توحید آن پد وضو نماز نا حکم (سیرت سرور کائناتؐ)

 

جبرائیل نا خواجہؐ نا دُن توڷ و بش جاری سلیس

حکم اللہ نا وحی تون بسکہ یاری سلیس

رب انا حکم آتے ایسک پارے دادے دُن کرک

حکم ربی انت کہ بسک، اوڑا نی قائم مرک

خلک کُڑی ءِ جبرائیل دُن دِیر مس پیدا جہہ آن

او نشان تِس دُن وضو کہ خواجہؐ تولوک ئس رہ آن

ولدا پارے خواجہؐ ءِ او دُن سلہ دا وڑ سلہ

نی کرک نیت نماز کن اُست ءِ رب آ نی ملہ

دو تے دا وڑ تف نماز کن دا وڑ اٹ نی کر قیام

دن رکوع ءِ دادے سجدہ دا وڑ اٹ کر اہتمام

نی ثناء ءِ رب انا کہ حمد ءِ خوانک سورۃ اس

ذکر ءِ تینا رب انا کہ توڷ التحیات آ زرس

خواجہؐ اونا ہر عمل آ جوان ہُراکہ فکر اٹی

او کرے وضو ہمو وڑ دُن سلیسک ذکر اٹی

حکم ءِ اللہ نا ادا کیر سہب و شام آ دا رد اٹ

سہب اکن خوانِر اِرٹ تا شام اکن ہم او اِرٹ

حکم اللہ نا نماز کن اولیکو دا وڑ ئس

مون اکن ولدا نماز نا حکم چارے پین مس

خواجہؐ توحید و نماز ءِ پیش کرے دُن اُمت آ

بندگی ءِ کیر خدا نا کیر عمل نا سنت آ

بس اسٹ نا بندہ اُن نن پین تیان ہچ اس مفک

او اسِٹ ءِ لاشریک ءِ پین کس وار آ بفک

بیرہ داخس چان پکّا انت مریک اوڑان مریک

پین تیان ہِچ اس مفک بِن، بیرہ بس رب آن مریک

او نفع نسخان تروک آ او نگہبان کل انا

انت اس کے، کننگ چاہک، اودے بس چان کل انا

ہچ مفک بیدس اوڑان زور کل خلقت خلے

او غفور ءِ او رحیم ءِ او قہار کلّ ءِ ہلے

ہفتئی تلار

تاک: 10

12-06 فروری 2021ء

پنہ: 05