ڈگری کالج قلات اٹی ”قلات اسٹوڈنٹس فورم”کے ایس ایف نا کتابی میلہ خلنگ آ رکھ

قلات اسٹوڈنٹس فورم، قلات اٹی تعلیمی ویل آتا زی آ کاریم کروک ءُ طالب علم تنظیم اسے، ہرانا غرز و مسخت آک طالب آتے کن پیشن خواننگ نا رماغنگ و اسکالر شپ آتے دُوئی کننگ ناءِ۔ داڑان بیدس قلات اسٹوڈنٹس فورم قلات نا تہٹی کتابی، میلہ، کیریئر کونسلنگ و ادبی دیوان ہم اڈ ایتک۔ ایلمنٹری کالج اٹی پروگرام ءِ اڈ تننگ آن گڈ قلات اسٹوڈنٹس فورم نا باسک آک کمیٹی اسے نا دروشم اٹی ڈگری کالج نا پرنسپل تون کتابی دیوان اسے نا بابت اٹ نشت اس کریر۔ ہراٹی کے ایس ایف نا باسک آک کتابی میلہ نا و یونٹ سازی نا رد اٹ کالج نا پرنسپل عبدالحئی دہوار ءِ کلہو تسُر۔ کالج نا ایڈمسٹریشن نا کنڈ آن ہچ ءُ خاص ءُ ورندی اس بتو۔ 27 اپریل 2024 تاریخ نا سہب اتون یانزدہ بجہ غا کے ایس ایف نا باسک آک ڈگری کالج اٹی کتابی میلہ نا بِنا ءِ کریر، ہرادے کالج نا پرنسپل کالج نا تہٹی روادار کتو۔ داڑسکان کہ بدسلوکی، دھڑکو، و کتاب آتیکن ٹیبل ہم تتو۔ کالج نا اسٹوڈنٹ آتے کلاس آتیٹی بند کرے، اسٹال آتا کنڈ آ روادار کتو، دا ہم دھڑکو تس کہ اگہ کس اوفتا کنڈ آ ہنا اونا خلاف کالج نا کنڈ آن سخت ءُ کاروائی مرو۔ کے ایس ایف نا باسک آک تینا کتاب آتے ڈغار نا زی آ تخار و تینا اسٹال آتے برجا تخار۔ ایڈمنسٹریشن نا کنڈ آن چناتے CGPA نا و ریسٹیگیٹ نا دھڑکو ہم تننگا، کہ کس کتابی اسٹال آتیا ہنپ، و کے ایس ایف والا تا دیوان اٹی ساڑی مف۔ داڑان دا پاش مریک کالج پرنسپل کالج نا چناتے دُون انا پُغٹ نا وڑ تخانے ہرافتے بیرہ ہمو تہار انگا دُون اسکان تخنگ خواہک کہ او سرپند مریر کہ دنیا بیرہ ہندادے۔

کالج پرنسپل نا دا رویہ غان درشان مریک کہ او قلات نا چنا تا دُوٹی کتاب و قلم خواہک، اوفتے دنیا تون اوار اوار بال کننگ آ خواپک۔ انسانی حق آتا تہٹی حقِ خود ارادیت ہر بندغ تون ارے، اوڑان کس کس ءِ توننگ کپک۔ ولے کالج پرنسپل تینا زوراکی اٹ چناتا زی آ جبر و طاقت نا درشانی کننگ ءِ، ہراکہ پنچ سال ناءِ بھلو ویل ودی کننگ ءِ۔ داڑان بیدس کالج نا تہٹی لکھ آتا کرپشن، چناتا سالی ٹُوئر نا پیسہ غاک، گوازی تا پیسہ غاک ایلو اسکالرشب آتے ادارہ نا احتساب ءِ کننگے۔

کتاب ہمو سنگت ءِ ہرا بندغ تہاری تیان کشک، اودے روشنائی بشخک، کتاب تنیائی نا سنگت ءِ، کتاب استاد ءِ۔ کس اس اگہ ادارہ اسے ٹی کتاب ءِ یا کتاب دوست آتے روادار کپک تو گڑا او پک لاشعوری نا تہٹی غرق مننگ ءِ۔

دا ویل اکن قلات نا اہلِ علم کتاب دوست و با شعور آ مخلوق آن خواست ءِ کہ ڈگری کالج قلات نا پرنسپل نا دا رویہ غاتا ہر وڑ اٹ مذمت ءِ کیر۔ ڈگری کالج تون اوار اوار قلات نا ایلو تعلیمی ویل آتیٹی KSF تون ہمکوپہ مریر۔