پک اینڈ چوز‘ نا کمک اٹ 8 باسکی بینچ ءِ منپنہ، حکومتی سیوت

اسلام آباد : حکومت اٹ اوار سیوتی جماعت آک سپریم کورٹ پریکٹس اینڈ پروسیجر بل 2023 انا برخلاف درخواست آتے سماعت کن پن کننگ آ گڑتی درشان کرسا پارینو کہ ’پک اینڈ چوز‘ نا کمک اٹ 8 باسکی بینچ ٹہیفسا سماعت کن پن کننگانے‘ نن دا بینچ ءِ منپنہ‘ ننے آ انت کہ عذاب برے ولے داڑا سمجھوتہ کننگ کپنہ۔ چیف جسٹس نا واکداری تیا اعتراض کتنن بلکہ پارین کہ داٹی بریبری اتنگے‘ ضدکننگک تو گڑا مچ آ قوم ءِ اعتراض مریک۔ دا خیال آتا درشانی ءِ پنچ شنبے نا د اسلام آباد اٹ بنجائی وزیر کانود اعظم نذیر تارڑ حکومتی سیوت اٹ اوار جماعت آتا راہشون قمر زمان کائرہ، طاہر بزنجو و ہاشم نوتیزئی تون اوار پریس کانفرنس کرسا کرے‘ اوپارے کہ فل کورٹ جوڑ کننگے انصاف نا ترازو نا ہڑتم آ کنڈآتے بریبر کننگے‘ اوپارے کہ داسکان کانود جوڑ متنے و دادے چیلنج کننگ نا تک جوڑ مفک۔ وزیر مملکت ہاشم نوتیزئی پارے کہ بی این پی آئین و جمہوری نظام آباور کیک اینو سپریم کورٹ تینٹ انصاف نا خلاف ورزی کننگ اٹی ءِ‘ فل کورٹ مسکہ تو جھیڑہ ئی ہیت متوکہ۔ پارلیمنٹ نا بالادستی آ ہچ سمجھوتہ کپنہ۔ کانود جوڑ مننگ آن مست غوغا مننگ گڑتی نا سوب ءِ‘ دانا انت مطلب ہلنگے کہ بلوچستان و خیبرپختونخوا نا جج آتا یقین اف ہندا سوب آن اوفتے اوار کننگتو۔ داکان مست حکومت اٹ اوار جماعت آتا کنڈآن پنچ شنبے نادے آ جاری اسیجائی اعلامیہ ٹی پاننگاکہ حکومت اٹ اوار سیوتی جماعت آک پارینو کہ مچ آ ملک انا وکلابرادری نا خواست آ عمل کرسا پارلیمان سپریم کورٹ پروسیجر اینڈ پریکٹس بل2023 ءِ منظور کرینو، کانود سازی نا عمل پورو مننگ و اونا نفاذ آن مست سماعت کن مقرر کننگ نا گام ءِ مسترد کینہ۔ آئین پاکستان ءِ مون آتخسا پارلیمان نا اختیار آ ہچ ءُ سمجھوتہ اس کننگپک۔ داوڑنا گام پاکستان و عدالت نا تاریخ اٹی داکان مہالو اسُل مون آ بتنے۔ دا ملک انا بڑزکوآ عدالت نا ساکھ ءِ متاثر کننگ و انصاف نا آئینی عمل ءِ بے معنی کننگ آنبار ءِ۔ دا بنچ بذات خود سپریم کورٹ نا تقسیم نا پاش آن پاش شاہدی ءِ ہراڑان حکومت اٹ اوار جماعت آتا مہالو بیان کروک موقف نا اسہ وار ولدا تائیدمسنے۔ اعلامیہ نا رداٹ تینٹ سپریم کورٹ نا شرفمند آ جج صاحب آک تینا فیصلہ غاتیٹی ’ون مین شو‘ متعصبانہ و آمرانہ طرزعمل و مخصوص بنچ آتا ٹہیفنگ آ اعتراض آتا برملا درشانی ءِ کرینے۔ اعلامیہ ٹی پاننگا 8 باسکی بنچ نا ٹہیفنگ آن عدالت عظمیٰ نا دا شرفمند آ جج صاحب آتا فیصلہ غاتیٹی بیان کروک راستکیک پین پیدوار مرسا مون آ بسنو۔ پاکستان اسہ بنجاسے، داحقیقت ءِ گوجالسا ہڑتوم آ چنکا صوبہ یعنی بلوچستان و خیبرپختونخوا غان اسہ جج اسے ہم بنچ اٹ اوار کپننگ ہم است ہسونی نا سوب ءِ۔ حکومت اٹ اوار جماعت آک دا گام ءِ پارلیمان و اونا اختیار آن چپ تکرہ ہرانا پبی مزاحمت ءِ کننگک۔ بے کچ عجلت اٹی بنچ انا ٹہیفنگ و دا بل ءِ سماعت کن مقرر کننگ آن نیت و ارادہ غان بیدس بروک آ فیصلہ نا ہم پیدوار درشانی مریک۔ اعلامیہ ٹی پیدوار کننگاکہ عدالت عظمیٰ نا گام و بنچ انا ٹہیفنگ آ پاکستان نا بارکونسلز نا بیان داہیت انا پیدوار شاہدی ءِ کہ دا گام نئے بیرہ عدل و انصاف آن چپ ءِ بلکن مروجہ عدالتی وڑوڈول و متعین اصول آتیان ہم چپ ءِ۔ اسیجائی اعلامیہ ٹی پیدوار کننگاکہ 12 اکتوبر 2019 ا آ لاہور اٹی آل پاکستان وکلاکنونشن قرارداد منظور کرسا پارلیمان آن خواست کریسس کہ دا کانود ءِ منظور کننگے۔ مچ آ ملک انا وکلابرادری نا داخواست آ عمل کرسا پارلیمان تعلقدار کانود ءِ منظور کرے۔

(آن لائن)