Leave A Reply

Your email address will not be published.