الیکشن نا مُد ءِ ودفنگ نا فیصلہ ءِ پارلیمنٹ کیک، مولانا فضل الرحمن

پشاور :  پی ڈی ایم نا سروک مولانا فضل الرحمن پارینے کہ ملک اٹ آئین وکانود نارد اٹ زو یا ہُرے آ گچین کاریک مریرہ‘ گچین کاری تے آئینی مُد ءِ ودفنگ نافیصلہ ءِ پارلیمنٹ کیک۔ تحریک انصاف نا حکومت ملکی زرگزران ءِ بے رحمی اٹ بھس کرے‘ پاکستان نا اسلامی تشخص ءِ چٹفسا اسہ سیکولر ملک اس جوڑ کننگا‘ ملک انا اسلامی شناخت ءِ برجا تخنگ کن تیناکڑدار ءِ برجا تخنہ۔ کشمیر آ بھارتی کوزی گیرہ مودی عمران ’گٹھ جوڑ‘ نا بھرم ءِ‘ حکومت پائے چیئرمین پی ٹی آئی نا برخلاف کارروائی انتئے مفننگ ءِ؟۔دوشنبے نادے پریس کانفرنس آن تران کرسا مولانا فضل الرحمن پارے کہ ملکی زرگزران ہرا وڑ شیف ہنانے اودے بڑزا کننگ بھاز بھلو چیلنج اسے‘ پی ٹی آئی نا حکومت بھاز بے دڑدی اٹ زرگزران ءِ بھس کرے‘ ملک دا وخت آ زرگزرانی تنکی نا باٹی ءِ‘ سختی تیان پدہم حکومت جوان ءُ بجٹ اس جوڑ کرینے‘ الس ءِ ریلیف رسیفنگ کن جے یو آئی حکومت تون ہم کوپہ سلوک مریک‘ زرگزران ہنداخس خراب مسنے کہ اودے بروک آحکومت بڑزا دیک۔ اوپارے کہ 9مئی نا واقعہ غاتا مذمت کننگا‘دا و ڑانا فتنہ نا برخلاف بایدے کارروائی مرے و دا وڑ انا واقعہ غاتا زموار آتے سزا تننگے۔ اوپارے کہ نن سیاست نا شیفی بڑزی ءِ بھاز خڑک آن خنانن۔ ننا خارجہ پالیسی نا وت بایدے پاکستان نا فائدہ مرے‘ ملک آتتون بریبری نا بنداو آ تعلقداری جوڑ کننگے۔ مودی عمران نا اواری اٹ کشمیر آ کوزہ کننگا‘ بھارت نا کنڈآن کشمیر آ کوزہ نا جے یو آئی مذمت ءِ کیک۔ جے یو آئی کشمیری ایلم تتون یکجہتی نا درشانی کیک‘ مولانا فضل الرحمن پارے کہ ملک اٹ چندی بشخ آتے ٹی چین نا زرکاری نا ستاءِ کینہ‘ پاک چین سنگتی مدامی‘ ہمالیہ غان بڑزا و سوردریاب آن کڑمب و شہد آن ہنین ءِ۔ پاک چین سنگتی زرگزرانی سنگتی ٹی بدل مسنے‘ مسکوہی حکومت سی پیک نا ڈٹ آتے بند کریسس، پی ٹی آئی حکومت پاک چین سنگتی ءِ نسخانی کرے‘ داسہ دوارہ چین اتون پتداری نا عمل برجاءِ۔ او پارے کہ گچین کاری تے ٹی ہر پارٹی تینا تینا فائدہ غاتے مون آتخسا گچین کاری تے ٹی بشخ ہلیک۔ چیئرمین پی ٹی آئی تینے صادق و امین پاہک ولے تہہ آن تاریخ نا کل آن بھلا ڈوہدار ءِ۔ او پارے کہ پی ڈی ایم گچین کاری سیوت اس اف‘ ہر پارٹی نا تینا جند انا گچین کاری حکمت عملی اس مریک۔ جے یو آئی نا مجلس شوریٰ لس گچین کاری تیکن تیاری تا پارت کرینے‘ اوپارے کہ آئین نا خواست آتا رد اٹ گچین کاریک مریرہ‘ دا بابت ہچ ءُ گڑاس ڈکوک اف۔ اگہ گچین کاریک ہُرے آ مریرہ آئینی وخت آن گدرینگک تو گچین کاری تے آئینی وخت آن مونی دننگ نا فیصلہ ءِ پارلیمنٹ کیک‘ دانا فیصلہ ءِ پارٹی یا شخصیت اس آخا بلکہ پارلیمنٹ کیک‘ اگہ گچین کاریک آئینی وخت اٹ مریرہ تو گڑا دانا شیڈول ءِ الیکشن کمیشن ایتک‘او پارے کہ سیٹ ایڈجسٹمنٹ آ اسٹ ایلو تون کمک کینہ۔

(آن لائن)