لاہور، اُرا سے ٹی خاخر لگنگ آن چناتتون اوار 10 بندغ زوال
بھاٹی گیٹ نا علاقہ والڈ سٹی ٹی 2 مرلہ نا اُراسے نا ارٹ میکو ڈاکہ غا اناگت خاخر لگا ہرامچ آ اُراءِ پلویڑ کرے
Get real time updates directly on you device, subscribe now.
لاہور/اسلام آباد: لاہور نا علاقہ بھاٹی گیٹ اٹ واقع اُراسے ٹی خاخر لگنگ آن چناتتون اوار 10 بندغ ہشنگسا زوال کریر۔ ترجمان ریسکیو 1122 نا رداٹ بھاٹی گیٹ نا علاقہ محلہ سمیاں، نزد فیملی پارک ٹیکسالی، والڈ سٹی ٹی 2 مرلہ نا اُراسے نا ارٹ میکو ڈاکہ غا اناگت خاخر لگا ہرامچ آ اُراءِ پلویڑ کرے،۔ ترجمان نا رداٹ دم کُشتہ مننگ آن 14سال انا سونو، 25 سال انا امبر، پوسکن ودی مروک آ علمدار، 14 سال انا مونو، 60 سال انا زالبول سائرہ بانو، 16 سال انا عادل حسین، 4 سال انا انزال فاطمہ، 18 سال انا سنیہ، 15 سال انا سیماب و 40 سال انا زالبول فرزانہ زوال کریر۔ ترجمان نا رداٹ واقعہ نا حوال ملنگ تون ریسکیو ٹیمک موقع غا سرمرسا خاخر نا مون ءِ توریر و لاش آتے میو ہسپتال آ مون تسنو۔ ترجمان پارے کہ ریسکیو آپریشن اٹی 33 ریسکیورز و 11 گاڈی بشخ ہلکر، گنجان آباد علاقہ مننگ نا سوب آن مشکل آتیان پد ہم بھاز کم وخت اٹی آپریشن ءِ پورو کننگا۔ وزیراعظم محمد شہباز شریف لاہور اٹی اُراسے ٹی خاخر لگنگ نا واقعہ ٹی اسہ خاہوت نا 10 بندغ آتا مرک آ ڈکھیائی نا درشانی ءِ کرینے۔ چارشنبے نادیا ٓ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم واقعہ ٹی زوال کروک آ بندغ آتیکن بخشش و خاہوت کن صبر وجمیل نا دعا کرے۔
(اے پی پی)