پنجاب الیکشن کن فنڈ تفننگ آ اٹارنی جنرل و سیکرٹری خزانہ بٹنگ انگار

لاہور : پنجاب اٹ لس گچین کاری تیکن فنڈ تفننگ ناباندات آ چیف جسٹس عمر عطا بندیال اٹارنی جنرل و سیکرٹری خزانہ ءِ بٹنگا‘ چیف جسٹس پاکستان 14 اپریل آ سیکرٹری خزانہ و اٹارنی جنرل تون اوار تعلقدار کمامدار آتے تینا چیمبر اٹ بٹنگانے۔ سپریم کورٹ سیکرٹری خزانہ و اٹارنی جنرل سمیت گورنر اسٹیٹ بینک و سیکرٹری الیکشن کمیشن ءِ ہم نوٹس جاری کرینے نوٹس اٹ پاننگانے کہ الیکشن کمیشن نا رپورٹ نا رد اٹ بنجائی حکومت فنڈ تتنے‘ پنجاب اٹ گچین کاری تیکن فنڈتفننگ عدالتی پرمان تا خلاف ورزی ءِ۔ سپریم کورٹ نا نوٹس اٹ پاننگانے کہ عدالتی پرمان ءِ منپننگ نا نتیجہ غاتا پد کانود اٹ پیدوار و کل ءِ سماءِ‘ کل افسر آک 14 اپریل آ چیف جسٹس چیمبر اٹ پیش مریر‘ گچین کاری تیکن فنڈ تننگ توہین عدالت نا کارروائی آن زیات اہم ءِ‘ عدالت گورنر اسٹیٹ بینک ءِ دوئی وسیلہ غاتا بابت کل سرجم آتے ہم تین تون اتنگ نا پرمان کرسا پارینے کہ گورنراسٹیٹ بینک و سینئر آ افسر آک حکومت تون ساڑی پیسہ غاتا سرجم آتے تین تون اتیر وخت اس کہ سیکرٹری خزانہ ءِ ہم کل ریکارڈ آتے اتنگ نا پرمان کننگانے۔ عدالت عظمیٰ نا نوٹس اٹ پاننگانے کہ پاننگے کہ سپریم کورٹ ناپرمان آ انتئے عمل کننگتو؟ سپریم کورٹ سیکرٹری الیکشن کمیشن ءِ پنجاب و خیبرپختونخوا گچین کاری تا بابت کل ریکارڈ آتے ہم فراوان کننگ نا پرمان کرینے۔ یات سلے کہ سپریم کورٹ پنجاب اٹ 14 مئی آ گچین کاری کرفنگ نا پرمان کرینے وخت اس کہ بنجائی حکومت نا موقف ءِ کہ اسٹ یا اِرا صوبہ ٹی مہالو گچین کاری مننگ کپک۔ دا بابت سپریم کورٹ وزارت خزانہ ءِ پرمان کریسس کہ پنجاب اٹ گچین کاری تیکن الیکشن کمیشن ءِ 10 اپریل اسکان فنڈ تننگے و الیکشن کمیشن ءِ پرمان کریسس کہ 11 اپریل آ رپورٹ ءِ عدالت اٹ پیش کننگے۔

(مانیٹرنگ ڈیسک)