آئی ایم ایف تون فائنل راؤنڈ، زُو مستائی ہلینہ، اسحاق ڈار

اسلام آباد : بنجائی وزیر خزانہ و محصولات سینیٹر محمد اسحاق ڈار پارینے کہ آئی ایم ایف تون فائنل راؤنڈ چلینگ انگ ءِ، قوم آن زُو مستائی ہلینہ، حکومت سڑک آتا مریس اٹی ودکی و حالیت زار ءِ گچین کننگ و روڈ سیفٹی کانود اٹی گچینی کن کاریم کننگ اٹی ءِ، پارلیمنٹیرین روڈ سیفٹی کانود اٹی گچینی کن تینا کڑد ءِ ادا کننگ اٹی ءُ، بطور پارلیمنٹرین روڈ سیفٹی نا ویل آتا ایسری ننا زمواری ءِ، ننے ہندی و جہانی کہول آ دا بابت اواری اٹ کاریم کروئی مریک۔ وزیرخزانہ دا ہیت ءِ پنچ شنبے نادے آ داڑے روڈ سیفٹی کانفرنس پارلیمنٹرین آتا گڈیکو سیشن آن تران کرسا پارے۔ وزیرخزانہ پارے کہ روڈ سیفٹی کانفرنس نا اڈتننگ ستاکڑزک، ہرسال سڑک آتیا شکست آتیٹی قیمتی جون تا نسخان مننگ ءِ، مچ آ دنیا ٹی ورناتا مرک آتا بھلا سوب سڑک و شاہراہ تیا مروک آ شکست آک ءُ، سڑک آتیا ٹریفک نا زور ودنگ ءِ دارداٹ راجی شونداری کن روڈ سیفٹی ءِ پک کروئی مریک۔ اوپارے کہ اینو نا کانفرنس آن بین الپارلیمانی یونین اٹی اوار ملک آتیٹی روڈ سیفٹی نا بابت جوان ءُ ایکشن پلان اس جوڑ کننگ اٹ کمک رسینگک۔ وزیرخزانہ پارے کہ پاکستان اٹی 5750 ہزار کلومیٹر مریس سڑک آتا انفراسٹرکچر ساڑی ءِ، ہراٹی موٹروے و ایکسپریس وے آتون اوار پرائمری و سیکنڈری سڑک آک اوار ءُ۔ اوپارے کہ حکومت سڑک آتا چندی ڈٹ آتیا برجامالی سال اٹی 100.4 ارب روپئی خڑچ کننگ اٹی ءِ۔ وزیرخزانہ پارے کہ 2020اٹی ملک انا سڑک آتیا 34 ملین گاڈی ئسر، مڈل کلاس اٹی ودکی آن گاڈی تا کچ اٹی ہم ودکی مسنے۔ اوپارے کہ مسلم لیگ 1990نا دہائی ٹی ایم ٹو نا پن اٹ لاہور اسلام آباد موٹروے ڈٹ انا بناءِ کرے، اودے داسہ مچ آ ملک اٹی تالان کننگا و داتم اسکان ملک انا گیشتر بشخ آتے کور کننگانے۔ موٹروے نا ڈٹ آتے چین پاکستان اقتصادی راہداری تون ہم گنڈنگانے۔ اوپارے کہ آخبت نا گرج آتے مون آ تخسا مستین اٹ موٹروے نا ڈٹ آتا بناءِ کریسس ہراڑا ہمووخت آ تنقید کننگاسس ولے اوکان پد غٹ ءِ دا حقیقت نا درک لگا کہ دا روڈ سیفٹی و آخبت نا گرج ءِ۔ روڈ نیٹ ورک نا بابت ملک داسہ شون ہلوک ءِ۔ اوپارے کہ حکومت سڑک آتا مرغنی و حالیت زار ءِ گچین کننگ و روڈ سیفٹی کانود اٹی گچینی کن کاریم کننگ اٹی ءِ۔ اوپارے کہ پارلیمنٹرین روڈ سیفٹی کانود اٹی گچینی کن تینا کڑد ءِ ادا کننگ اٹی ءُ، بطور پارلیمنٹرین روڈ سیفٹی نا ویل آتا ایسری زمواری ءِ، ننے ہندی و جہانی کہول آ دا بابت کاریم کروئی مریک۔ وزیرخزانہ پارے کہ ننے روڈ سیفٹی نا گام گیج آتے مون آ درسا 2030 اسکان شکست آتا کچ ءِ 50 درسد اسکان کم کروئی مریک، دا اقوام متحدہ نا ہدف آتیٹی ہم اوار ءِ۔ دا ہدف ناممکن اف، اینو نا کانفرنس دا بابت اہمیت تخک، داڑان چندی ملک آتا پارلیمنٹرین اسہ ایلو نا آزموندہ غاتیان فائدہ ہرفنگ کیرہ۔ اوپارے کہ ننے کانود سازی آ چکار کروئی ءِ، داڑتون اوار اوار انفورسمنٹ ءِ پک کننگ ءِ۔ دا گام گیج آتیان سڑک آتیا شکست آتا کچ ءِ کم کننگ مریک۔

(اے پی پی)