9 مئی نا کیس آتے ملٹری ایکٹ نا رد اٹ چلیفنگ نا قرارداد منظور

اسلام آباد : قومی اسمبلی 9 مئی نا شرپسندآتابرخلاف کیس تے ملٹری ایکٹ انارد اٹ چلیفنگ نا قرارداد ءِ منظور کرے۔ اسپیکر راجہ پرویز اشرف ناکماشی ٹی قومی اسمبلی نا دیوان اڈہلک‘دیوان اٹ وزیر دفاع خواجہ آصف پاکستان تحریک انصاف(پی ٹی آئی) نا برخلاف قرارداد پیش کرے۔9 مئی نا بابت مذمتی قرارداد نا متن نا رد اٹ اسہ جماعت واونا قائد 9 مئی آ کل دنگ آتیان ایپار مس‘آئین وکانودءِ لتاڑسا فوجی ملکیت آتیا جلہو کرے‘ اوفتا جلہو نا سوب آن ریاستی ادارہ و ملک ءِ پورو مفروک نسخان مس‘ آئین وکانود نارد اٹ اوفتا برخلاف کارروائی ءِ پورو کننگے۔ قرارداد اٹ پاننگانے کہ دوبہ دار تابرخلاف کارروائی تے اسہ دے اس ہم پد بٹنگپ‘ اوفتا جماعت نا کارندہ و راہشونک ہم اوفتا کارروائی تیان بے تعلقی نا درشان کننگ ءُ‘ شرپسند و ڈوہدار تا برخلاف کارروائی ناوخت آ انسانی حق آتا خلاف ورزی متنے۔ قرارداد نا متن نا رد اٹ دنیا ٹی فوجی ملکیت آتیا جلہو کننگ آ کاروائی نا واکداری فوج ءِ دوئی ءِ‘ ہندا سوب آن کل بندغ آتا برخلاف پاکستان آرمی ایکٹ 1952 انا رد اٹ کارروائی کرسا اوفتے سزا تننگے۔ خواجہ آصف تینا بیان اٹ پارینے کہ اسہ ڈٹ اسے نا رد اٹ فوجی ملکیت آتیا جلہو کننگا۔ میانوالی ائیر بیس آ 85 جہاز سلوک ئسر ہرافتے خاخر تننگ نا کوشست کننگا‘ 9 مئی ناواقعہ غاتا کل شاہدیک اریر‘ او پارے کہ مچ آدنیا ٹی فوجی ملکیت آتیا جلہوتا کیسک فوجی عدالت آتے ٹی چلینگرہ‘ نن پوسکن ءُ ہچ ءُ کانود اس جوڑ کتنن‘ بلکہ دا کانود مہالو آن ساڑی ءِ‘ ہراڑے دہشت گردی مریک ہموڑے دہشت گردی کانود نارد اٹ کارروائی مریک ہراڑے 16 ایم پی او نا رد اٹ کیس چلینگک ہموڑے ہمو وڑ مریک‘ خواجہ آصف پارے کہ ہرافک جہاز آتے شست کریر‘ قلعہ بالا حصار ءِ شست کننگا۔ آرمی ایکٹ انارد اٹ کیس چلینگک۔ اوکان گڈ قومی اسمبلی ٹی 9 مئی نابابت قرارداد ءِ گیشتری نا سلاہ اٹ منظور کننگا

(مانیٹرنگ ڈیسک)