حسن ناصر (برج دلو)

حسن ناصر (ودی دے 13 فروری 1984ء)، برج ”دلو“ (Aquarius)، (برج انا ودشت 21جنوری آن 19 فروری اِسکان)، حساب اٹی ”یانزدہمیکو برج“، استار ”زحل“ (Saturn)، دروشم ”خوابڈ“، مزاج ”بادی“، ہجی نا حرف آک ”س، ش، ص، ث“، ہندا مزاج نا ایلو برج آک ”جوزا، میزان“، مزاج آن چَپ برج آک ”ثور، اسد، عقرب“، اسہ وڑ انا برج آک ”حمل، جدی، قوس، حوت“، بے تعلق برج آک ”سنبلہ، سرطان“، کلید وجود ”پٹ پول، مہر، خذمت“ جم وڑ اٹ مزاج نا اثر ”ذہین، قلم کار اسے تو لوز آتتون گوازی کروک، ذوق جمالیات“، مرکب عدد ”27“، لائف پاتھ ”1“ ءِ۔

حسن ناصر نا برج(دلو) انا رد اٹ بندغی نا خیرخواہ، جوان ءُ آخبت اسے کن مدام کوشست کروک، حوصلہ مند، ہمتی، مستقل مزاج، خود اعتماد، مستین آ سجفوک، تینا زند ءِ بدلیفنگ نا خواہندار، امن پسند، زمواری تے پورو کروک، مخالف جنس ءِ متاثر کروک، سنگتی ٹی اسہ آب اس ٹہیفنگ، دوستی ٹی روحانی ءُ تسکین اسے نا خواہندار، ہر وڑ اٹ قدردان و ایلوفتا جوزہ غاتے قدر تننگ اونا وصف آتے ٹی ساڑی ءِ۔ ہراڑے تینا ذہانت نا سوب آن مخالف جنس انا اُست آ اثر شاغک، آجوئی پسندی تون اوار چندی جوانی تا خواجہ مننگ ہموڑے بھاز اِنگا جوانی تتون اوار منہ نزوری اس ہم ارے۔ دُن کہ زو گیرام کننگ، اسہ وخت اٹی کیہی محبت آتا قیدی مننگ کیک، دائے۔

حسن ناصر نا مرکب عدد ”27“ ءِ۔ نومرالوجسٹ آتا رد اٹ دا عدد اسہ مبارک ءُ عدد اسے، طاقت، عزت نا نشانی ءِ۔ دا عدد نا خواجہ بندغ آک گیشتریکا دانشور مریرہ۔ دا عدد جوا، گوازی، طبیبی، لیکچرار، مصنف نا پیشہ غاتا حکمران ءِ۔ ولدا ہم زو آن زو امیر مننگ کن تغ خننگ داڑکن جوان اف۔

حسن ناصر نا لائف پاتھ ”1“ ءِ۔ دا عدد لیڈر نا عدد اسے۔ سوگو ارادہ نا خواجہ، سوچنگ و ٹک خلنگ آن زیات عمل کننگ آ باور کیک۔ تینا زند ءِ مدام جوان آن جوان جوڑ کننگ ناپد و رند اٹ مریک۔ تولنگ ہُننگ نا جاگہ غا گڑاس کننگ نا خواہندار مریک۔ ہمت و حوصلہ نا خواجہ مریک، کماشی کننگ نا لائخی تخک۔ وخت اس زو فیصلہ کیک ولے دا دوست بفک تے کہ اونا فیصلہ ءِ پین کس پرغے۔ لائف پاتھ ”1“ نا منفی پہلو تے ٹی دا گڑاک ساڑی ءُ کہ او انت گڑاس کہ دوئی کرینے است جم مفک، بے صبر ہم مننگ کیک۔ تنقید ءِ تسلیم کننگ اٹی مشکل محسوس کیک زیات بحث مباحثہ ءِ پسند کپک۔

حسن ناصر نا ودی دے تاریخ 13فروری 1984ء ءِ۔ 13 نا عدد بنیادی وڑ اٹ عدد ”1“، عدد ”3“ نا مرکب ءِ۔ ہراکہ طاقت، فائدہ نا عدد آک ءُ۔ دا عدد دہشت ناک ہم ارے و اسہ روحانی عدد اس ہم ارے۔ تاریخ نا پنہ غاتے چپی راستی کننگ آن معلوم مریک دا عدد قرون اولیٰ نا زمانہ غان خوف انا نشانی مسنے۔ خاص وڑ اٹ ہرا وخت کہ جمعہ نادے 13 تاریخ مرے۔ بائبل نا بھاز آ چاہندار آتا پاننگ ءِ کہ نوح انا طوفان نا بنا جمعہ نا دے 13 تاریخ آ مسنے۔ بائبل اولیکو وار 13 مارچ 1462ء اٹی شینک کننگا۔ بائبل نا عدد ہم (Bible 2+1+2+3+5=13) ”13“ ءِ۔ دے کی ملک آتے ٹی کُننگ نا ٹیبل آ 13 میکو بندغ مننگ (13میکو کڑسی آ تولنگ ءِ)کس دوست توپک۔ ایڑے داسکان ہم ہوٹل آتا 13 ڈاکہ جوڑ کننگ ءِ جوان خیال کننگپک۔ ہندن 13میکو کمرہ ہم جوڑکننگ ءِ جوان خیال کننگپک۔ ہوٹل آتیان بیدس ایلو بنگلہ غاتے ٹی ہم ہندا خیال تخنگک کہ 13 میکو ڈاکہ مف۔ امریکہ ٹی فورنیکس پنی ءُ اسہ ٹھیکیدار اس تینا پلازہ نا 13 میکو ڈاکہ ءِ جوڑ کرے تو اخبار تیٹی خبر آتا شہ سرخی جوڑ مس۔ میکسیکو ٹی مُست انا زمانہ ٹی اسہ فرقہ اس 13 خدائی دوشہ غاتا عبادت ءِ کریکہ۔ انڈین مندر اٹی بدھا نا 13 مجسمہ نا پوجا کننگاکہ۔

حسن ناصر آن بیدس براہوئی زبان نا ایلو ادیب و شاعر آتیان پروفیسر غلام دستگیر نا ودی دے (13 مئی 1969ء) ءِ، غفور جان ساسولی 13 (اپریل 1971ء) و ڈاکٹر عنبرین مینگل نا ودی دے 13 (اگست 1973ء) ءِ۔

حسن ناصر نا برج ”دلو“ ءِ۔ براہوئی زبان نا ایلو برج ”دلو“ والا شاعر و ادیب آتے ٹی جوہر براہوئی (28 جنوری 1950ء)، عبدالحیات منصور (8فروری (1965ء) و پروفیسر عظیم جان (7 فروری 1953ء) اسک اوار ءُ۔

ہفتئی تلار
تاک: 29
13-07 اگست 2021ء
پنہ: 05