ساڑی پارلیمنٹ ءِ رزاک آ ناپورو تخنگانے‘ چیف جسٹس

اسلام آباد : سپریم کورٹ اٹ نیب ترمیم نا برخلاف عمران خان نا درخواست آ سماعت ناوخت آ چیف جسٹس عمر عطا بندیال ریمارکس تسنے کہ ملک اٹ کل ویل آتا ا یسری الس نافیصلہ ٹی ءِ‘ سپریم کورٹ اٹ چیف جسٹس عمر عطا بندیال ناکماشی ٹی جسٹس اعجازالاحسن و جسٹس منصور علی شاہ غا ساڑی بینچ نیب ترمیم نا برخلاف درخواست نا سماعت ءِ کرے، چیف جسٹس پاکستان لس گچین کاری تا ذکر ءِ کرسا ریمارکس تس کہ ملک اٹ کل ویل آک الس نا فیصلہ غان ایسر مننگ کیرہ‘ ساڑی حکومت نا جوڑ مننگ ءِ ہشت تُو مسنے‘ الیکشن کمیشن اسپیکر رولنگ کیس اٹ پاریسس کہ نومبر 2022 اٹ لس گچین کاری کرفنگ کن تیار مریرہ‘ ساڑی پارلیمنٹ ءِ رزاک آ ناپورو تخنگانے‘ ساڑی پارلیمنٹ آن مروک کانود ہم جھیڑہ ئی مننگ اٹی ءِ‘ عمران خان آن سوج کروئی تمک کہ او اسمبلی ٹی ہننگ خواپک گڑا گچین کاری تیٹی انتئے بشخ ہلیک؟ داوخت آ بنجائی حکومت نا وکیل مخدوم علی خان نیب ترمیم آ عمران خان نا حق مفننگ نا بابت دلیل ترسا پارے کہ عدالت آرٹیکل 184 تھری آ محتاط مرے‘ عدالت ہر درخواست آ کانود جوڑ کننگ ءِ کالعدم گوندک تو آب خراب مریک‘ آرٹیکل 184 تھری نا واکداری السی باندات آتیا مریک‘ چیف جسٹس پاکستان ریمارکس تس کہ ساڑی کیس انا ہیت آک جتاءُ‘ ملک انا کل آن بھلا جماعت نا سروک نیب ترمیم تے چیلنج کرینے‘ ملک اٹ سیاسی جھیڑہ و تنکی ءِ‘ تحریک انصاف اول اٹ پارلیمنٹ ءِ النگ نا حکمت عملی ءِ تینائی کرے‘ سما اف کہ پی ٹی آئی ولدا انتئے پارلیمنٹ آ پدی بننگ خواہک۔ عمران خان لس شاری اس اف‘ عمران خان نا حکومت ءِ النگ آن پد ہم بھلو کچ اسے ٹی الس نا مخ تفی ءِ دوئی کرینے‘ عدالت ہم کانود جوڑ کننگ اٹ نیام تمنگ خواپک‘ عدالت ہچ ءُ ازخود نوٹس اس ہلتو بلکہ نیب ترمیم تا برخلاف درخواست بسنے۔ چیف جسٹس مستی پارے کہ عدالت داکان مست ہم اسہ وار تینا فیصلہ غا است ہسونی نا درشانی کرینے۔ پاکستان نا تاریخ اٹ اسہ وزیراعظم بسوسس ہرا بھاز دیانتدار تکنگاکہ‘ دیانتدار وزیراعظم نا حکومت ءِ 58 ٹو بی نا رد اٹ چٹفنگاسس۔آرٹیکل 58 ٹو بی ڈریکونین لاء ئس‘ عدالت 1993 ٹی گونداسس کہ حکومت غلط وڑ اٹ چٹفنگا ولے داسہ گچین کاری تے کرفنگے۔ داسہ عمران خان اسمبلی ٹی اف و نیب ترمیم کانود آ کانود ہم جھیڑہ ئی مننگ اٹی ءِ‘ دا کیس اٹ عمران خان نا دعویٰ نا حق مننگ یا مفننگ نا باندات جوڑ مفک۔ دا وخت آ چیف جسٹس حکومت نا وکیل نا عمران ءِ حق مفننگ نا اعتراض ءِ مسترد کرے۔ مخدوم علی خان پارے کہ عمران ءِ درخواست دائر کننگ نا ہچ حق اف۔

(آن لائن)