حکومت المی بشخ آتا شونداری آ خاص چکار کننگ ءِ، شہباز شریف

اسلام آباد: وزیراعظم محمد شہباز شریف پارینے کہ حکومت انفارمیشن ٹیکنالوجی، کشت وکشار، سولرآئزیشن و ورناتا شونداری آ خاص چکار کننگ اٹی ءِ، بجٹ 2023-24حکومتی اولیت آتا ڈیک ءِ، اقتصادی وڑ اٹ تینا نت تیا سلفنگ حکومت نا بنداوی مسخت ءِ۔ دوشنبے نادے آ تینا ٹویٹ اٹی وزیراعظم محمد شہباز شریف پارے کہ چاہندار آک بجٹ 2023-24نا چندی پلو آتا بابت تینا سلاہ تے پیش کننگ ءُ، داوڑاٹ، ای بجٹ اٹ حکومت نا شرح نمو ءِ ودفنگ نا بابت سلاہ تروک آ خصوصی گام گیج آتے تالان کننگ خواوہ۔ اوپارے کہ انفارمیشن ٹیکنالوجی، کشت وکشار، شمسی توانائی آ گدریفنگ، ورناتا شونداری و ایلو بشخ آتا شونداری کن گام گیج بھاز سجفنگ آن پد سلاہ کننگانے و دافتا مسخت ہُشار ورناتیٹی جدت طرازی، کاروبار نا است بڈی کننگ، کشت وکشار نا پیدوار ءِ ودفنگ و کشاری صنعت اٹی زرکاری ءِ مون آ دننگ ءِ۔ وزیراعظم پارے کہ داڑتون اوار اوار حکومت توانائی نا دوئی کننگ نا اڑزان ذریعہ و شمسی توانائی آ گدریفنگ کن کاریم کننگ اٹی ءِ۔ اڑزان توانائی اقتصادی شونداری و الس ءِ ریلیف نا فراوانی کن بھاز اہمیت تخک۔ اوپارے کہ روس آن خام تیل انا دوئی کننگ ہم انرجی سیکورٹی پلان نا بشخ اسے۔ وزیراعظم پارے کہ داخلی و جہانی حالیت آتا سوب ودی مروک آ اڑاند آتیان پد ہم بجٹ 2023-24دا حالیت آتون مون تننگ و مون آ ہِننگ نا کسر اس فراوان کیک۔ وزیراعظم پارے کہ داوڑاٹ وخت اس کہ زرگزران پیشن نا حالیت آتیان زہمی ءِ، حکومت اقتصادی خودانحصاری آ چکار کننگ اٹی ءِ۔

(اے پی پی)