کنوئی گڑا تا پیشن ملک اسمگلنگ نا حالیت گڑتی نا سوب ءِ، رانا ثناء اللہ

اسلام آباد : بنجائی وزیر داخلہ رانا ثناء اللہ پارینے کہ گرج انا گڑاتا ملک آن پیشن اسمگلنگ ہلہلہ ئی حالیت ناسوب مننگ اٹی ءِ‘ کل آن مست ہرا بندغ آک دا غیرکانونی کاریم ءِ کیرہ و اوفتا کمکار ءُ اوفتا برخلاف سخت کارروائی کروئی مریک۔ اسمگلنگ نا زموار افسر و کارندہ غاتا برخلاف سخت آن سخت کارروائی کننگک‘ ادارہ غاتا جوائنٹ آپریشن و انٹیلیجنس شیئرنگ آ کاریم کروئی مریک حوال نا رد اٹ وزیر داخلہ رانا ثناء اللہ خان ناکماشی ٹی خولم‘ بورہ‘ نت‘ کھد وایلو گرج انا گڑاتا اسمگلنگ ءِ توننگ نا بابت ارٹمیکو دیوان اڈہلک‘ دیوان اٹ وزیر دفاع خواجہ محمد آصف، وزیر واپاری سید نوید قمر، وزیر نیشنل فوڈ سیکیورٹی طارق بشیر چیمہ، وزیر صنعت مخدوم مرتضیٰ محمود، خصوصی کمکار ریوینیو طارق محمود پاشا،سیکرٹری داخلہ علی مرتضیٰ، چیئرمین فیڈرل بورڈ آف ریونیو آصف احمد و بنجائی و صوبائی ادارہ غاتا نمائندہ غاک ہم ساڑی ئسر‘ دا وخت آ وزیرداخلہ پارے کہ جوائنٹ چیک پوسٹ و جوائنٹ پٹرولنگ آ عملدرآمد ءِ زوت پک کننگے‘ بارڈر کنٹرول نا نظام ءِ ہم پین فعال کروئی مریک و داڑتون اوار بین الاصوبائی ہن وبر آہم نظرتخنگے‘ گرج انا گڑاتیا ٹریک اینڈ ٹریس سسٹم خلنگ نا عمل ءِ پک کننگے تاکہ ضبط مروک گڑاتا کمک اٹ دانا زموار آتے سزا تننگ مرے۔ وزیرداخلہ پارے کہ سیمی ضلع غاتے ٹی گرج آن زیات گڑاتا سپلائی ءِ توننگ کن گام گیج کننگے‘ سیمی ضلع غاتے ٹی گرج آن زیات کوڑی کننگ نا برخلاف کارروائی کننگے‘ سیم اتون اوار اوار اسمگلنگ ءِ توننگ کن دانا بنا نا ہند آن ہلیس اودے کسر اٹ توننگ کن گام گیج کروئی مریک‘ دا رد اٹ اگہ کانود اٹ ترمیم کننگ ناگرج ارے تو وزارت کانود و ایف بی آر زو دا ٹاسک ءِ پورو کیر‘ دیوان اٹ داکان مست کروک فیصلہ غاتیا پیش رفت نا جاچ ءِ ہم ہلنگا۔

(آن لائن)