مچ آ قوم دہشت گردی نا پورو چٹفنگ کن متحد ءِ، صدر علوی

اسلام آباد: صدر مملکت ڈاکٹر عارف علوی شہید آتے دہشت گردی نا برخلاف جنگ اٹی جون تے ندر پیش کننگ آ شاندار لوز آتیٹی خراج عقیدت پیش کرسا پارینے کہ مچ آ قوم دہشت گردی نا پورو چٹفنگ کن متحد ءِ۔ ایوان صدر نا پریس ونگ آن چارشنبے نادے آ جاری بیان نا رداٹ صدر مملکت داخیال آتا درشانی ءِ پاک فوج انا شہید آتا خاہوت آتون ٹیل فون آ گپ وتران کرسا کرے۔ صدر 8 اپریل آ سویلی وزیرستان اٹی جام شہادت نوش کروک آ نائیک فضل جانان نا وارث آتون رابطہ کرے۔ او8 اپریل آ خیبرباڑہ ٹی شہید مروک آ نائیک نذیر اللہ محسود و نائب صوبیدار حضرت گل نا خاہوت آتون ہم فون آ است ہسونی نا درشانی ءِ کرے۔ صدر مملکت 5 اپریل آ سویلی وزیرستان اٹی شہید مروک آ سپاہی حامد رسول نا ایلم تون ہم فون آ ہیت کرے۔ ڈاکٹر عارف علوی شہید آتے دہشت گردی نا برخلاف جنگ اٹی جون تے ندر کننگ آ خراج عقیدت پیش کرے و پارے کہ مچ آ قوم دہشت گردی نا پورو چٹفنگ کن متحد ءِ۔ صدر مملکت پارے کہ مچ آ قوم دہشت گردی نا برخلاف جنگ اٹی شہید آتا خذمت آتے سلام پیش کیک۔ اوشہید آتا درجہ غاتا بڑزی کن دعا کرے و قوم انا کنڈآن شہید آتا خاہوت آتا منت واری ءِ ہرفے۔ صدر مملکت شہید آتا خاہوت کن صبر وجمیل نا ہم دعا کرے۔

(اے پی پی)