استاد نا مے مر، نہ تو فیل مریسہ

ایلو ادارہ غاتیانبار ہراتم بلوچستان نا اسہ قوم پرست پارٹی اسے نا کماش مرکز اٹ مسلم لیگ (ن) و بلوچستان اٹ اسہ بلوچ قوم پرست پارٹی اسے نا کماش تون ہڷ و تس انا بنداو آ تینا کر انگا کاوکُو آن ہنوک آ ایلم ءِ بلوچستان نا گورنر جوڑ کرے، صوبائی حکومت اٹ گچین انگا وزارت آتے تینا ایلم آن تینا اُرا نا کور و منڈ آتیٹی ریوڑی آنبار بشخا، ایلم تے گورنر نا عہدہ ءِ تنگ نظری نا مثال اس جوڑ کرے۔ بلوچستان نا کل یونیورسٹی تیٹی لاء کالج نا پرنسپل آتسکان تینا پارٹی نا خڑک انا بندغ آتے وائس چانسلر چار چار سال اکن تخا۔ ایماندار نا ہننگ آن پد دا گورنر ہم ہمو فارمولہ غا گام کننگ ءِ۔ دا گورنر ہرا غیر آتے وائس چانسلر اتنگ ءِ، اوفتا کمک اٹ چپڑاسی آن لیکچرار افسر اسکان نا پوسٹ آتیا ایلوفتے بھرتی کننگ ءِ۔ بلوچستان یونیورسٹی بلوچ افسر ایڈمن اٹ پڈ انا خڷ اکن ہم دو بفک۔ کل تا بدر ءُ۔ وائس چانسلر، پرو وائس چانسلر، رجسٹرار، مسہ ایڈیشنل رجسٹرار، اسسٹنٹ رجسٹرار آک، کنٹرول، ڈپٹی کنٹرولر آک، چیف لائبریرین، کل اوفتیان ءُ۔ چل و پنچ ڈیپارٹمنٹ نا چیئرمین آتیان سی و پنچ غیر بلوچ و سفارشی و قوم پرستی نا بنداو آ بھرتی ءُ۔ بلوچ خوانندہ غاتیان خواننگ نا جوزہ کٹنگ ءِ۔ ریسرچ نا ہیٹ دے پہ دے سفارش نا نہار تا گواچی مننگ ءِ۔ کلاس اٹ استاد آن سوال ارفنگ استاد و شاگرد نا نیام اٹ دشمنی نا سوب جوڑ مننگ ءِ۔ تنقید کروک آِ و سوج کروک آ ءِ استاد وار وار آ فیل کیک۔ استاد شاگڑد ءِ مجبور کیک کنا مجلس آن بیدس پین استاد اسے تون سلام دعا کپیس۔ شاگڑد مدام

ہمو استاد نا مے جوڑ مرے نہ تو فیل مننگ نا چار پنچ فارم تین تون پر کروک تخے۔ اگہ استاد آتا خوشامدی ءِ کریس، امتحانی سوال آک وٹس ایپ آ دو بریرہ۔ ایم فل پی ایچ ڈی نا ٹیسٹ ہم ہندا بنداو آ تیا مریک۔ کس ءِ ٹیسٹ اکن تُو تا تُو نن و دے تیاری کروئی تمک، کس ءِ سد سوال تشت اٹ ملرہ۔ یونیورسٹی نا تاریخ اٹ متنے کہ اسہ شاگرد اسے نا پرچہ غاتیٹی سد آن سد نمبر برے، اینو پگہ یونیورسٹی ٹی خوشامد کروک آک نود و ہشت آن سد نمبر اسکان ہلنگ ءُ۔ داڑکن المی ءِ ہمو شاگرد استاد نا دھول آ استاد نا پاروک آ دھن آ چاپ خلے۔ ایڈمن اٹ ہرا افسر خن انا پڑی ءِ ایڈمن نا گیٹ آ بٹے، بے شرفی نا چابک ءِ شرف انا کاٹم آ سگے، گڑا ترقی نا خل تیٹی ترپ ہلوئی تمپک تے۔ نئے خواری نا پوڑی تیا ساہ ءِ بسفوئی تمک، بلکن خن شیفی نا لفٹ تینٹ پنچ گریڈ آن ہژدہ گریڈ نا کٹیا کروک آ خلکن آ کڑسی آ سر کیک۔ ہراڑان ملی ٹی بد اخلاقی و میری متبری نا ٹوخر کاٹم ہرفک، خن تیا غرور تکبر نا مون انگا پڑدہ بریک۔ ہراڑان بندغ ادارہ ٹی بیدس مڈی تا راج کماری آن و قراکلی والا عکس آن تینے آدینک اٹ ہم خنپک۔ خن تیان ہندن کور مریک، اودے گدان نا ڈیوا نا روشنائی ناچو تا ماڑی نا بتی نا گمان مریک۔ نئے وخت اس اودے غیرت و عزت نا ڈِک آتے ملنگ نا جیرت مریک، بلکن او عزت و غیرت نا ہر چیہانٹ آ خن تے تر و خف تے بند کیک۔ یونیورسٹی ہراسمنٹ کیس آک ننا مون آٹو، ہراڑے اخس چیہانٹ دروک اتوک آتا بند انگا خف ننا درگہ ءِ ٹکیفسا دم تس، خنوک آتا مون آ خلیس تینا کڑسی و نوکری نا پچ اس بس، دوی بے غیرتی نا تفر اٹ گڈنگا، بھلا با خن شیفی نا تار اٹ مدام گنڈنگا، ادارہ غاتیٹی ہراسمنٹ، بداخلاقی، بے انصافی، سفارش و خن شیفی نا مون اٹ پڑدہ ئی آ عزتی و غیرت نا پرک آک پت آتا زی آ دم تسر، نئے عاشق آتا کوک و پاڑو ءِ کس بنگ، نئے اودیم ادارہ غاتا پٹ و پول آن انصاف نا تول سرا۔ نئے مندر نا چڑینگ آک اسہ ایلو ٹی لگار، نئے موکو نا جال اٹ اسہ اِرا ڈونڈ خور پاسینگار، بس منہ شوک و تولہ تو پاسینگار، ولے خرماک شکاری آ کچک آتتون موکو نا جال ءِ کشکار، پوسکن ءُ شکار پٹنگ نا رند اٹ سرگڑدان ءُ۔ دا شکاری تیٹی تینا بیگانہ اسہ پیالہ نا نشئی ءُ، انتئے کہ ذہنی غلامی اخس کہ بس ضمیر بہا کننگ نا ہنر پین گیشتر مریک۔

ہفتئی تلار
تاک: 29
13-07 اگست 2021ء
پنہ: 03