سیمار نا پڑ (افسانہ)۔

دھول چاپ ئس…… سُو برنج ئس…… مخلوق نا کچاری ئس…… او کٹ اسے آ بیجکہ بشخندہ ئس…… ہفتاد سال نا عمر اٹی دا اونا پنچمیکو شادے ئسکہ…… اولیکو برام اونا مرضی منشاء غان چپ مسک…… ولے اودے ہنداخس ہستی ئسکہ کہ او تینا منشاء تے پیسہ نا زور اٹ پورو کرسا ہنا…… حسن و زیبائی نا او چونڈ خواجہ ئس…… پٹاکہ پٹاکہ تینا خوش و طب انا پیغلہ دوئی کریکہ…… کرنچ نا دشمن ئس…… ہر وخت تازہ پٹاکہ…… دا عمر اٹی اونا ہم ہزوہ ہزوہ کرنچی ئس…… ولے حکیم شیرداد نا یونانی کیپسول آک گڑاس ہزوہ نا کرنچ آتے دن مر کریرہ کہ عمر انا حساب اٹ درست متوسہ…… پلوشے اونا مسن تا عمر اناس مسکہ…… ولے بیست لکھ لب عمر آتا دا کرنچ آتے ہم چکاسس بریبر کریسس……

اونا واسطہ داری بھلا بھلا خاندان تتون ئسکہ ہرکس اونا لخ اٹی ہار اس شاغاکہ خمب کریکہ…… او خمب آن پد زو زو تینا جیب اٹ دو دریکہ تینا گڑا تے سنبھالاکہ دو تے تے گڑاس ڈک ڈک لگاکہ تو تسلی آن اونا بشخندہ پین تالان مسکہ……

پلوشے لائق تو سبر ءُ ورنا سے نا ئسکہ…… ولے او ہم تینے پوسکن ورنا تیان کم کتویسس…… ریش بروت پژہ غاتے رنگ کرسا او ورنا اسے آن کم خننگتوکہ…… سلیس ورنائی نا گشاد تو اوڑکن او پیسہ خڑچ کرسا بست و بند کریسس……

خفتن نا نماز آن گُڈ رش کش پنسا کرے…… او بش مس اُرا ٹی بس…… اسہ کمرہ سے نا دروازہ غا بھلو خیسن ءُ است اس خلوک ئس…… ولدا چرمکی آ پھل آک لڑونج ئسر…… او تینا مارکو تا شودئی آ پین بشخندہ مس…… اونا زند انا ارمان اونا است انا گودی پلوشے اونا انتظار اٹی ہندا کمرہ ٹی زنڈوک ئس…… پیشیم تون او نکاح کریسس گودی ءِ ہرفیسس ایسوسس…… او مونی بوڑچی خانہ کن گدرینگا…… شامو آن گلاس اس پرواڷ نا ہلک…… جیب آن حکیم نا کیپسول آتیان کشا اسٹ اس باٹی بٹے۔ پرواڷ نا گلاس نا مُچ ءِ کش کرے…… داسہ او ہر وڑ انا مل اکن تیار ئس…… حکیم پاریسس کہ مل آن مُست اسہ وزن اس کُنیس…… ولدا اسہ وار نا ٹپیفنگ تون سیمار تینا سرہ ءِ جک کیک پفارہ خلیک…… او انتظار ئس کہ ہراتم نیاڑیک کمرہ غان پیش تمر و اودے پترینگ نا موکل مرے…… او ولدا بس مہمان تتون زنڈا…… گھنٹہ سے آن زیات مس…… اودے فریشانی اس ہرفے کہ وزن آن پد ہم سرکُک تینا سرہ ءِ انتئے کشنگ اف…… بایدے او دا خوراک آن پد سرہ ءِ تینا دراخ کشوسس…… او ہُرا کہ شادے نا اولیکو نن اگہ او بے سہب مس تو زند مُچ دا خجالت مُر مفک…… او پلوشے ءِ اولیکو نن تینا قوت و آزموندہ ءِ نشان تننگ خواہسکہ…… او بش مس ولدا بوڑچی خانہ ٹی بس…… دا جار بوڑچی خانہ ٹی شامو الو…… او پٹا پاڷ تے فرج آن کشا گلاس اس پُر کرے…… ولدا جیب آن حکیم نا کیپسول آتیان اسٹ اس با ٹی بٹے کش کرے…… داسہ اودے تسلی بس کہ دا خوراک آن پد سیمار ہم پفارہ خلیک و سرکک ہم ڈکوک آ سرہ ءِ کانڈائی ٹی بڑزا کیک…… او بوڑچی خانہ غان پیش تمنگ ئس کہ نیاڑی تا لشکر اس بس اونا دوٹی ہلک…… بادشاہ بادشاہ پارسا خوشی خوشی پلوشے نا کمرہ ٹی پتریفیر…… پلنگ آ پلوشے خیسن آ جھالری آ گُد اٹی بُوک زنڈوک ئس…… اونا بدن یکدم باسس…… اُست انا درپہ تیز مس…… او دروازہ ءِ کڑی کرے…… کرار کرار گام ہرفسا او پلوشے نا بغل آ زنڈا…… جیب اٹی دو ءِ درے…… تو حکیم نا کیپسول والا ڈبی دوٹی تے بس…… او وار ختا مرسا دو ءِ شیف درے پین ڈبی اس دوٹی تے بس…… ڈبی آن خیسن نا چلو ءِ کشا پلوشے نا نازرک آ ہور اٹی شاغا…… ولدا او کرار آ پلوشے نا بُوک ءِ بڑزا کرے…… اونا توبے مثل چہرہ…… گلابی آ کلک آک…… خیسن آ جوڑک…… مَون انگا مرغن انگا مچاچک آک…… حسن انا دا خاخر اونا لمبہ ہلوک آ بدن ءِ پین لمبہ تس…… اونا است ترند درپنگ ءِ شروع کرے…… دم دُن تیزی ٹی بسکہ کہ گرانز آک دم انا تہو ءِ کشنگ کتوسہ…… او سیمار ءِ ٹپیفے…… سیمار تینا پڑ ءِ کشا…… سرکک سرہ ءِ پیشن کشسا جہان نا سیل ءِ بنا کرے…… اودے خید اس ہرفے…… سینہ ٹی تکلیف محسوس مس…… او پلوشے تون ہیت کننگ خواہس ولے با غان ہیت پیشن متو…… اونا بن بارس…… او بش مس کہ کاو گلاس اس دیر انا کنیو…… ولے پلوشے اونا دوٹی ہلک…… پلوشے نا دو انا خلکُنی اودے پین خاخر تس…… اونا دم بند مننگ ئس…… او کوشست اٹی ئس کہ پلوشے آن دو ءِ خلاس کیو کاو دیر انا گلم اس کنیو…… ولے پلوشے ءِ اونا استاد اس تینا راز اس رغاماسس کہ امر نرینہ ءِ زو بیدار کننگک…… پلوشے اودے چکا تینا خمب اٹی کرے…… بس جھٹکہ ہندا ئس کہ اونا با غان پُر آ پیش تما…… او ہڑتوم آ دو تے ٹی سینہ ءِ تورسا گڑاس پاننگ خواہس ولے دوی سیک ءِ الا…… سیمار نا لخ پنا…… سرکک نا سرہ پچخ اس مس……

ہفتئی تلار
تاک: 25
09-03 جولائی 2021ء
پنہ: 07