ہیلتھ انورنش و ریلیف پیکیج صحافی و میڈیا ورکر آتا حق ءِ، مریم اورنگزیب

اسلام آباد : حوالکاری وشینکاری نا بنجائی وزیر مریم اورنگزیب پارینے کہ ہیلتھ انورنش و ریلیف پیکج صحافی و میڈیا کارندہ غاتا حق ءِ‘ میڈیا ہاؤس آتا مالک آک تینا زمواری تیان دو تے بڑزا کننگ کپسہ‘ ساڑی حکومت صحافی وکارندہ سے آہچ ءُ بیداد اس کتنے‘ اسہ پروگرام اسے ہم بند کتنے‘ مسکوہی حکومت اٹ اپوزیشن ءِ ہیت کننگ نا موکل الو‘ ہراتم پارلیمنٹ نادرگہ نن کن بند ئس تو ہمو وخت آ نیشنل پریس کلب نادرگہ نن کن ملوک ئس‘پی ٹی آئی دور اٹ میڈیا سینسر شپ نافذ ئس‘ صحافی ومیڈیا کارندہ غاتا کم آن کم تنخواہ غا عملدرآمد اوفتا حق ءِ۔ محمد نواز شریف جیل مس تو ننا کارندہ غاک پرغ بٹ نا سیاست کتوس۔ محمد نواز شریف ملک ءِ جوڑ کرے اونا خذمت ءِ کرے‘ ملک انا رکھ ءِ سوگو کرے۔ نیشنل پریس کلب اٹ صحافی تیکن ہیلتھ انشورنش وریلیف پیکج نادود آن تران کرسا او پارے کہ دا وخت آ ملک ءِ خار‘پھسات و تفریق ناچٹفنگ نا گرج ءِ‘داسہ وخت بسنے کہ بے چیٹی نا سیاست ءِ چٹفسا ملک انا شونداری کن کاریم کننگے‘ مستین ءِ است آن درسا ملک انا شونداری کن ننے مونی سوچوئی مریک۔ مریم اورنگزیب صحافی و میڈیا ورکر تا ہیلتھ انشورنس و ریلیف پیکیج آ شکر کرسا پارے کہ اینو صحافی تے ہیلتھ انشورنس و ریلیف پیکج تننگ انگ ءِ ہراکہ داکان مست تننگ تنے و دا کریڈٹ ننا حکومت کن ءِ۔ وزیراعظم صحافی و میڈیا ورکر تے ہیلتھ انشورنس تننگ کن اہم کڑدار سر تسنے‘ داسہ میڈیا ہاؤس آتا مالک آک تینا زمواری تیان دوتے بڑزا کننگ کپسہ اوفتے تینا کارندہ غاتے حق تروئی مریک۔ مریم اورنگزیب پارے کہ ہیلتھ انشورنس و ایلو گام گیج آک صحافی و میڈیا ورکر آتا حق ئس ساڑی حکومت صحافی وکارندہ سے آ بیداد کتنے ونئے ننا حکومت اٹ پروگرام اس بند کننگانے ونئے صحافی اس دزگیر کننگانے‘ نن صحافی تیا بیدادی تے سگنگ کپنہ‘ اسٹ اسے نا برخلاف ہم بیرہلوک کارروائی متنے‘مسکوہی حکومت اٹ اپوزیشن ءِ ہیت کننگ ناموکل الو۔ پی ٹی آئی دور اٹ میڈیا سینسر شپ نافذ ئس‘ اونا دور اٹ میڈیا غا زور شاغنگ کن پالیسی جوڑ کننگا و کانود نافذ کننگا۔

(آن لائن)