ترکیہ زہمی تا توار ءِ ہرپاکستانی آ سر کننگ ستا کڑزک، شہباز شریف

اسلام آباد : وزیراعظم پارینے کہ ترکیہ نا زمی جمب آن زہمی توار ءِ پاکستانی تسکان سرکننگ کن وزیر حوالکاری و شینکاری مریم اورنگزیب، اونا ٹیم و پاکستانی میڈیا نا کوشست ستاکڑزک۔ پاکستان ایئر فورس، پی آئی اے و این ڈی ایم اے نا دا آپریشن اٹی پبی اوار مننگ ہم ستاکڑزک۔ پاکستان نا ریسکیو ٹیم و پاک فوج انا ٹیمک ہم ترکیہ ٹی گچین وڑاٹ کمککی کارروائی تیٹی بشخ ہلنگ اٹی ءُ۔ مچ آ پاکستانی قوم آن خواست ءِ کہ ترکیہ و شام اٹی اخہ در مننگ کے تینا مسلمان ایڑھ ایلم تا کمک ءِ کیر۔ دیوان ءِ ترکیہ ٹی پاکستان نا سفیر زمی جمب آن بھسکاری تا حساب وکتاب نا بابت معلومدار کرے۔ وزیراعظم اونا کمکی کوشست آتیٹی گچین کڑد ادا کننگ نا ستاءِ کرسا اودے پارت کرے کہ او ترک حکومت و پاکستانی ادارہ غاتا نیام اٹ رابطہ غاتے پین سوگو کے۔ دیوان ءِ پاننگاکہ پاکستان نا کنڈان نئے بیرہ کمکی گڑا و ریسکیو ٹیم داوخت آ ترکیہ وشام آ سرمسنو وکمکی کارروائی تیٹی دوتے سُبک کننگ ءُ وخت اس کہ پی آئی اے پدریسہ جہاز آتے اٹ لاہور و اسلام آباد آن ترکیہ و شام گڑاتا فراوانی ءِ پک کننگ اٹی ءِ۔ داکان بیدس بروک آ منہ دے اٹی ٹرک آتا قافلہ بذریعہ ایران کمکی گڑاہرفسا ترکیہ و شام آ روانہ مریرہ۔ دیوان ءِ مستی پاننگاکہ زمی جمب آن زہمی تا کمک کن ملک گیر آگاہی مہم برجاءِ۔ وزیراعظم نا زمی جمب آن زہمی تیکن جوڑ کروک فنڈ انا اکاؤنٹ نمبر G-12166اٹی کمکی زرءِ جمع کرفنگ مریک وخت اس کہ ایلو کمکی گڑاتا عطیہ این ڈی ایم اے نا کلیکشن سینٹر اٹی جمع کرفنگ مریک۔ دا چرجوئی ٹی این ڈی ایم اے مچ آملک اٹی 13 کلیکشن سینٹر جوڑ کرینے وخت اس کہ وزیراعظم نا پارت آ دا کلیکشن سینٹرآتے ہرضلع ٹی ودفنگ انگ ءِ۔ درکار کمکی گڑاتے ٹی یخ انا موسم نا رداٹ تمبو، باسن ءُ پچ، کمبل، موزہ، چناتا تیار خور پین پین اوار ءِ۔ دیوان ءِ پاکستان نا کنڈان گدریفوک آ ریسکیو ٹیم، کمکی گڑا و 30 کٹ آتیا تالان ہسپتال نا ساڑی آ کارکڑد آن ہم معلومدار کننگا۔ ٹھپی تا درمان کن پاکستان نا کنڈان پین اسہ اسہ موبائل ہسپتال ترکیہ و شام آ روانہ کننگ انگ ءِ۔ دیوان اٹی بنجائی وزیر اسحاق ڈار، احسن اقبال، مریم اورنگزیب، خواجہ سعد رفیق، خصوصی کمکار طارق فاطمی، چیئرمین این ڈی ایم اے و ترکیہ ٹی پاکستان نا سفیر آن بیدس تعلقدار بڑزکو کمامدارآک بشخ ہلکر۔

(اے پی پی)