وزیراعظم نا ترکیہ زمی جمب زہمی تے کن چندہ مہم چلیفنگ نا پارت
ترکیہ و شام انا زمی جمب آن زہمی تیکن است انا ہُب اٹ عطیہ تننگے، پاکستان نا ہستی دار، صنعتکار و پوریاگر پبی بشخ ہلیر، اسکول، کالج و یونیورسٹی تیٹی ترکیہ و شام انا زہمی جمب آن زہمی تیکن فنڈ ریزنگ کننگے،شہباز شریف
Get real time updates directly on you device, subscribe now.
اسلام آباد : وزیراعظم محمد شہباز شریف صنعتکار، سخی و کاروباری بندغ آتیان ترکیہ و شام انا زمی جمب آن زہمی تیکن است انا حب اٹ عطیہ تننگ نا خواست کرینے۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی ترکیہ و شام اٹی زمی جمب آن زہمی تیکن کمکی سرجزآتا بابت دیوان اس مس ہراٹی زمی جمب آن زہمی تیکن کمکی سرجزآتا جاچ ءِ ہلنگا۔ وزیراعظم پارت کرے کہ اسکول، کالج و یونیورسٹی تیٹی ترکیہ و شام انا زہمی جمب آن زہمی تیکن فنڈ ریزنگ کننگے۔ وزیراعظم پاکستان نا ہستی دار، صنعتکار و پوریاگر تیان وزیراعظم فنڈ زمی جمب زہمی ترکیہ وشام اٹی زیات آن زیات بشخ ہلنگ نا خواست کرے۔ وزیراعظم پارے کہ پاکستانی الس زمی جمب آن زہمی تیکن کمکی گڑا این ڈی ایم اے نا کلیکشن سینٹر آ جمع کرفنگ کیرہ۔ مصیبت نا داساہت اٹی پاکستان ترکیہ کون آ تینا متکن آ سنگت تون ہم کوپہ سلوک ءِ۔ وزیراعظم نا پارت آ ترکیہ و شام انا زمی جمب آن زہمی تا کمکی کارروائی تے منظم کننگ کن بڑزکو کہول انا کمیٹی اس جوڑ کننگا۔ وزیر ڈٹ بندی احسن اقبال نا کماشی ٹی وزیر ریلوائی و ہوابازی خواجہ سعد رفیق، وزیر حوالکاری و شینکاری مریم اورنگزیب کمیٹی نا باسک مریرہ۔ وزیر تعلیم رانا تنویر حسین، وزیرمذہبی امور مفتی عبدالشکور، چیئرمین این ڈی ایم اے، پاکستان نا ترکیہ و شام اٹی سفیر و خصوصی کمکار طارق فاطمی ہم کمیٹی نا باسک مریک۔ وزیراعظم پارت کرے کہ کمیٹی نا ہڑدے ئی بنداو آ دیوان کمکی گڑاتا ترکیہ و شام اولیتی بنداو تیا فراوانی ءِ پک کے۔ پاکستان آن ترکیہ و شام انا زمی جمب آن زہمی تیکن ڈغاری، فضائی و سمندری کسر تے اٹ کمکی گڑاتے گدریفنگے۔ این ڈی ایم اے ہلہلہ ئی بنداو تیا پاکستان نا ہر ضلع ٹی ترکیہ و شام انا زمی جمب آن زہمی تیکن امداد یکجا کننگ کن کلیکشن سینٹر جوڑ کے۔ این ڈی ایم اے غٹ صوبائی حکومت آتون کمکی سرجزآتیٹی ترندی اتنگ کن رابطہ غاتے ودفے۔ پک کننگے کہ ترکیہ و شام انا زمی جمب آن زہمی تیکن گدریفوک آ گڑاک آب اٹ مریر۔ کمبل، باسن ءُ پچ، چناتا خور و تمبوتا دمدستی بست وبند ءِ کننگے۔ ترکیہ 2010 و 2022 نا نوکاپ اٹی پاکستانی تا ہروڑاٹ کمک ءِ کرے۔ کچ اٹ وسیلہ غاتیان پد ہم پاکستان تینا ترک ایڑھ ایلم تا امدادءِ برجاتخک۔ پاکستان کمکی گڑاتے گدریفنگ کن ایئرکوریڈور اس جوڑ کرینے۔ بھاز زوت پاکستان آن کمکی گڑاتا ٹرک آتا قافلہ ہم ترکیہ و شام آ روانہ مریک۔ پاکستان نا کنڈان سی کٹ آتیا تالان موبائل ہسپتال کن ٹیم و گڑاہم ترکیہ غا سرمرسا کاریم کننگ ءِ۔ دیوان ءِ حوال تننگاکہ ارٹ میکو موبائل ہسپتال ہم عملہ وگڑاتتون اوار روانہ کننگ انگ ءِ۔
(اے پی پی)